«Քոբանիում պայքարող քրդերն, իրականում, դնում են Սիրիայի տարածքում առնվազն իր իրավունքներով աննախադեպ ինքնավարության հիմնաքարը»
Թուրքիան Մերձավոր Արևելքում` մասնավորապես Սիրիայում ընթացող գործընթացներում որոշակիորեն հայտնվել է փակուղային իրավիճակում և սրա պատճառը Թուրքիայի այն քաղաքականությունն է, մարտավարությունը, որն իրականացվեց վերջին շրջանում: Այս մասին լրագրողների հետ հանդիպմանը նշեց թուրքագետ Լևոն Հովսեփյանը` ավելացնելով, որ միջազգային կոալիցիային մաս կազմելու համար թուրքական պայմանները չի ընդունվում ԱՄՆ-ի կողմից:
Սիրիայի հետ սահմանին բուֆերային գոտու ստեղծման հարցը աջակցություն չի գտնում, ինչն էլ սահմանափակում է սիրիական գործընթացներում Թուրքիայի դերը: Թուրքիան անվտանգության գոտու ստեղծմամբ ցանկանում է որոշակիորեն գործողությունների ազատություն ստանալ և դրանք համապատասխանեցնել իր նպատակներին:
Անդրադառնալով քրդաբնակ Քոբանիում ընթացող զարգացումներին բանախոսը նշեց, որ այդ գործընթացները դառնում են այն հիմքերից մեկը, որի վրա կձևակերպվեն քրդերի պահանջները միջազգային հանրության` մասնավորապես ԱՄՆ-ի և դաշնակիցների նկատմամբ:
«Քրդերը Սիրիայում արդեն պարզորոշ կերպով թեև ոչ պաշտոնապես դարձել են միջազգային կոալիցիայի մաս: Իսկ սրանք հետագայում լավ հիմքեր կլինեն իրենց հավակնություններն ու պահանջները ներկայացնելու համար: Որոշակի զուգահեռներ կարելի է տանել 2003 թ. իրաքյան արշավի հետ, երբ քրդերն աջակցեցին ԱՄՆ-ին, միջազգային կոալիցիային և դրա դիմաց ապահովեցին իրենց ինքնավարության կենսունակությունը: Արդեն իսկ ԱՄՆ-ը բացահայտ համագործակցում է Սիրիայի քրդական պաշտպանական ուժերի հետ, դաշնակից այլ պետություններ ևս սկսել են նաև ռազմական առումով օգնել քրդերին ոչ միայն Սիրիայում, այլև Իրաքում:
Արաբագետ Արմեն Պետրոսյանն էլ նկատեց, որ քրդերի և «Իսլամական պետության» միջև Քոբանիում ընթացող դիմակայությունն իրականում բազմաշերտ հակամարտություն է մի կողմից հակամարտ կողմերի ուղղակի մասնակցությամբ, մյուս կողմից՝ անուղղակիորեն՝ ԱՄՆ-ի կողմից գլխավորված միջազգային կոալիցիայի և Թուրքիայի միջև:
Նրա կարծիքով` «Եթե քրդերի դեմ հարձակումը տեղավորվում է ԻՊ-ի որդեգրած գործելաոճի տրամաբանության մեջ, այսինքն այդ միջոցով իսլամականները ձգտում են նաև ամբողջական դարձնել Հալեպի և Ռակկայի միջև իրենց կողմից վերահսկվող թուրք-սիրիական սահմանը ողջ երկայնքով, իսկ քրդերն էլ, բնականաբար, պայքարում են իրենց բնակավայրերի համար, բացի նշվածից, առկա է նաև անուղղակի դիմակայություն ԱՄՆ-ի գլխավորած միջազգային կոալիցիայի և Թուրքիայի միջև: Թուրքիան կտրականապես հրաժարվում է միակողմանի գործողություններ նախաձեռնել իսլամանների դեմ՝ առանց սեփական նախապայմանների առարկայացման հնարավորության՝ դիտարկելով Քոբանիում քրդական «Ժողովրդվարական միություն» կուսակցության գլխավորությամբ ԻՊ-ի դեմ պայքարող ժողովրդական ինքնապաշտպանական ուժերին՝ որպես «Քրդական բանվորական կուսակցության» սիրիական ճյուղավորում: Նման պայմաններում, թեպետ Վաշինգտոնը հրապարակավ չի հայտարարում այդ մասին, այսուհանդերձ, Անկարայի պահնջներին տուրք չտալու տեսանկյունից՝ քրդերի հաղթանակը Քոբանիում սկզբունքային նշանակություն ունի ԱՄՆ-ի համար, ինչով էլ պայմանավորված է ամերիկյան օդուժի ակտիվ գործողություններն՝ ուղղված շրջանում ԻՊ-ի դիրքերի դեմ»:
Արաբագետը նաև ընդգծեց, որ Քոբանիում ընթացող զարգացումները նաև մի նոր աշխարհաքաղաքական գործընթացի սկիզբ են ազդարարում, որը պայմանավորված է Սիրիայի տարածքում մասնավորպես առավել լայն քրդական ինքնավարության, իսկ ապագայում նաև պետականության ձևավորման հեռանկարով. «Քոբանիում կենաց և մահու պայքար մղող քրդերն, իրականում, դնում են Սիրիայի տարածքում առնվազն իր իրավունքներով աննախադեպ ինքնավարության հիմնաքարը»:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
