Վարդան Պետրոսյանը ցուցմունք տվեց. «Նման պարագայում լռելն ինձ համար ավելի տղամարդկայնություն էր, քան խոսելը»
«Ինչո՞ւ մինչ այժմ ցուցմունք չեմ տվել»,- այսօր Կոտայքի մարզի ընդհանուր իրավասության դատարանում տալով իր առաջին ցուցմունքը՝ նման հարցադրում արեց, ապա պարզաբանումներ ներկայացրեց Վարդան Պետրոսյանը:
Նա նշեց, որ կան մի քանի պատճառներ, որ մինչ այս հրաժարվել է ցուցմունք տալ:
«Առաջին՝ քննիչ Հակոբյանը փորձել է մի քանի անգամ ինձանից ցուցմունքներ կորզել` առանց իմ փաստաբանի ներկայության: Ես էլ ասել եմ ցուցմունք չեմ տա, քանի որ իմ փաստաբանը ներկա չէ: Նախաքննության ընթացքում նախաքննական մարմինը համառորեն իմ փաստաբանին չէր տրամադրում գործում առկա փաստաթղթերը: Այսինքն` ես ցուցմունք չէի տալիս, որպես բողոքի ակցիա»,- ասաց Վ. Պետրոսյանը:
Նա նաև նշեց, որ մինչ այժմ չի խոսել, քանի որ վախեցել է, որ իր ցուցմունքը կարող է հակասություն ունենալ տուժող կողմի ցուցմունքների հետ, այն դեպքում, երբ տուժողների վերաբերմունքն արդեն իսկ բավական ագրեսիվ էր:
«Տպավորություն էր ստեղծվել, որ ես վախեցել եմ ցուցմունք տալ: Ամենայն անկեղծությամբ եմ ասում, նման պարագայում լռելն ինձ համար ավելի տղամարդկայնություն էր, քան խոսելը: Տուժող կողմն ուզում էր, որ ես ցուցմունք տամ, ես այդպես էլ անում եմ»,- նշեց նա:
Խոսելով վթարի օրվա մասին` Վ. Պետրոսյանն ասաց, որ նախապես պայմանավորվածություն ունենալով «Չէին սպասում» հաղորդաշարի հետ, առավոտյան, մինչև նկարահանող խմբի ժամանումը, Սարալանջ գյուղի իր տան բակում ընկույզ է հավաքել:
«Չէին սպասում» հաղորդաշարը նկարահանելուց հետո, հաղորդաշարի ռեժիսոր Սուրեն Շահվերդյանի առաջարկով նկարահանվել է նաև «Քաղցած չէին սպասում» հաղորդաշարը:
Ինչ վերաբերում է այն հարցին, թե արդյո՞ք իր տան բակում դրված սեղանին օղու շշի մեջ ջուր է եղել, թե օղի, նա կրկնեց, որ դրա մեջ ջուր է եղել:
«Ես հաջորդ օրը ներկայացման էի: Ներկայացման հաջորդ օրը, ներկայացման ժամանակ, ներկայացումից հետ ալկոհոլ չեմ օգտագործում»,- ասաց Վ. Պետրոսյանը:
Իսկ թե ինչո՞ւ է Եղվարդից վերադարձել Երևան, իր իսկ հարցին պատասխանելով ասաց, որ Սարալանջում ջրի խնդիր կա, տանը ջուր չի ունեցել, վերադարձել է, որպեսզի առավոտյան պատրաստ գնա աշխատանքի: Այդ օրը, նախքան ներկայացումը, երկու հարցազրույց է ունեցել:
Միջադեպի հետ կապված, նախ ասաց, որ մեքենան վարել է դանդաղ, նկատել է իրենից մի քիչ դեպի աջ գտնվող «Նիվա» ավտոմեքենան, որի հետադարձ լույսը վառված էր, մի քանի անգամ մոտակա և հեռակա լույսերով նշան է արել՝ մտածելով, որ հանկարծ կարող է թեքվի մի քիչ ձախ:
«Անսպասելիորեն «Նիվան» թեքվում է դեպի խճուղին՝ դուրս գալով բանուկ մաս, իմ մեքենայի դեմը: Եղել է բախում, ես գիտակցությունս կորցրել եմ»,- պատմեց դերասանը՝ հավելելով, որ ուշքի է եկել մաքուր օդից, երբ իրեն մեքենայից հանել են դուրս:
Այնուհետև պատմեց, որ վթարի վայրից իրեն տեղափոխել են Եղվարդի հիվանդանոց, այնուհետև Երևան: Տեղափոխող անձնակազմը երիտասարդներ են եղել: Վ. Պետրոսյանի խոսքով, ինքը սկսել է կատակներ անել՝ նրանց քաջալերելու համար, քանի որ իր վիճակը շատ ծանր է եղել:
«Բոլորովին չեմ իմացել, որ ողբերգություն է եղել, որ երեխաներ են զոհվել: Հետո, երբ իմացա, ցնցումը շատ մեծ էր»,- ասաց նա:
Ավարտելով իր խոսքը՝ Վ. Պետրոսյանն ասաց. «Երբ իրար կրակող, սպանող մարդիկ ընդամենը մի դեպուտատի ստորագրությամբ դուրս են թողնվում, իսկ երբ գիտես, որ ողբերգություն է եղել, դժբախտ պատահար, 11 ամիս է նստած ես...Քո համար ստորագրել է դեպուտատների կորպուս, արվեստի հայտնի գործիչներ, Հայաստանում և Ֆրանսիայում 21 հազար քաղաքացի, քննչական մարմիններն այնքան ծանր հանցագործ են համարում, որ եկել եմ այն եզրակացության, որ այս գործը քննվեց որպես կանխամտածված սպանություն և օգտագործվեց ինձ հոգեպես ճնշելու համար»:
Վ. Պետրոսյանը պատասխանեց նաև հարցերի: Նա նախ պատասխանեց իր պաշտպան Նիկոլայ Բաղդասարյանի հարցերին:
Այնուհետև հարցեր ուղղեց տուժողների շահերի ներկայացուցիչ Ռուբեն Բալոյանը: Վ. Պետրոսյանը հրաժարվեց պատասխանել այն պատճառաբանությամբ, որ դատարանի դահլիճից դուրս Ռուբեն Բալոյանը դրսևորում է ոչ պրոֆեսիոնալ պահվածք:
Ըստ մեղադրական եզրակացության, Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում իր անձնական օգտագործման «ԲՄՎ-320» մակնիշի, 04 ՍԼ 920 պ/հ ավտոմեքենան վարել է Կոտայքի մարզի Սարալանջ գյուղի կողմից դեպի Երևան քաղաքի ուղղությամբ։ Հասնելով Եղվարդ-Երևան ավտոճանապարհի 2-րդ կմ հատվածին իրականացրել է ոչ պատշաճ և վտանգավոր երթևեկություն` ավտոմեքենան վարել է բնակավայրում սահմանված թույլատրելի առավելագույնը գերազանցող առնվազն` 71 կմ/ժ արագությամբ և երթևեկության ընթացքում միաժամանակ օգտվելով հեռախոսակապից, ինքն իրեն զրկել է ավտոմեքենայի լիարժեք կառավարումն իրականացնելու տեխնիկական հնարավորությունից, թույլ է տվել ՃԵԿ-ի 65 և 66 կետերի, ինչպես նաև «ճանապարհային երթևեկության անվտանգության ապահովման մասին» ՀՀ օրենքի 23 հոդվածի 3-րդ կետի, 24 հոդվածի 7-րդ կետի «Զ» ենթակետի պահանջներին հակասող գործողություններ, ստեղծել է վթարային իրադրութուն, որի արդյունքում ավտոմեքենան դուրս է բերել երթևեկելի մասից դեպի աջ և առջևի մասով ընդհարվել է հողածածկ կողնակում կանգնած վիճակում գտնվող «Վազ 21214» մակնիշի, 870 ՕԼ 64 պ/հ ավտոմեքենայի հետևի մասին, որի հետևանքով «Վազ -21214» մակնիշի ավտոմեքենայի ուղևորներ էդվարդ Արթուրի Հակոբյանին և էդգար Հայկի Հակոբյանին անզգուշությամբ պատճառել է մահ, Տաթևիկ Արթուրի Հակոբյանի առողջությանը, ծանր վնաս` որպես կյանքին վտագ սպառնացող, Հայկ Մարտիրոսի Հակոբյանի, էմմա Հայկի Հակոբյանի ինչպես նաև ավտովարորդ Արթուր Մարտիրոսի Հակոբյանի առողջությանը, միջին ծանրության վնաս` առողջության տևական քայքայումով:
Նախորդող հրապարակումներ՝
Վարդան Պետրոսյանի գործ. Փաստաբանը ներկայացնում է նոր լուսանկարներ
Բժիշկ. Վարդան Պետրոսյանի մոտ խմածության ցուցանիշը եղել է զրո
Վկաները պնդեցին, որ Վարդան Պետրոսյանի վրայից ալկոհոլի հոտ չեն զգացել
Վարդան Պետրոսյանի գործով տուժող կողմին զգուշացում կտրվի` պաշտպանին սպառնալու համար
Լրահոս
Տեսանյութեր
Ի՞նչ կա մեքենայի մեջ. Կիրանցում ծակեցին մեքենայի անվանդողերը
