Օմբուդսմենը «Ժողովուրդ»-ի գործով միջնորդել է դատավոր Ներսիսյանի նկատմամբ կարգապահական վարույթ հարուցել
Հայաստանի Մարդու իրավունքների պաշտպան Կարեն Անդրեասյանը «Ժողովուրդ» օրաթերթի գործով կայացրած դատական որոշման վերաբերյալ պաշտոնական գրությամբ դիմել է ՀՀ դատավորների ընդհանուր ժողովի էթիկայի և կարգապահական հարցերի հանձնաժողովին. Պաշտպանը միջնորդել է դատավոր Ռուբեն Ներսիսյանի նկատմամբ կարգապահական վարույթ հարուցելու հաղորդում ներկայացնել: Այդ մասին տեղեկացնում են «Ժողովուրդ» օրաթերթի խմբագրությունից:
Ըստ աղբյուրի, Մարդու իրավունքների պաշտպանի ուսումնասիրությունները պարզել են, որ դատավոր Ռ. Ներսիսյանը թույլ է տվել նյութական և դատավարական նորմերի ակնհայտ և կոպիտ խախտում, ինչը հիմք է հանդիսանում, որ դատավորը կարգապահական պատասխանատվության ենթարկվի:
«Օմբուդսմենի գրասենյակը կարծում է, որ դատավորը զրպարտության համար նյութական փոխհատուցում կարող էր նշանակել միայն այն դեպքում, եթե պարզեր, որ զրպարտության ենթարկված անձին զրպարտության պատճառով պատճառված վնասի ոչ նյութական հատուցումը բավարար չէ պատճառված վնասը փոխհատուցելու համար:
Այնինչ, օմբուդսմենը նկատում է, որ վճռի բովանդակությամբ նման եզրահանգման դատարանը չի եկել:
Նշվածը կարող է պայմանավորված լինել նրանով, որ հայցվոր Խաչիկ Խաչատրյանը դատարանին չի ներկայացրել զրպարտության պատճառով իրեն պատճառված վնասը հստակորեն հիմնավորող փաստեր և համապատասխանաբար այդ փաստը հավաստող ապացույցներ, այլ պարզապես դատարանից պահանջել է իր պատիվը, արժանապատվությունը և գործարար համբավը արատավորող զրպարտչական տեղեկություններ տարածելու համար օրաթերթից բռնագանձել 2 մլն դրամ, իսկ վիրավորանք պարունակող տեղեկություններ տարածելու համարª 1 մլն դրամª որպես փոխհատուցում: Այսինքնª որոշման մեջբերված դրույթներից բխում է, որ եթե հայցվոր կողմը օրենքով նախատեսված ոչ նյութական հատուցման պահանջներից բացի, ներկայացրել է նաև դրամական «փոխհատուցման» պահանջ, ապա պետք է ապացուցի նաև, թե ինչո՞ւ առաջինը բավարար չէ պատճառված վնասը փոխհատուցելու համար: Իսկ դատարանի կայացրած վճիռը չի պարունակում դատարանի որևէ եզրահանգում կամ կարծիք վերը նշվածի վերաբերյալ:
Ստացվում է, որ դատավորը չի ենթարկվել ՀՀ քաղաքացիական դատավարության օրենսգրքի 4-րդ հոդվածում և ՀՀ դատական օրենսգրքի 8-րդ հոդվածում ամրագրված սկզբունքներին, չի կիրառել տվյալ գործով ՍԴՈ-997 որոշումը, ինչը համարվում է դատավարական իրավունքի նորմի խախտում: Իսկ սույն գործով ՍԴՈ-997 որոշման չկիրառելն իր հերթին հանգեցրել է նյութական իրավունքի նորմի խախտման:
Ի դեպ, ՄԻՊ-ը հայտնում է նաև, որ որևէ ողջամիտ իրավական ենթադրությամբ կամ փաստարկով չի կարող կասկածի տակ դրվել այն, որ դատավորը նախ պետք է ուսումնասիրեր հայցադիմումով բարձրացված խնդրի կարգավորմանն առնչվող ամբողջ իրավական դաշտը, որից հետո վճռի պատճառաբանական մասում ամրագրեր իր եզրահանգումը կիրառելի իրավունքի վերաբերյալ:
ՄԻ պաշտպանը հղում է արել նաև մարդու իրավունքների եվրոպական կոնվենցիայով ամրագրված խոսքի ազատության իրավունքին, որը տարածվում է ոչ միայն այնպիսի «տեղեկատվության» կամ §գաղափարների» նկատմամբ, որոնք ընդունվում են բարեհաճությամբ կամ համարվում են անվտանգ ու չեզոք, այլև նրանց, որոնք կարող են վիրավորել, ցնցել կամ անհանգստություն պատճառել անձանց: Այդ շրջանակներն առավել լայն են լրագրողների մասնագիտական գործունեության դեպքում, ըստ որի, լրագրողական ազատությունը ներառում է որոշակի աստիճանի չափազանցության և նույնիսկ սադրանքի դիմելու հնարավորություն:
Ամփոփելով խոսքը՝ օմբուդսմենի գրասենյակը գտնում է, որ դատավոր Ռ. Ներսիսյանը թույլ է տվել նյութական և դատավարական նորմերի ակնհայտ և կոպիտ խախտում, ինչը հիմք է հանդիսանում դատավորին կարգապահական պատասխանատվության ենթարկելու համար:
Հիմա մնում է ՀՀ դատավորների ընդհանուր ժողովի էթիկայի և կարգապահական հարցերի հանձնաժողովի անդամները ընդառաջեն ՄԻՊ դիմումին: Մենք հետևողական կլինենք խնդրին»,- նշված է թերթի տարածած հաղորդագրության մեջ:
Ավելի վաղ Panorama.am-ը անդրադարձել էր այս գործին և տեղեկացրել, որ Կենտրոն և Նորք Մարաշ վարչական շրջանի դատարանը (դատավոր Ռուբեն Ներսիսյան) վճռել էր պարտավորեցնել «Ժողովուրդ» օրաթերթին՝ պարտադրելով որպես փոխհատուցում գործարար Խաչիկ Խաչատրյանին վճարել 1 մլն 783 հազար ՀՀ դրամ: Վճռի կատարման հետքերով թերթի խմբագրությունը հունիսի 25-ին տեղեկացել էր, որ դատական ակտերի հարկադիր կատարման ծառայությունը արգելանք է դրել խմբագրության բանկային հաշվին եղած 1 մլն-ից ավել գումարի վրա:
Թեմային առնչվող հրապարակում՝
«Գործարարը ճնշում է «Ժողովուրդ»-ին». բանկային հաշիվները արգելանքի տակ են
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին