«Գործարարը ճնշում է «Ժողովուրդ»-ին». բանկային հաշիվները արգելանքի տակ են
Գործարար Խաչիկ Խաչատրյանն ընդդեմ «Ժողովուրդ» օրաթերթի դատական վեճը նոր զարգացում է ստացել. թերթի խմբագրությունը հունիսի 25-ին տեղեկացել է, որ դատական ակտերի հարկադիր կատարման ծառայությունը արգելանք է դրել խմբագրության բանկային հաշվին եղած 1 մլն-ից ավել գումարի վրա:
Հիշեցնենք՝ գործարարի և օրաթերթի միջև դատական վեճն առաջացել էր դեռևս 2012 թվականից, երբ թերթը հրապարակել էր տեղեկություն այն մասին, որ ՀՀ գյուղատնտեսության նախարարության սննդի անվտանգության պետական տեսչությունը տուգանել է «X գրուպ»-ի նախագահ, «Ջրաշխարհ»-ի, «Երևանի թռչնաբուծական ֆաբրիկա»-ի «Վալենսիա» ընկերության սեփականատեր Խաչիկ Խաչատրյանին: Պատճառը Հայաստանի շուկայում Խաչատրյանին պատկանող ԵԹՖ-ն ժամկետանց հավկիթների իրացումն էր: Նույն հրապարակման մեջ թերթը նաև ներկայացրել էր գործարարի տեսակետը:
Այդ հրապարակումից հետո «Ժողովուրդ»-ը նոր տեղեկություն էր ստացել այն մասին, որ Խաչիկ Խաչատրյանը հարկային ծառայության հետ խնդիրներ ունի և դրա հետքերով, լրագրողը զանգահարել էր գործարար Խաչատրյանին, սակայն վերջինս պատասխանելու փոխարեն հայհոյել էր լրագրողին, ինչն էլ դարձավ դատական գործընթացների պատճառ էր դարձել:
Նշենք, որ Կենտրոն և Նորք Մարաշ վարչական շրջանի դատարանը (դատավոր Ռուբեն Ներսիսյան) վճռել էր պարտավորեցնել «Ժողովուրդ» օրաթերթին՝ պարտադրելով որպես փոխհատուցում գործարարին վճարել 1 մլն 783 հազար ՀՀ դրամ:
«Եթե ոստիկանները լրագրողների նկատմամբ ուժ գործադրելով են նրանց ճնշում, ապա գործարար Խաչիկ Խաչատրյանն էլ այսպես է որոշել ճնշել՝ մեզանից պահանջելով 2 մլն դրամ: Իսկ այդ գումարը թերթի համար մեծ գումար է, և մենք կանգնած ենք տպագրության սահմանափակման խնդրի առջև: Արդեն 4 տարի է՝«Ժողովուրդ» օրաթերթը իսկապես այս ճնշման ներքո է գտնվում», -այսօր «Լրագրողների իրավունքների խախտումները Հայաստանում. լրագրողական հանրության և պետության արձագանքները» թեմայով քննարկման ժամանակ ներկայացրեց թերթի լրագրող Սոնա Գրիգորյանը: Լրագրողն ասաց, որ իր անձնական բանկային հաշիվն է նաև կալանքի տակ, չի կարող աշխատավարձ ստանալ, իսկ դա ճնշում է իր գործունեության վրա:
Խոսքի ազատության պաշտպանության կոմիտեի նախագահ Աշոտ Մելիքյանն ասաց, որ դա լրագրողի նկատմամբ ճնշման դասական օրինակ է: «Այս պարագայում օգտագործվում է դատական ատյանների հնարավորությունը, ֆինանսական ճնշում է գործադրվել: «Ժողովուրդ» թերթի համարներում կարելի է գտնել ոչ ստույգ ինֆորմացիա, էթիկայի խախտում, բայց կոնկրետ վեճի առարկա դարձած հրապարակման մեջ ամեն ինչ ստույգ է եղել և դա հավաստել է նաև գյուղատնտեսության նախարարությունը՝ թերթը ստուգված փաստ էր հրապարակել, փաստերը տարանջատվել էին դատողություններից»,- հավելեց Մելիքյանը՝ ընդգծելով, որ հարցը պետք է հասցնել միջազգային դատական ատյաններ:
«Դատավոր Ռ. Ներսիսյանի կողմից կայացված վճիռը մենք համարում ենք ապօրինի, չհիմնավորված և մեր անխափան գործունեությունը խոչընդոտելուն միտված հստակ քայլ: Այսպիսի մեծ տուգանքը անհամաչափ է այն եկամուտներին, որը ապահովում է օրաթերթը՝ իր գործունեությամբ: Սա ոչ այլ ինչ է, քան մամուլի ազատության խոչընդոտ՝ ֆինանսական ճնշումների տեսքով (չի բացառվում, որ տպարանին փոխանցվելիք գումարի ուշացման պատճառով օրաթերթը լույս չտեսնի):
Ու քանի որ մոտ 2 մլն դրամը մեր խմբագրության համար բավականին մեծ գումար է, ուստի «Ժողովուրդ» օրաթերթի և ArmLur.am-ի խմբագրակազմը գիտակցելով իրավիճակի լրջությունը, հույս չունենալով, որ հնարավոր է դատական իշխանության միջոցով այլևս արդարության հասնել, որոշել է հրաժարվել հունիս ամսվա աշխատավարձի 50 տոկոսից, որպեսզի հնարավոր լինի ապահովել օրաթերթի և ArmLur.am-ի կայքի անխափան գործունեությունը (այսպիսով խնդիրն ընդամենը մասնակի կլուծվի)»,- նշվում է թերթի խմբագրության այսօր տարածած հայտարարության մեջ:
Նախորդող հրապարակումներ
Դատարանը ևս 3 մլն դրամի արգելանք է դրել «Ժողովուրդ» օրաթերթի գույքի վրա
«Պռաստիտուտկա»-ն վիրավորանք չէ՞. Դատարանը մերժել է «Ժողովուրդ» թերթի հայցը
«Ժողովուրդ»-ը կարող է նախադեպ ստեղծել, եթե դիմի Սահմանադրական դատարան. Փաստաբան
Դատավորը որոշել է մերժել «Ժողովուրդ»-ի դեմ հայցը
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ