Ձեր վստահելի աղբյուրը

«Իսլամական պետության» դեմ պայքարում Սերբիան միջազգային կոալիցիայի մաս է կազմում: Այսօր Երևանում լրագրողների հետ ճեպազրույցում հայտարարեց Սերբիայի պաշտպանության նախարար Բրատիսլավ Գաշիչը:

«Մենք փոքր երկիր ենք և չենք կարող այլ միջոցներով մասնակցել այդ գործողություններին, բացի հետախուզության ոլորտից: Կարծում ենք, որ ավելի լայն համաշխարհային կոնսենսուս է հարկավոր միջազգային ահաբեկչության, «Իսլամական պետության» դեմ պայքարում: Ես անկեղծ ցավում եմ զոհված օդաչուի համար»,-ասաց  Բրատիսլավ Գաշիչը:

Նրա խոսքով, Սերբիայի տարածքով անցած վեց ամիսների ընթացքում անցել է ավելի քան 500 հազար միգրանտ Սիրիայից, Իրաքից ու այլ երկրներից:

«Սիրիայի կառավարությունը մարդասիրաբար է վերաբերվել այդ մարդկանց: Մեզ շնորհակալ են բոլոր միջազգային կազմակերպությունները, փախստականների հարցերով զբաղվում են Սերբիայի երեք նախարարությունները: Մենք դառը փորձ ենք ունեցել, նկատի ունեմ մեր փախստականներին Սերբիայի Հանրապետությունից ու մեր տարածքի այլ պետություններից, իհարկե Կոսովոյի հարավսերբական երկրամասից: Հենց այդ պատճառով մենք այդ մարդկանց այնքան մարդասիրաբար ենք վերաբերվել»,-ասաց նախարարը:

Սերբ պաշտոնյան ընդգծեց՝ Սերբիան երրորդ եվրոպական երկիրն է, որով անցնում են այդ փախստականները:

«Միայն Սերբիայում են նրանք գրանցվել, մենք դա արել ենք բոլոր միջազգային ակտերին համապատասխան, ցավոք չկա մի այնպիսի բազա, որը հնարավորություն կտար ստուգելու՝ արդյո՞ք նրանց մեջ ահաբեկիչներ կան»,-ասաց նա: