Ձեր վստահելի աղբյուրը

«Հանրաքվեում «այո»-ն հաղթանակ չէ, «ոչ»-ն էլ պարտություն չէ: Սա ընդամենը սահմանադրական փոփոխությունների հանրաքվե է, չի կարելի առճակատման տանել: Դեկտեմբերի 6-ի հանրաքվեն չի կարելի դիտարկել ընդդիմություն-իշխանություն հակասությունների դաշտում»,- լրագրողների հետ հանդիպման ժամանակ ասաց ԱԺ  փոխնախագահ, ՀՀԿ մամուլի խոսնակ Էդուարդ Շարմազանովը՝ պատասխանելով հարցին, թե արդյո՞ք հանրաքվեի տապալումը չի լինի ՀՀԿ-ի տապալում:

Նա նշեց, որ դեկտեմբերի 7-ին, անկախ ամեն ինչից, գնալու են նույն ճանապարհով, պարզապես սահմանադրական փոփոխությունները, եթե անցնեն, ավելի լայն հնարավորություն կընձեռվի, որպեսզի ավելի անվտանգ, կայուն պետություն լինի, երկրում գերակշռող դերակատարում ունենան գաղափարական կուսակցությունները:

Խոսելով «Նոր Հայաստան» հանրային փրկության ճակատի մասին, ով հայտարարել է, որ այսօրվանից սկսում է քաղաքացիական անհնազանդություն, Է.Շարմազանովն ասաց, որ ցանկացած քաղաքացիական նախաձեռնություն կարող է օրենքով սահմանված կարգով իր կարծիքը հայտնել, այդ թվում նաև հանրահավաքների միջոցով:

«Սակայն եթե քո գործողությունները չեն տեղավորվում Հայաստանի օրենսդրության շրջանակներում, բնականաբար, արդեն չի կարող դա ողջունվել: Չեմ ուզում միանգամից ասել, թե այսօրվա հանրահավաքի կազմակերպիչները պետք է գնան անօրինական ճանապարհով: Չեմ ուզում, որ նման բան լինի: Ովքեր իշխանափոխության կոչեր են անում, դա իրենց խնդիրն է: Իհարկե, քննադատությունն անհրաժեշտ է: Բայց իմ քույրերին և եղբայրներին, ովքեր այսօր մասնակցելու են այդ հանրահավաքին, ուզում եմ ասել, որ դեկտեմբերի 6-ի հանրաքվեն իշխանափոխության խնդիր չի լուծում: Մեր երկրում իշխանափոխության, իշխանության ձևավորում լինելու է և պետք է լինի բացառապես ընտրությունների միջոցով: Ով ուզում է գալ իշխանության, թող գա մասնակցի ընտրություններին, հաղթի ընտրություններում, բարով կառավարի: Այլ տարբերակ մեր երկրում չի կարող լինի, հատկապես նման աշխարհաքաղաքական նոր իրողությունների պայմաններում:

Մենք թույլ չենք տա, որպեսզի մեր երկրում արհեստականորեն լարվածություն մտցվի: Իշխանափոխություն կլինի, չի լինի, ամեն ինչը լինելու է 2017 թվականի պառլամենտական ընտրություների միջոցով, բացառապես ընտրության միջոցով, ինչպես նորմալ ժողովրդավարական երկրներում է լինում:

Չի կարելի մեր երկում թշնամիներ փնտրել: Չի կարելի երկրորդ անգամ տանել բախումների, ատելություն սերմանալ: Այդ սխալն արդեն եղել է, նկատի ունեմ նաև 2008 թվականի մարտի 1-ը: Մոբիլիզացիա մեր երկրում կարող է լինել միայն ու միայն պատերազմի ժամանակ:

Աշխարհաքաղաքական, արագ զարգացող իրողությունների պայմաններում, որտեղ անվտանգության գործառույթը դառնում է մեր տարածաշրջանում գլխավորը, ի՞նչ մոբիլիզացիա: Հազիվ Երրորդ Հանրապետություն ունենք, հիմա մենք պետք է սկսենք իրար ուտե՞լ: Իշխանություն ես ուզում՝ արի ընտրություններում հաղթի: Ես ամեն գնով իմ աթոռը չեմ պահում: Թող գան, հաղթեն, իմ աթոռը սիրով կտամ»,- ասաց ՀՀԿ փոխնախագահը:

Ըստ նրա, Հայաստանում այս տարիների ընթացքում պայթյունավտանգ, վատ իրավիճակ չի եղել Հայաստանի նախագահի, ՀՀԿ-ի իմաստուն քաղաքականության շնորհիվ. «Ճիշտ է, նաև արտաքին քաղաքականության արդյունքում այսօր մենք խուսափել ենք այն վատ սցենարներից,  որոնք կան տարբեր պետություններում: Այսօրվա աշխարհում թիվ մեկ մարտահրավերն է դիմակայել վտանգներին: Այսօր մենք դիմակայում ենք հենց այդ ճիշտ քաղաքականության արդյունքում»: