Եթե Ադրբեջանի կողմից սանձազերծվի լայնամասշտաբ պատերազմ, Արցախի անկախությունը ճանաչելու գործընթաց կսկսվի. Քննարկում
«Եթե Ադրբեջանի կողմից սանձազերծվի լայնամասշտաբ պատերազմ, կարծում եմ գործընթաց կսկսվի ոչ միայն փոխօգնության առումով, այլ նաև Արցախի անկախությունը ճանաչելու առումով»,- այս մասին այսօր «Մեդիա կենտրոն»-ում «ԼՂՀ անկախության ճանաչման հնարավոր հետևանքները» թեմայով բանավեճի ժամանակ հայտարարեց ՀՀ Ազգային ժողովի ՀՀԿ խմբակցության քարտուղար Գագիկ Մելիքյանը՝ անդրադառնալով «Արցախի Հանրապետությունը ճանաչելու մասին» ՀՀ օրենքի նախագծի եզրակացությանը հավանություն տալու կառավարության որոշմանը:
Նրա խոսքերով՝ այսօր այդ հարցը քննարկվել է կառավարությունում և սա գործընթացի սկիզբ է, որը հետագայում կարող է քննարկման դրվել Ազգային ժողովում, եթե իրավիճակի լուրջ փոփոխություններ և արտաքին նպաստավոր պայմաններ արձանագրվեն:
ԱԺ «Ժառանգություն» խմբակցության պատգամավոր Թևան Պողոսյանի խոսքերով էլ՝ եկել է ժամանակը, որպեսզի Հայաստանը մեկ քայլ առաջ անի՝ Ադրբեջանին և աշխարհին ապացուցելու, որ երբ մենք ասում ենք պատերազմի վերսկսման դեպքում Հայաստանը ճանաչելու է Արցախի անկախություն, ապա դա չի ասվում ուղղակի ասելու համար:
Նրա խոսքերով՝ նույն կերպ միջազգային հանրությունը երկար ժամանակ չէր հավատում հայկական կողմի նախազգուշացումներին, որ Ադրբեջանը պատրաստվում է ռազմական գործողություններ սկսել:
«Եվ այդ ամենը հանգեցրեց նրան, որ Ադրբեջանը սկսեց ռազմական գործողությունները, և հիմա մենք պետք է ցույց տանք բոլորին, որ ռազմական գործողությունների վերսկսման դեպքում ճանաչելու ենք Արցախի անկախությունը»,- նշեց Թևան Պողոսյանը:
ՀԱԿ արտաքին կապերի պատասխանատու Վլադիմիր Կարապետյանն ասաց, որ Կառավարությունում հարցի ներկայացման ժամանակ որևէ քննարկում չի եղել, հետևաբար, սա որոշում է՝ կայացված նման գործընթաց նախաձեռնելու:
«Հակված եմ կարծելու, որ ականջալուր են լինում Լևոն Տեր-Պետրոսյանի՝ 2008թ. նոյեմբերի հանրահավաքին հնչած այն առաջարկությանն իշխանություններին, որ պատեհ ժամանակն է, որպեսզի ՀՀ Ազգային ժողովը ճանաչի Արցախի անկախությունը, ընթացակարգով ուղարկի նախագահական աշխատակազմ, որն էլ կարող է որոշումն առկախել և օգտագործի այն ժամանակ, երբ դրա կարիքը կլինի: Պարոն Մելիքյանի ասածի մեջ նման տարրեր տեսա: Եթե ինչ-որ մի փուլ անցնի, իսկ մենք տեսանք, որ առաջին փուլը դա կառավարության կողմից նախագծի եզրակացությանը հավանություն տալն է, նախագիծը կարող է գնալ Ազգային ժողով, որտեղ այս թեմայի վերաբերյալ կարող են բովանդակային քննարկումներ լինել: Ես որևէ վտանգ չեմ տեսնում, որ Ազգային ժողովն էլ քննարկի և հանդես գա համապատասխան որոշմամբ»,- ասաց Վլադիմիր Կարապետյանը:
«Մոդուս վիվենդի» կենտրոնի ղեկավար, դիվանագետ Արա Պապյանն էլ նշեց, որ Արցախի անկախությունը ճանաչելու հարցը Հայաստանը մշտապես օգտագործել է Ադրբեջանի վրա ճնշում գործադրելու համար՝ «որպես վերջին փամփուշտ»:
«Կարծում եմ, որ գործընթացն ավելի երկար կլինի՝ հասկանալու համար ընդհանուր զարգացումները, քանի որ իսկապես բոլորը հասկանում են, որ բանակցային ճանապարհով Ղարաբաղի հարցը լուծում չունի: Միևնույն ժամանակ կողմերը չեն ուզում բուն մեղադրանքն իրենց վրա վերցնել, թեև մենք կարող ենք հստակ մեղադրել Ադրբեջանին՝ բազմաթիվ անգամները զինադադարը խախտելու համար»,- ասաց Արա Պապյանը:
Ըստ նրա՝ այն տեսակետները, թե Հայաստանի կողմից Արցախի անկախության ճանաչումը ինչ-որ բացասական հետևանքներ կունենան, մի փոքր չափազանցված է: Նրա խոսքերով՝ Ադրբեջանը լայնածավալ ռազմական գործողություններ չի ձեռնարկում Արցախի անկախությունը ճանաչելու կամ չճանաչելու համար, այլ անում է դա՝ ըստ իր հնարավորությունների, ըստ աշխարհաքաղաքական վիճակի, Հայաստանի ներքին վիճակի, թեև, ըստ նրա, այս ընթացքում հարմար ժամանակ չի և դեռևս կսպասի:
«Ադրբեջանը երկրորդ փորձը կանի, և պարբերաբար, ցավոք, 3-4 կամ մինչև 6 ամիսը մեկ ապրիլյան գործողություններից կանի, մինչև մենք կարողանանք իրենց ինչպես հարկն է պատժել և հասկացնել, որ ամեն նման գործողություններից պատժվելու են: Իրենց զսպման միակ ճանապարհը դա կլինի»,- նշեց Արա Պապյանը:
Հարակից հրապարակումներ`
- Կառավարության եզրակացությունը չի նշանակում հավանություն այդ նախաձեռնությանը. ՀՀ ԱԳՆ
- Եթե Ադրբեջանը նոր ագրեսիա ծավալի, Արցախի ճանաչման հարցը կմտնի օրակարգ. Շավարշ Քոչարյան
- Կառավարությունն ըստ էության դրական եզրակացություն տվեց Արցախը ճանաչելու նախագծին. Զարուհի Փոստանջյան
- Հաստատվեց «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ կառավարության եզրակացությունը
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին