Ես ոչ միայն հավատում եմ, այլև պայքարում եմ հանուն դրա. Արծվիկ Մինասյան
ՀՀ էկոնոմիկայի նախարար Արծվիկ Մինասյանն այսօր կառավարության նիստից հետո լրագրողների հետ զրույցում անդրադառնալով վարչապետի՝ նախորդ շաբաթ տրված հանձնարարականին, նշեց, որ այս փուլում առանձնացրել են այն 10 հիմնական ապրանքատեսակները, որոնք հանրության շրջանում ամենապահանջվածն են և որոնք, ըստ էության, նաև մենաշնորհային ոլորտներ են դիտարկվում հանրության և մասնագիտական շրջանակների կողմից: Դրանք են՝ կարագը, շաքարավազը, ալյուրը, ցորենը, արևածաղկի յուղը, թռչնի միսը, բանանը, նարինջը , դիզվառելիքը, բենզինը:
«Կազմել ենք այդ հուշաթերթերը, ուղարկել ենք Պետական եկամուտների կոմիտե և Սննդի անվտանգության ծառայություն՝ իրենց համաձայնեցումն էլ ստանալու համար: Եթե ստանանք այսօր կամ վաղը, մինչև շաբաթվա վերջ կտեղադրենք Էկոնոմիկայի նախարարության կայքէջում: Կա նաև թեժ գիծ, որ նման ապրանքների մասով այդ փաստաթղթերց դուրս եթե որևէ մարմին, ներառյալ Մաքսային կոմիտեն կամ Պետական եկամուտների կոմիտեի աշխատակիցը լրացուցիչ փաստաթուղթ պահանջի, սա հիմք է, որպեսզի առարկություն ներկայացվի: Իսկ արդեն հաջորդ շաբաթ, երբ կներկայացվի մայիսի 12-ի վարչապետի տված հանձնարակականի կատարման վիճակը, դուք այնտեղ կտեսնեք նաև երկարաժամկետ լուծումները՝ կարճաժամկետ լուծումներով հանդերձ»,- ասաց Արծվիկ Մինասյանը:
Հարցին, թե մենաշնորհների հետ կապված անուններ կհնչեցնեն, նախարարը պատասխանեց. «Ինչպես խոստացել եմ՝ կլինեն այն բոլոր տվյալները, որոնք մենաշնորհային ոլորտներում, թեև առանձին ոլորտներում դրանք օրենքով մենաշնորհ չեն համարվում, բայց փաստացի ընկալումն այդպիսին է, նաև այդ ոլորտներում մեզ հասանելի տեղեկատվության շրջանակներում կհրապարակենք նաև կազմակերպություններին, որոնք ունեն գերիշխող դիրք կամ կենտրոնացվածության բարձր աստիճան»:
Հարցին, թե գազի և էլեկտրաէներգիայի ոլորտում արդյոք տեսնում են մենաշնորհ, Արծվիկ Մինասյանը նշեց, որ այդ ոլորտներում բնական մենաշնորհ է: «Լուծումների մասին ես առաջարկում եմ հաջորդ շաբաթ, երբ որ զեկույցը կլինի, մանրամասն խոսենք, քանի որ կան թե կարճաժամկետ լուծումներ, թե երկարաժամկետ»,- ասաց նա և անդրադառնալով կարճաժամկետ լուծումներին՝ նշեց, որ առաջին կարևոր խնդիրը համարում են տեղեկատվության հասանելիության խնդիրը:
Հարցին, թե նախկինում մենաշնորհների դեմ պայքար չկա՞ր, Արծվիկ Մինասյանը պատասխանեց. «Դժգոհություն միշտ էլ եղել է, հիմա հանձնարարական կա, որպեսզի իրականացվեն կոնկրետ քայլեր, դուք դժգո՞հ եք դրանից: Եթե նախկինում լիներ, այդ հարցն այսօր չէր առաջանա, չէ՞: Եթե 20 տարի առաջ նորմալ ընտրություն էլ լիներ, այսօր դուք շատ բաներից էլ չէիք բողոքի, չէ՞: Հիմա ի՞նչ անենք, եթե ուզում ենք լավ ընտրություն անել, բողոքենք, թե ինչո՞ւ 25 տարի առաջ չե՞ք արել»:
Ըստ էկոնոմիկայի նախարարի՝ սահմանադրական նոր կարգավորումներին համապատասխան պետք է իրականացվի ամբողջական վերանայում բոլոր քաղաքականությունների ուղղություններով: «Հիմա փոխանակ մենք բոլորս կարողանանք միավորվել և այդ քաղաքականությունը կյանք դարձնել, հենց մի լավ բան է փորձ արվում անել, սկսում եք քննադատել, թե նախկինում ինչո՞ւ չէր արվում»,- ասաց Արծվիկ Մինասյանը:
Դիտարկմանը, թե նախարարը հավատո՞ւմ է, որ այս իշխանության օրոք հնարավոր է կյանքի կոչել այս ամենը, նախարարը նշեց. «Իհարկե, որովհետև ես էլ եմ իշխանություն: Ես ոչ միայն հավատում եմ, այլև պայքարում եմ հանուն դրա»:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին