Ձեր վստահելի աղբյուրը

Վրաստանի խորհրդարանը երեկ առաջին ընթերցմամբ ընդունել է սահմանսդրական փոփոխությունների նախագիծը, որով առաջարկվում է ամուսնությունը սահմանել որպես տղամարդու և կնոջ միություն:

Վրացական լրատվամիջոցների հաղորդմամբ,  առայժմ հայտնի չէ, թե երբ այդ նախագիծը կդրվի քվեարկության:

«Սահմանադրությունում յուրաքանչյուր փոփոխության ընդունման համար անհրաժեշտ է նվազագույնը 113 պատգամավորի աջակցություն, քվեարկությունը չի կարող տեղի ունենալ, թե նիստերի դահլիճում չապահովվի այդքան պատգամավորների ներկայություն»,-մանրամասնում է աղբյուրը:

Այս պահին ընդդիմադիր «Ազգային շարժում» կուսակցությունը բոյկոտ է հայտարարել, այդ ուժի ներկայացուցիչները նիստերի դահլիճը  ի նշան բողոքի լքել են մայիսի 25-ին: Նրանք հայտարարել են, թե նիստերին չեն մասնակցի այնքան ժամանակ, քանի դեռ չեն բացահայտվել ու պատժվել մայիսի 22-ին՝ ՏԻՄ ընտրությունների ժամանակ Կորցխելի գյուղում տեղի ունեցած միջադեպի կազմակերպիչներն ու մասնակիցները:

Ըստ վրացական օրենսդրության, սահմանադրական փոփոխություններն ընդունվում են երեք ընթերցմամբ, ընդ որում առաջին երկու ընթերցմամբ ընդունվում են մի նստաշրջանի, իսկ երրորդ ընթերցմամբ՝ հաջորդ նստաշրջանի ընթացքում: «Վրացական երազանք»-ի ներկայացուցիչները չեն բացառում հանրաքվեի անցկացումը, եթե խորհրդարանը չընդունի առաջարկվող փոփոխությունները:

 Հայաստանի բարեփոխված Սահմանդրություն հոդված 16-ն  ընտանիքի պաշտպանության մասին է: Այն սահմանում է.
«Ընտանիքը, որպես հասարակության բնական և հիմնական բջիջ, բնակչության պահպանման և վերարտադրման հիմք, ինչպես նաև մայրությունը և մանկությունը պետության հատուկ պաշտպանության և հովանավորության ներքո են»:

Ամուսնանալու ազատության մասին Հոդված 35-ը սահմանում է.

«1. Ամուսնական տարիքի հասած կինը և տղամարդը միմյանց հետ իրենց կամքի ազատ արտահայտությամբ ամուսնանալու և ընտանիք կազմելու իրավունք ունեն: Ամուսնության տարիքը, ամուսնության և ամուսնալուծության կարգը սահմանվում են օրենքով:
2. Ամուսնանալիս, ամուսնության ընթացքում, ամուսնալուծվելիս կինը և տղամարդն ունեն հավասար իրավունքներ»: