Ձեր վստահելի աղբյուրը

«Մեր ամենակարևոր հաղթաթուղթը լինելու է համբերությունը և նպատակի սահմանումն ու նրան հասնելը»,- Երևանում տարբեր բարձրագույն ուսումնական հաստատություններ երթով այցելելուց հետո Հանրապետության հրապարակում հայտարարեց Տավուշի թեմի առաջնորդ Բագրատ արքեպիսկոպոս Գալստանյանը։

Բագրատ Սրբազանն ասաց, որ ժամը 18։30-ին Հանրապետության հրապարակում  զրույց կունենան, կխոսեն առաջիկա բոլոր հնարավոր  քայլերի մասին։

«Այսօր շատ ընտիր օր է եղել։ Այսքան երիտասարդություն։ Շնորհակալ եմ, որ ուսանողներն արձագանքեցին ու դասադուլ արեցին, վստահ եմ՝ երկուշաբթի օրվանից էլ ավելի մեծ թափով է լինելու։ Մենք հանգիստ վիճակով ենք շարժվելու, չենք ձանձրանալու, չենք հոգնելու, չենք տրտնջալու, իրար քաջալերելու ենք, իրար վստահելու ենք, օգնելու ենք, քայլ առ քայլ դեպի նպատակն ենք ընթանալու։

Մենք ձեզ հետ, ուսանողներ ջան, կարևոր գործ ունենք անելու, որի մասին երեկոյան կխոսենք։

Երկրորդ, ուղղակի բացահայտվել են շատ բարձրակարգ դասախոսներ, պրոֆեսորներ, որոնք գրասեղանի հետևում այլ բան են սովորեցնում, կյանքով, իրենց վարքագծով՝ այլ բան են ասում։  Օրինակ, Բրյուսովի անվան համալսարանի ռեկտորը, իմ ճանաչած Դավիթ Գյուրջինյանը, ինստիտուտի դուռը փակել են, որպեսզի ուսանողներն ինքնակամ իրենց կամքը չհայտնեն, բռնացել է ազատ կամքի վրա։ Բայց ի՞նչ ես սովորեցել, Դավիթ Գյուրջինյան, սովորեցրել ես հայոց լեզու, հայրենիք սիրել։ Ես այդպես եմ քեզ ճանաչել։ Չեմ կարծում, որ գայթակղիչ պաշտոն ունենալու հանգամանքը ձեզ փոխել է։ Չեմ ուզում որևէ ձևով թշնամություն ստեղծել ձեր հանդեպ, բայց ձեր արածը ճիշտ չէ, դուք էլ գիտեք, որ ճիշտ չէ»,- ասաց Բագրատ Սրբազանը։

Նա հայտարարեց, որ Հայաստանի տարբեր վայրերում նույնպես անհնազանդության գործողություններ է կատարվել այսօր։

«Այսպես շարունակ է լինելու։ Բայց հիմա պետք չի փողոց փակել, հիմա հանգստանալու ժամ է։ Ես էլ, որպեսզի չասեն գնաց Ռոբերտ Քոչարյանին հանդիպելու, ասեմ՝ ուղղակի գնալու եմ վիրակապերս փոխեմ այնտեղ կանգնած մեքենայի՝ վագոնի մեջ»,- ասաց Սրբազանը։

Նա կրկին հայտարարեց, արձագաքնելով լուրերին, որ վարչապետ դառնալու ցանկություն, ձգտում, մղում չունի։

«Իմ հոգևոր ծառայությունը Տավուշում մի երեք աստիճան ավելի բարձր է, քան այնտեղ նստող աթոռը։

Ուրեմն այս մարդիկ կյանքը չափում են իրենց աթոռներով։ Պատահական ընկել են այդ աթոռի վրա, կարծում են՝ իրենց տնից են բերել, իրենց տուն էլ տանելու են»,- ասաց Բագրատ Սրբազանը։

Նա իր խոսքում նաև նշեց. «Երեկ ինչ-որ տեղի է ունեցել այս հրաարակում, դա մեծագույն ուղերձն էր, ազդակն էր, թե ինչպես է ապրում մեր ժողովուրդը և ինչ է ուզում։ Սա մեծագույն ազդակն է  եղել, բայց դա միայն սկիզբն է։ Մի շփոթեք, որ դա վերջն էր։ Գիտեմ՝ որոշ մարդիկ շուտ հուսահատվում են, կգա ժամանակը նաև ձեր պատկերացրած գործողությունների»։