Ձեր վստահելի աղբյուրը

Արարատի մարզի Քաղցրաշեն համայնքի բնակիչներն այսօր կառավարության շենքի մոտ դարձյալ բողոքի ակցիա էին անում՝ պահանջելով  2015 թվականին մթերած, սակայն, մինչ այժմ չստացած խաղողի գումարները:

Կառավարության նիստից առաջ և հետո գյուղացիներին մոտեցավ ՀՀ գյուղատնտեսության նախարար Իգնատի Առաքելյանը:

Քաղցրաշենցիներն իրենց խնդիրները փոխանցեցին գյուղատնտեսության նախարարին՝ ասելով, թե «ինչի ՞ մեզ բերեցիք, էս դռները»:

Հիշեցնենք, որ քաղցրաշենցիների խաղողը մթերել էր  «Վինար» ընկերությունը: ՀՀ գյուղատնտեսության նախարարությունը գյուղացիական տնտեսությունների նկատմամբ ունեցած պարտավորությունները չկատարելու համար «Վինար» ընկերության պատասխանատվության ենթարկելու համար դիմել էր ՀՀ գլխավոր դատախազություն: Մթերման պարտքերը մարելու նպատակով՝ ընկերության սպիրտը  բռնագանձվել և կապարակնքվել էր:

Իգնատի Առաքելյանը նշեց՝  դատախազությունը պարզել է, որ «Վինար» ընկերության սպրիտը խաղողի չէ. «Կա սպիրտ, որը խաղողի չի, առնող էլ չկա»:

Նա գյուղացիներին առաջարկեց սպիրտը վերցնել, սակայն, քաղցրաշենցիները հրաժարվեցին: 

«Սպիրտը վերցնենք ի՞նչ անենք: Տվեք մեր փողերը, վարկերը չենք կարողանում փակել»,- ասացին տուժած գյուղացիները:

Այդ ընթացքում գյուղացիները նաև կատակեցին՝ ասելով, թե պետք է «Վինար»-ի  տնօրենին պաշտոն տան, որպեսզի իրենց պարտքերը կարողանա մարի, նախարարն էլ առաջարկեց, որ նրան տանեն իրենց այգիներում աշխատեցնեն:

«Բա ես կթողնե՞մ իմ այգում անգրագետ մարդն աշխատի,  կոմպյուտեր, անգլերեն չիմանա՞»,- նշեց գյուղացիներից մեկը:

Լրագրողների հետ զրույցում էլ գյուղատնտեսության նախարարն ասաց, որ պետք է վարչապետի, իրավապահ մարմինների հետ քննարկում անեն, հասկանան՝ ինչ լուծում են տալիս այս խնդրին:

«Լծակ կա ազդելու, բայց գումարը տալու լծակ չկա», -  նշեց Իգնատի Առաքելյանը:

Հարցին, թե չի՞ կարծում, որ ստեղծված իրավիճակը հետևանք է նրա, որ ժամանակին  կառավարությունը ստիպեց խաղողագործներին մթերել խաղողը՝ ասելով «ընդունեք, մենք տեր ենք», Իգնատի Առաքելյանը պատասխանեց. «Դե ով ստիպել է, թող տեր կանգնի»։

Դիտարկմանը՝  նախկին վարչապետ Հովիկ Աբրահամյանն էր ստիպե՞լ, արձագանքեց. «Ես չգիտեմ, եթե ստիպել են, ուրեմն թող տեր կանգնեն, ինչ ասեմ: Ես իրենց չեմ ստիպել, չեմ ասել՝ գնացեք ու վաճառեք: Այդ ընկերությունը ոչ լիցենզիա ուներ, ոչ մի բան, ես զարմանում եմ՝ ինչի՞ են խաղողն իրան հանձնել: Առաջին անգամ է ընկերությունը գնում կատարել: Ով ստիպել է, թող հիմա տեր կանգնի»: 

Իգնատի Առաքելյանը մեկ անգամ ևս շեշտեց, որ «Վինարի» հետ կապված ամեն ինչ անօրինական է՝ ոչ լիցենզիա ունի, ոչ էլ սպիրտ, դրա համար էլ իրենք դիմել են իրավապահ մարմիններին:

«Այս իրավիճակից ելք չկա: Եթե մի քաղաքացին խաբում է մյուսին ու ինքը ոչինչ չունի, ապա ի՞նչ ելք կա: Դատարան ենք տվել, կգնա կդատվի, հետո՞: Ելքը ո՞րն ա: Քաղցրաշենցիների ցակությունը փող ստանալն է: Պետության լծակն էլ այն է, որ ասեն՝ եկեք մենք էդ փողը վերցնենք տանք «Վինար»-ի փոխարեն: Դա ճի՞շտ է: Եթե կառավարությունն այսօր «Վինար»-ի փոխարեն քաղցրաշենցիների փողը տա, դա ճի՞շտ է: Էդ դեպքում ինչի՞ բոլորին չտանք էդ փողերը, որոնք չեն ստացել: Սա բիզնես միջավայր է, որտեղ մեկը մյուսին խաբել է»,- ասաց Իգնատի Առաքելյանը:

Նախարարը հայտնեց, որ «Վինար»-ի պարտքը գյուղացիներին կազմում է մոտ 70 մլն դրամ: