Կապիտալի աճը մեծ ազդեցություն է ունեցել բանկային համակարգի կայունության բարձրացման վրա. ԿԲ ներկայացուցիչ
ՀՀ կենտրոնական բանկի ֆինանսական կայունության ապահովման քաղաքականությունը 2016 թվականի ընթացքում միտված է եղել ֆինանսական համակարգի կայունության ամրապնդմանը և ռիսկերի նկատմամբ ճկունության բարձրացմանը: Այս մասին այսօր լրագրողների հետ հանդիպման ժամանակ ասաց ՀՀ կենտրոնական բանկի ֆինանսական համակարգի կայունության և զարգացման վարչության պետ Անդրանիկ Գրիգորյանը` ներկայացնելով 2016թ-ի ֆինանսական կայունության հաշվետվությունը:
Նրա խոսքերով՝ ԿԲ-ի կողմից նորմատիվային ընդհանուր կապիտալի սահմանաչափի բարձրացման պահանջը հաջողությամբ բավարարվել է Հայաստանում գործող բանկերի կողմից, ինչի շնորհիվ բարելավվել են բանկային համակարգի կապիտալացվածության ու իրացվելիության ցուցանիշները:
Անդրանիկ Գրիգորյանը հայտնեց, որ 2015-2016թթ-ի ընթացքում առևտրային բանկերը համալրել են նորմատիվային կապիտալը, իրականացվել են բանկերի ձեռքբերումների ու միացումների չորս գործարքներ: Արդյունքում, ըստ նրա, բանկային համակարգի կապիտալն էական աճ ունեցավ, որը բավական ազդեցություն ունեցավ բանկային համակարգի կայունության բարձրացման վրա:
Անդրադառնալով բանկային համակարգի առջև ծառացած մարտահրավերներին՝ Անդրանիկ Գրիգորյանն ասաց, որ դրանք հիմնականում արտաքին շուկայից բխող ռիսկերն էին, որոնց ազդեցությունը փոքր-ինչ թուլացել էր, բայց դեռևս բացասական ազդեցությունը համակարգի վրա շարունակվում էր՝ հաշվի առնելով թե տարածաշրջանում, թե համաշխարհային տնտեսության դանդաղ աճի տեմպերը: «Դրանք, բնականաբար, իրենց ազդեցությունն ունեցան դեպի Հայաստան դրամական հոսքերի, ինչպես նաև Հայաստանի հետ գործընկեր երկրների տնտեսական հարաբերությունների վրա»,-ասաց նա:
Այնուամենայնիվ, ըստ վարչության պետի, նման մարտահրավերների պարագայում, որպեսզի մեր բանկային համակարգը կարողանա շատ ավելի կայուն դիմակայել հնարավոր և պոտենցիալ ռիսկերին, դեռևս 2014-ի վերջին կայացվել էր որոշում՝ մեծացնել բանկային համակարգի կապիտալի նվազագույն չափը: «2015-16 թվականների ընթացքում ունեցանք 175-180 մլրդ դրամի կապիտալի ներհոսք ֆինանսական համակարգ, որի գերակշիռ մասը` 150 մլրդ դրամ, տեղի ունեցավ 2016 թվականի ընթացքում, ինչն էականորեն բարձրացրեց տարածաշրջանում մեր բանկային համակարգի մրցունակությունը և երկարաժամկետ ժամանակահատվածում տնտեսությունը սպասարկելու ունակությունը»,- ասաց Անդրանիկ Գրիգորյանը:
Նրա խոսքերով՝ դա ազդեց նաև բանկային համակարգի իրացվելիության վրա, ինչը բերեց նրան, որ ներկայումս ունենք բանկային համակարգ, որը տարածաշրջանում ամենաիրացվելիներից մեկն է: «Դա կարևոր ցուցանիշ է տնտեսության կայունությունը գնահատելու համար, քանի որ կարճ ժամանակահատվածում ունակ է սպասարկել տնտեսությանը»,-ասաց նա ՝ հավելելով, որ Հայաստանում 2016 թ-ին կապիտալի համարժեքության միջին ցուցանիշը կազմել է 20 տոկոս, ինչը բանկային համակարգում կապիտալ նոր ներդրումների արդյունք է:
Ֆինանսական համակարգի կայունության և զարգացման վարչության պետը նաև հայտնեց, որ 2016թ-ին արձանագրվել է թե՛ վարկերի, թե՛ ավանդների բարձր աճ՝ նախորդ տարիների համեմատ: Դա, ըստ նրա, խոսում է բանկերի և ֆինանսական համակարգի նկատմամբ հանրության վստահության բարձրացման մասին:
Անդրանիկ Գրիգորյանի խոսքերով՝ այս ամենի արդյունքը պայմանավորված է նրանով, որ ԿԲ-ն շարունակել է տոկոսադրույքների նվազման դինամիկան: «Թե դրամային, թե արտարժութային վարկերի տոկոսադրույքները վերջին տասնյամյակում շարունակել են կայուն կերպով նվազել: 2015-ին որոշակի աճ կար ավանդների տոկոսադրույքների մասով, սակայն 2016 թ-ին ճշգրտում եղավ»,-ասաց վարչության պետը:
Նա նաև հայտնեց, որ բանկային համակարգի արդյունավետության տեսանկյունից նվազել է չաշխատող ակտիվների տեսակարար կշիռը բանկային համակարգում և համակարգը տարին ամփոփել է շահույթով:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին