Ծրագրերը չկատարելու կամ ձախողելու համար ՀՀ որևէ կառավարություն պատասխանատվության չի ենթարկվել
Կառավարության 2017-2022 թվականների ծրագիրն իրատեսական ծրագիր է՝ հնարավորությունների սահմանում։ Բայց «հնարավորություններ» ասվածը խիստ պայմանական են, որովհետև մեր հնարավորությունները շատ ավելի մեծ են։ Panorama.am-ի թղթակցի հետ զրույցում նման տեսակետ հայտնեց տնտեսագետ Թաթուլ Մանասերյանը։
«Ես հարգանքով եմ վերաբերում վարչապետ Կարեն Կարապետյանին, որն իրեն դրսևորել է որպես բանիմաց և ազգային մտածողությամբ մարդ, հմուտ կառավարիչ։ Բայց միայն դա բավական չէ կառավարության ծրագիրն իրագործելու համար։ Բացառությամբ 2-3 նախարարների՝ մնացածները բավական երկար ճանապարհ ունեն անցնելու։ Կառավարության անդմաների մեծ մասը կատարողներ են, նրանցից շատ քչերն են նախաձեռնող և նախահարձակ։ Նրանցից քչերն են իրենց առջև լուրջ նպատակներ դնում։ Ներկա կազմն այն կազմը չէ, որ կկարողանա հավակնոտ ծրագրեր իրագործել»,- ասաց մեր զրուցակիցը։
Թաթուլ Մանասերյանի խոսքով, կառավարության ծրագրի մշակման ժամանակ ընտրությունը պետք է կատարել լավի և լավագույնի, ոչ թե վատի և վատագույնի միջև։
Տնտեսագետը նկատեց, որ կառավարության 2017-2022 թվականների ծրագրում տեղ են գտել իր կողմից ներկայացված ծրագրից հատվածներ։
«Ես ուրախ եմ, որ կառավարությունը վերջապես ընդունել է դիագնոստիկա՝ ախտաճանաչում անելու իմ առաջարկը։ Բայց դրանից բացի՝ պետք է նաև հաշվառում իրականացնել՝ իմանալու՝ ով է ծրագրի կատարողը»,- նկատեց տնտեսագետը։
Մեր զրուցակիցը կառավարությանը հորդորեց օբյեկտիվ մրցույթներ անցկացնել և ընտրել լավագույններին, ոչ թե աշխատանքի ընդունել ծանոթներին։
Թաթուլ Մանասերյանից հետաքրքրվեցին՝ ինչպես կգնահատի կառավարության նախորդ տարիների ծրագրերի կատարողականության մակարդակը։ Վերջինս ի պատասխան նկատեց՝ անկախության տարիներին ծրագրերը չկատարելու կամ ձախողելու համար որևէ կառավարություն պատասխանատվության չի ենթարկվել։
«Կառավարություներից մեկն ասել է՝ ճգնաժամ է, մյուսն ասել է՝ ԽՍՀՄ-ը փլուզվեց և այսպիսով արդարացրել ծրագիրը չկատարելը, բայց որևէթ մկն այդպես էլ պատասխանատվություն չի կրել։ Հակառակը, իրենց ոլորտները ձախողած նախարարները տեղափոխվել են այլ աշխատանքի»,- նկատեց տնտեսագետը՝ հավելելով, որ մինչև պատասխանատվության ինստիտուտը չկիրառվի, հաջողություն չպետք է ակնկալել։
Հարակից հրապարակումներ`
- ԱԺ-ն ընդունեց կառավարության 2017-2022 թթ. ծրագիրը
- Խոսրով Հարությունյան. Կառավարության ծրագրի հիմնական մեխը համակարգային բնույթի բարեփոխումներն են
- Նաիրա Զոհրաբյան. Կառավարության ծրագրին «Ծառուկյան» դաշինքը դեմ կքվեարկի
- Վարչապետ. Մինչ այժմ իրականացրել ենք այն ամենը, ինչ նախատեսել ենք
- «Կյանքի որակ փոփոխող ծրագիր է». ԱԺ-ում քննարկվում է կառավարության ծրագիրը