Թևան Պողոսյանը՝ ՀՀ ՔՀԿ‐ների հակակոռուպցիոն կոալիցիայի կառավարման խորհրդի նախագահ
Հայաստանի քաղաքացիական հասարակության կազմակերպությունների (ՔՀԿ) հակակոռուպցիոն կոալիցիայի երրորդ համաժողովի և այնուհետև կառավարման խորհրդի նիստի ընթացքում ընտրվել եբ Կոալիցիայի կառավարման խորհրդի նոր անդամներ և նախագահ: Հուլիսի 21‐ին կայացած համաժողովին Իրավաբանների հայկական ասոցիացիայի նախագահ, Կոալիցիայի քարտուղարության համակարգող Կարեն Զադոյանը ներկայացրել է վերջին մեկ տարվա ընթացքում կատարված աշխատանքները:
Իրավաբանների հայկական ասոցիացիայի տեղեկացմամբ, մասնավորապես, նախորդ տարվա երկրորդ կիսամյակում Կոալիցիան կառավարությանը ներկայացրել էր 6 կետից բաղկացած առաջարկություններ, և համագործակցությամբ իրականացվել են դրանց մի մասն ամբողջությամբ (օրինակ, քրեականացվել է ապօրինի հարստացումը), մյուս մասը՝ մասնակի և մյուս մասի ուղղությամբ կատարվում են քայլեր:
Անդրադառնալով հակակոռուպցիոն անկախ մարմին ստեղծելու հարցին, Կարեն Զադոյանը նշել է, որ այս մարմնի վերաբերյալ իրավական ակտերը մշակվել են կառավարության ու քաղաքացիական հասարակության երկխոսության արդյունքում։ Սեղանին դրված անկախ մարմնի երկու մոդելներից գործադիրը ընտրել է կանխարգելիչը, թեև Կոալիցիան հակված է եղել ունիվերսալ մոդելի ընտրությանը, որն իրականացնում է ոչ միայն կանխարգելիչ ու կրթական, այլև իրավապահ գործառույթներ։
Այդուհանդերձ, կառավարությունը 2017‐2022թվականների իր ծրագրում նախատեսել է նաև ունիվերսալ մոդելի ուսումնասիրության հարցը. «Մենք մեր ջանքերը պետք է ուղղենք այն բանին, որ ամենաուշը 2018 թվականին, երբ կսկսի կանխարգելիչ հակակոռուպցիոն մարմինը գործել, զուգահեռ ունենանք կոռուպցիոն հանցագործությունները քննող մեկ միասնական քննչական մարմին, հակառակ դեպքում մենք կարող ենք լուրջ արդյունքներ չարձանագրել»։
Կոալիցիայի ներկայացրած առաջարկներից իրական սեփականատերերի բացահայտման ինստիտուտը ներդրվել է մասնակի՝ միայն պետական գնումների ոլորտում: Պետական գնումների մրցույթում հաղթող ընկերությունը այսուհետև ներկայացնում է հայտարարություն՝ ընկերության իրական սեփականատերերի վերաբերյալ: Սակայն բաց է մնում իրական սեփականատերերի բացահայտման կարգավորումը տնտեսական մրցակցության ոլորտում:
Առաջարկների թվում է եղել նաև հակակոռուպցիոն կենտրոնների վերագործարկումը: Կ. Զադոյանը հիշեցրել է, որ այդ կենտրոնները գործարկվել են 2011‐2014 թվականներին և նույն ժամանակաշրջանում Կոռուպցիայի ընկալման համաթվով Հայաստանը դրական տեղաշարժ է ունեցել, ինչը չի նկատվել վերջին 3 տարիներին։ Ուստի, Կոռուպցիայի դեմ պայքարի խորհրդում առաջարկ է եղել քայեր ձեռնարկել այդ կենտրոնների վերագործարկման ուղղությամբ, եղել է վարչապետի համապատասխան հանձնարարականն, ու սպասվում է, որ կհայտարարվի բաց մրցույթ՝ այդ կենտրոնների գործարկման համար։
Կարեն Զադոյանի զեկուցումից հետո Կոալիցիայի անդամները ընտրել են կառավարման խորհրդի անդամներին, որից կառավարման խորհրդի նորընտիր անդամներն ընտրել են ընտրվեց խորհրդի նախագահին։ Այս պաշտոնում ընտրվել է «Մարդկային զարգացման միջազգային կենտրոնի» նախագահ Թևան Պողոսյանը:
«Կոալիցիան այն ինստիտուտն է, որ ներկայումս գիտակցված ըմբռնումով ու մոտեցումով կարողանում է առնվազն խնդիրը բարձրաձայնել ու տեղ հասցնել որոշումներ կայացնողների առջև, ինչպես իրականացնել քայլեր, որ որոշումներ կայացնողները չշարունակեն այնպես, ինչպես նրանք են ցանկանում ու հաշվի նստեն Կոալիցիայի հետ»,‐ ասել է նորընտիր նախագահ Թևան Պողոսյանը։
Անդրադառնալով Կոալիցիայում իր ծրագրերին, նա հատուկ կարևորել է անպատժելիության դեմ պայքարը, նշել նաև, որ հակակոռուպցիոն պայքարում հաջողության հասնելու համար պետք է քայլեր ձեռնարկել այն կանխարգելելու և հասարակությանը կրթելու ուղղությամբ:
Հայաստանի Քաղաքացիական հասարակության կազմակերպությունների հակակոռուպցիոն կոալիցիա. հիմնադրվել է Իրավաբանների հայկական ասոցիացիայի նախաձեռնությամբ 2014թ.‐ի նոյեմբերի 28‐ին, որին անդամակցում է շուրջ 95 ՔՀԿ‐ներ` Երևանից և ՀՀ մարզերից: Կոալիցիան հիմանադրվել է Եվրոպական Միության աջակցությամբ:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան