Ձեր վստահելի աղբյուրը

Երևանի ավագանու «Երկիր ծիրանի» խմբակցության անդամները հուլիսի 3-19 ընկած ժամանակահատվածում եղել են Երևանի 12 վարչական շրջաններում, հանդիպում-քննարկումներ ունեցել բնակիչների հետ: Այսօր կայացած մամուլի ասուլիսի ժամանակ այս մասին տեղեկացրեց խմբակցության անդամ Սոնա Աղեկյանը՝ հավելելով, որ բնակիչների մի ստվար զանգված դժգոհել է նախադպրոցական կրթության ոլորտին առնչվող խնդիրներից:

«Երևանում նախադպրոցական կրթության իրավունքը մատչելի է ընդամենը 30 հազար 953 երեխայի, իսկ 30 հազարից ավելի երեխա չի օգտվում կրթություն ստանալու իր իրավունքից: Ինչ վերաբերում է մանկապարտեզների մանկավարժական կազմին, ապա դաստիարակչուհիները ստանում են ընդամենը 79 հազար դրամ աշխատավարձ: Երեխաների խմբերը մեծ են, աշխատավարձը՝ ցածր: Հետևաբար, շատ դեպքերում հնարավոր չէ մեղադրել՝ ինչու, օրինակ, նույն  դաստիարակչուհին երեխաներին ՀՀ պետական օրհներգը չի սովորեցնում»,- նշեց նա:

«Բարև Երևան» խմբակցության անդամ Մարինա Խաչատրյանն էլ ընդգծեց, որ հանդիպումների ընթացքում բնակիչները հիմնականում բողոքել են իրենց հաշմանդամության կարգերից զրկելու, տարբեր տեսակի բժշկական գործիքների ձեռքբերման նպատակով վճարելու փաստից:

«ՀՀ կառավարությունը բժշկական ոլորտը վերածել է բիզնեսի: Այլ խնդիր է բժիշկների շրջանում հսկայական ծավալների հասնող արտագաղթը: Արդեն ուսանողության տարիներից ապագա բժիշկները օտար լեզուներ են սովորում՝ արտագաղթելուց հետո օտար երկրներում ավելի լավ ադապտացվելու համար»,- ասաց նա:

Երևանի ավագանու «Երկիր ծիրանի» խմբակցության անդամ Ստելլա Աղաջանյանն իր հերթին փաստեց՝ Երևանի բոլոր 12 վարչական շրջաններ այցելությունները ցույց տվեցին, որ ազգաբնակչության սոցիալական վիճակն անկասելիորեն վատանում է:

«Յուրաքանչյուր երկրորդ քաղաքացի փող խնդրելու ճանապարհներ է փնտրում: Մինչդեռ Երևանի քաղաքապետարանում անհարկի պաշտոնները մսխում և թալանում են քաղաքի բյուջեն: Քաղաքապետարանում աշխատող մոտ 2 հազար աշխատողների աշխատավարձերի վճարման նպատակով ամսական բյուջեից հատկացվում է 1 միլիոն դոլար»,- նշեց նա:

Խմբակցության անդամները շեշտեցին՝ սարսափելի վիճակում է նաև վերելակային տնտեսությունը՝ անսարք, հնամաշ և շահագործման համար անպիտան: Նրանք նույնիսկ կեսկատակ հավելեցին՝ երթուղային կամ վերելակ նստելուց առաջ խաչակնքվում են, քանի որ վստահ չեն՝ արդյոք ապահով տեղ կհասնեն: