Ձեր վստահելի աղբյուրը

ՀՀԿ-ն պատրաստ է Ընտրական օրենսգրքի շուրջ քննարկումներ ծավալել: Լրագրողների հետ զրույցում այսօր այս մասին ասաց ԱԺ փոխնախագահ Էդուարդ Շարմազանովը:

«Կարծում եմ՝ կլսենք և կանենք առաջարկություններ: Կլինեն շատ լուրջ քննարկումներ, դրանից հետո մենք կգանք մեր վերջնական որոշմանը: Ես մնում եմ իմ կարծիքին, որ համամասնական տարածքային ցուցակներն ավելի ժողովրդավարական են, քան համամասնական բաց ցուցակները: Իմ խորին համոզմունքն այն է եղել, որ այպես կոչված ռեյտինգային համակարգը խոչընդոտ չի եղել»,- ասաց նա՝ հավելելով, որ թեև ընդդիմություն են վարչապետ Նիկոլ Փաշինյանի կառավարությանը, սակայն գոտկատեղից ներքև հարվածներ չեն հասցնելու:

Անդրադառնալով արտահերթ խորհրդարանական ընտրությունների թեմային՝ Էդուարդ Շարմազանովը նկատեց, որ նման զարգացումների համար անհրաժեշտ է իրավական և քաղաքական հիմնավորում, որն այս պահին ինքը չի տեսնում:

Ինչ վերաբերում է ԱԱԾ պետի՝ աղմկահարույց բացահայտումների վերաբերյալ խոստումին, ԱԺ փոխնախագահը նկատեց, որ անձամբ իր մասով մտահագություններ չունի: «Որևէ ապօրինության, կոռուպցիոն սխեմաների մեջ չեմ եղել ու չկամ: Բիզնեսն ապօրինություն չեմ համարում, բայց վերջին 12 տարվա ընթացքում 24-ժամյա ռեժիմով զբաղվել եմ քաղաքականությամբ: Ցավոք սրտի, թե բարեբախտաբար՝ բիզնես չունեմ: Ինձ համար արտոնյալներկամ ոչ արտոնյալներ չկան, կան օրինավոր կամ օրենքը խախտող քաղաքացիներ»,- ասաց հանրապետական պաշտոնյան:

Էդուարդ Շարմազանովը նաև ընդգծեց, որ ՀՀԿ-ի ընդդիմություն դառնալը շատ նորմալ է. քաղաքական ուժն ամբողջ կյանքի ընթացքում չի կարող միայն իշխանություն լինել: «Մեջբերեմ Աշոտ Նավասարդյանին. Հանրապետական կուսակցություն գալիս են՝ գաղափարներ, համոզմունքներ և եթե պետք է՝ անգամ կյանքը տալու,  բայց ոչ երբեք՝  պաշտոն ստանալու: Միաժամանակ, բոլոր ճանապարհները պետք է անցնեն այն քաղաքական ուժի առջևով, որն ունի պառլամենտական մեծամասնություն»,- ասաց նա:

Հարցին՝ ՀՀԿ-ն կրկին պատրա՞ստ է պայքարելու իշխանություն դառնալու համար, Շարմազանովը կեսկատակ պատասխանեց՝ եթե կուսակցությունը չի ցանկանում գալ իշխանության, այն ՍՊԸ կամ ԲԲԸ է: «Եթե քաղաքական ուժն իր առջև խնդիր չի դրել մի օր դառնալ իշխանություն, ուրեմն դա կուսակցություն չի. դա կամ ֆուտբոլի թիմ է, կամ էլ գարեջրի սիրահարների միություն»,- ասաց ԱԺ փոխնախագահը:

Նա միաժամանակ շեշտեց, որ խորհրդարանի վերահսկողական մեխանիզմների պարագայում Հայաստանում սուպերվարչապետական համակարգ լինել չի կարող: «Եթե պառլամենտական ուժերն իրենց տեղում լինեն, որևէ վարչապետ չի կարող վերածվել սուպերվարչապետի»,- համոզմունք հայտնեց Շարմազանովը:

Վերջում ՀՀԿ-ական գործիչը հիշեցրեց, որ իրենք բաց են բոլոր տեսակի քննարկումների համար՝ բացառությամբ 5 հարցի՝ հարց, որը կվնասի բանակաշինությանը, Ցեղասպանության ճանաչմանը, Արցախի միջազգային ճանաչմանը, ազգային արժեքային համակարգին և ՀԱՊԿ անդամակցությանը:

«Ես պետական մարդ եմ, Նիկոլ Փաշինյանն իմ երազած վարչապետը չէ, բայց ցանկացած բանակցություններում ես իր մեջքին կանգնած եմ, որովհետև ինքն իմ պետության վարչապետն է: Եթե նա հաջողի Արցախյան բանակցություններում, ուրեմն կհաջողի հայ ժողովուրդը: Հայաստանից մեծ սեր չունեմ, վերև Աստված, ներքև իմ Հայաստանը»,- ամփոփեց քաղաքական գործիչը: