Ձեր վստահելի աղբյուրը

Ծիծեռնակաբերդի հուշահամալիրի տարածքն այսօր նույնքան մարդաշատ էր, համարյա` որքան լինում է ապրիլի 24-ին: Սակայն այս անգամ մարդիկ այստեղ հավաքվել էին տոնական տրամադրությամբ. հանդիսավոր արարողությամբ նշվեց Վազգեն Սարգսյանի անվան ռազմական ինստիտուտի հիմնադրման 20-րդ տարեդարձն ու ռազմաուսումնական հաստատությունների 2014 թ-ի շրջանավարտների ավարտական միջոցառումը, որին ներկա էր նաև ՀՀ նախագահ Սերժ Սարգսյանն ու բարձրաստիճան այլ այրեր:

Հանրապետության նախագահն իր ելույթում նախ շնորհավորեց ռազմական ինստիտուտի 20-ամյա հոբելյանը և ռազմաուսումնական հաստատություններում ուսումնառությունն ավարտած շրջանավարտներին՝ սպայական առաջին կոչումներն ստանալու կապակցությամբ:

ՀՀ նախագահի խոսքով` Վազգեն Սարգսյանի անվան ռազմական ինստիտուտը հիրավի պատմական նշանակություն ունեցող կրթահամալիր է: Ստեղծվելով արցախյան պատերազմի հաղթական ավարտի հետքերով, այն նշանավորվեց սեփական ռազմական կադրերի դարբնոցն ունենալու հայ ժողովրդի վաղեմի երազանքի իրականացմամբ. «Կարող եմ վերհիշել, թե այժմ արդեն հեռավոր 1994թ-ի ամառային օրերին ինչպես էր իր առաջին մանկական, բայց և հաստատուն, քայլերը կատարում բարձրագույն զինվորական հրամանատարական ուսումնարանը` ապագա ռազմական ինստիտուտը: Դրանք այն օրերն էին, երբ անհրաժեշտ ուսումնական բազան բառի բուն իմաստով մեկիկ-մեկիկ հավաքում էինք պատերազմը նոր ավարտած զինված ուժերի բոլոր ստորաբաժանումներից, երբ պրոֆեսորադասախոսական կազմի հավաքագրման համար շրջում էինք հանրապետության բոլոր բուհերով, երբ հրամանատարական կազմի համալրման համար ընտրում էինք պատերազմի բոհով անցած լավագույն սպաներին»,- հիշեց Սերժ Սարգսյանը:

Նախագահն ընդգծեց, որ արդեն այսօր Վ.Սարգսյանի անվան ռազմական ինստիտուտը Մարշալ Արմենակ Խանփերյանցի անվան ՊՆ ռազմաավիացիոն ինստիտուտի հետ մեկտեղ ապահովում է հայոց բանակի շարքերը հմուտ, բանիմաց, բայց կարևորը` հայրենի միջավայրում թրծված առաջնորդների մուտքը: Ընդ որում` արժանահիշատակ է այն հանգամանքը, որ առաջին անգամ ԶՈՒ-ը կհամալրվեն միջոցառմանը ներկա երեք կին պրոֆեսիոնալ սպաներով` ռազմաավիացիոն ինստիտուտի սաներով:

«Եվ սա վկայում է հայրենիքի պաշտպանության գործում հայ կնոջ օրըստօրե աճող դերակատարության մասին»,- ընդգծեց երկրի ղեկավարը` ցանկանալով բոլոր շրջանավարտներին պատվով կրել հայոց բանակի սպա լինելու նվիրական կոչումն ու առաքելությունը:

Ինչ վերաբերում է միջոցառման վայրի ընտրությանը, ապա Սերժ Սարգսյանը նշեց, որ այն պատահական չէ. «Հավաքվելով այս սրբավայրում և խոնարհվելով անմեղ նահատակների հավերժ հիշատակի առջև՝ մեր ազգի ու պետականության բոլոր ախոյաններին նաև հստակ ուղերձ ենք հղում առ այն, որ այլևս անցել են այն ժամանակները, երբ հայ մարդուն վնասելը մնում էր անպատիժ: Դիպուկահար զենքով մեզ թիրախավորող, մեր թիկունքում դավադիր ոտնձգություններ իրականացնել ցանկացող և մեր դեմ լայնածավալ ռազմական գործողություններ պլանավորող հակառակորդին ասում ենք. «Զգու՛յշ եղեք, սա Հայոց աշխարհն է, որտեղ գտնելու եք ձեր վախճանը»:

Երկրի ղեկավարը նաև շեշտեց. «Եվ ես շնորհակալ եմ ձեզնից, որ ընտրելով սպայի մասնագիտությունը՝ գիտակցաբար ու անմնացորդ նվիրումով դարձել եք այս պատվիրանների հետևորդները ու դրանք գործով իրականացնողները: Սակայն ես հրամայում եմ ձեզ, խնդրում եմ, տղանե՛ր, անել ամեն ինչ, հերոսանալու ոչ թե սեփական կյանքը կորցնելու, այլ մեր աշխարհի անդորրը խաթարող ելուզակներին վնասազերծելու միջոցով: Դուք հայրենիքին շատ եք պետք»:

Նշենք, որ Սերժ Սարգսյանն անձամբ լավագույն շրջանավարտներին հանձնեց սպայական վկայականները և պարգևատրեց անվանական դաշույններով: Իսկ միջոցառման պաշտոնական մասի ավարտին հանրապետության ղեկավարն այցելեց Հայոց ցեղասպանության զոհերի հիշատակը հավերժացնող հուշարձան և ծաղիկներ դրեց  անմար կրակի մոտ: