Ձեր վստահելի աղբյուրը

Ուկրաինայում գտնվող Ղազախստանի նախագահ Նուրսուլթան Նազարբաևը այսօր հայտարարել է, որ իր երկիրը ունի բոլոր առավելությունները Դոնբասում հակամարտությունը կարգավորելու համար: Նազարբաևը նշել է, որ Ղազախստանը հավասարազոր է վերաբերվում Ուկրաինային և Ռուսաստանին, իսկ ինքը որպես ազնիվ մենեջեր պատրաստ է աջակցել խնդրի կարգավորմանը:

Ղազախստանի «ուկրաինական խաղը»

Դեկտեմբերի սկզբին Ղազախստան էր այցելել Ֆրանսիայի նախագահ Ֆրանսուա Օլանդը, ով այդ երկրի նախագահի հետ քննարկել է ԵՄ-ի և ԵՏՄ-ի միջև հնարավոր համագործակցության հարցերը և ուկրաինական ճգնաժամը:

Նազարբաևը Օլանդի հետ հանդիպումից հետո հայտարարել էր, որ ինքը և Ֆրանսիայի նախագահը ուկրաինական ճգնաժամի հաղթահարման հարցում ունեն նույն դիրքորոշումը: Նրա խոսքով, ուկրաինական համակարտության հաղթահարման համար պետք է գտնել փոխզիջումներ և ինքը պատրաստ է իր միջնորդական ջանքերը գործադրել: Աստանայից անմիջապես հետո Օլանդը այցելել է Մոսկվա և հանդիպում է ունեցել Ռուսաստանի նախագահ Վլադիմիր Պուտինի հետ: Հանդիպման ընթացքում քննարկվել է նաև ուկրաինական ճգնաժամը: 

Այս պահին Ուկրաինայում գտնվող Նազարբաևը հայտարարել է, որ Ղազախստանը պատրաստվում է Ուկրաինային էներգետիկ ածուխ մատակարարել: Ուկրաինայի նախագահ Պյոտր Պորոշենկոյի հետ հանդիպումից հետո Նազարբաևը հայտարարել է, որ Էկիբաստուսյան հանքավայրի ածուխը առաքվելու է Ուկրաինա: 

Էներգետիկ խնդիրների հետ բախվող Ուկրաինայի համար ղազախական առաքումները ունեն կարևոր նշանականություն: Ուկրաինայի ածխային հիմնական պաշարները կենտրոնացված են Դոնբասում, որը հակամարտության գոտի է: Ղազախստանը իր այդ քայլերով փորձում է որոշակիորեն տարանջատվել Ռուսաստանից՝ ուկրաինական ճակատում և փորձում սիրաշահել Արևմուտքին: Աստանան ուկրաինական հակամարտությունում ցանկանում է միջնորդի դերակատարում ունենալ՝ բարձրացնելով իր միջազգային վարկանիշը և ցուցադրել Ռուսաստանից անկախ արտաքին քաղաքականություն վարելու իր կարողությունը:

Ռուսաստանից դժգոհ Լուկաշենկոն շտապել է Կիև

Նախօրեին պաշտոնական այցով Ուկրաինա է ժամանել ԵՏՄ-ի անդամ մյուս երկրի՝ Բելառուսի նախագահ Ալեքսանդր Լուկաշենկոն: Նախագահ Պյոտր Պորոշենկոյի հետ հանդիպումից հետո Լուկաշենկոն հայտարարել է, որ Բելառուսը միշտ պատրաստ է օգնել Ուկրաինային: Նրա խոսքով, իրենց համար դա խաղ չէ, քանի որ նրանք հարևաններ են, հարազատ մարդիկ: Լուկաշենկոն նշել է, որ Ուկրաինայի և Բելառուսի միջև ապրանքաշրջանառությունը չի նվազում, այլ միայն ավելանում է: Բելառուսի նախագահի այցը Կիև տեղի է ունենում ռուս-բելառուսական հարաբերություններում առկա բավականին սուր հակասությունների ֆոնին՝ կապված բելառուսական ապրանքների Ռուսաստան արտահանման և մաքսային զննման հետ: Լուկաշենկոն հայտարարել է, որ Ռուսաստանի հետ առևտուր իրականացնելիս պետք է կիրառել դոլար կամ եվրո:

Բացի այդ, Լուկաշենկոն բավականին կտրուկ հայտարարություններ է հնչեցրել Ռուսաստանի նկատմամբ, իսկ Մոսկվայից էլ կարծես թե սկսում են նախազգուշացնել Լուկաշենկոյին: Այսօր ՌԴ Պետդումայի միջազգային հարաբերությունների մշտական հանձնաժողովի ղեկավար Ալեքսեյ Պուշկովը զգուշացրել է Լուկաշենկոյին ընկերություն չանել ԱՄՆ-ի հետ: Նա իր ֆեյսբուքյան էջում գրառում է կատարել, որ ԱՄՆ-ի հետ ընկերություն են արել Սլոբոդան Միլոշևիչը, Մուամմար Քադդաֆին և Սադդամ Հուսեյնը՝ նրանց ապագան բոլորին հայտնի է: 

Այսպիսով, ԵՏՄ-ի անդամ Բելառուսն ու Ղազախստանը փորձում են իրենց շահերից բխող քաղաքականություն վարել Ուկրաինայի հանդեպ, որը կարող է հակասել կամ չհամընկնել Ռուսաստանի դիրքորոշման հետ: Լուկաշենկոյի և Նազարբաևի այցերը Կիև ցույց են տալիս, որ ԵՏՄ-ը շարունակելու է մնալ տնտեսական միավորում, իսկ քաղաքական և աշխարհաքաղաքական հարցերում ԵՏՄ-ի անդամ այդ երկրները իրենց ինքնուրույն ուղենիշներով են շարժվելու:

Արտյոմ Բալասանով, վերլուծաբան