Ձեր վստահելի աղբյուրը

«Դարի բարիք և դարի չարիք, որը համարժեք նույն հոգեբանական ազեդեցությունն է թողնում և մեծի, և փոքր վրա»,- լրագրողների հետ հանդիպման ժամանակ ասաց հոգեբան Աննա Բադալյանը՝ խոսելով ինտերնետի ու դրա թողած ազդեցության մասին:

Ըստ նրա, ինտերնետից շատ օգտվողները ժամանակի ընթացքում կորցնում են շրջապատի հետ շփվելու ունակությունը, կենդանի խոսքը, հայացքը դառնում է երկրորդական:

«Վերջին շրջանում շատ են գալիս խորհրդատվության՝ ցանկանալով վերականգնել կենդանի շփման հմտությունը»,- ասաց հոգեբանը:

Ա. Բադալյանը նշեց, որ երեխաները, ովքեր պետք է մեծանան ընկերների, բարեկամների հետ կենդանի շփման մեջ, պարփակվում են էկրանի առջև, նրանց մոտ հայտնվում են ֆոբիաներ. «Համակարգչի փոքրիկ մկնիկը կարող է ղեկավարել ամեն ինչ առանց հոգեբանական ճիգ գործադրելու»:

Հոգեբանը խորհուրդ տվեց ծնողներին ոչ թե խստիվ արգելել երեխաներին օգտվել ինտերնետից, քանի որ կարող է դա հակառակ ռեակցիան թողնել, այլ երեխաներին համոզիչ բացատրել ինտերնետի բացասական ազդեցության մասին:

«Դա պետք է լինի ոչ թե մենախոսություն, այլ քննարկում, որի արդյունքում երեխան կհասկանա, թե ինչ վատ ազդեցություն կարող է թողնել ինտերնետը»,- ասաց նա:

Հոգեբանի խոսքով, երեխաների ընկալման վրա անուղղակի և ուղղակի ազդում են հեքիաթները, դառնում են որոշակի արժեքներ գնահատող:

Ա.Բադալյանն ասաց, որ երեխաները պետք է օգտվեն ինտերնետից, բայց իհարկե, սահմանափակ: Ըստ նրա, ինտերնետը նաև որոշակի ճաշակ է ձևավորում երեխաների մեջ՝ շփվելով գեղեցիկի հետ, քանի որ ինտերնետի օգնությամբ հնարավոր է տեսնել աշխարհի գեղեցիկ քաղաքները, արվեստի գլուխգործոցներ, որոնք իրականում կյանքում միգուցե հնարավորություն չունենա տեսնել: