Ժամանակն է` գիտական հանրությունը ինքնակազմակերպվի. Արթուր Իշխանյան
«Երկար տարիներ երկրում գիտության նկատմամբ իրականացվող քաղաքականությունը բերել է այնպիսի վիճակի, որ այսօր գիտությանը և մտավոր գործունեությանը հայտարարված է պատերազմ»,-այս մասին այսօր լրագրողների հետ հանդիպման ժամանակ ասաց ՀՀ ԳԱԱ թղթակից անդամ Արթուր Իշխանյանը` անդրադառնալով գիտաշխատողների աշխատավարձերին:
Նշենք, որ հուլիսի 1-ից սպասվող աշխատավարձերի բարձրացումը չի վերաբերվում ՀՀ ԳԱԱ աշխատակիցներին ու մանկավարժներին:
Նրա խոսքերով` այս կերպ փորձ է արվում երկրում «ոչնչացնել» առավել մտածող խավին. «Երկու տասնամյակ դրան ականատես ենք լինում, իսկ փաստերը խոսուն են: Եթե 1990-ականներին ունեինք 30 հազար գիտաշխատող, մի քանի տասնյակ ճարտարագետներ ու ինժեներներ, ապա այսօր գիտաշխատողների թիվը հասնում է մոտ 4 հազարի, որոնց միջին տարիքը հատում է 60-ը: Սա նույնպես ցույց է տալիս, որ այդ տեսակի վերացման մասին է խոսքը»:
Ըստ նրա` ժամանակն է, որ գիտական հանրությունը ինքնակազմակերպվի և ինքնապաշտպանվի: Գիտնականը դժվարացավ ասել, թե ինչ ձևով կարող են իրենց բողոքի ձայնը բարձրացնել, սակայն գտնում է, որ հարցի լուծման համար անհրաժեշտ են խաղաղ ցույցեր, գործադուլներ կազմակերպվեն, քաղաքացիական անհնազանդություն ցուցաբերվի:
«Այլ ելք չկա, քանի որ վտանգված է երկրի մտավոր ուժը: Մենք ամենաանտեսված խավն ենք ոչ միայն իշխանության, այլև հանրության կողմից: Մարդիկ այսօր գիտության հետ որևէ հույս չեն կապում»,- ընդգծեց Ա.Իշխանյանը:
Նա միաժամանակ նշեց, որ չի կարելի հայտարարել գիտելիքահենք երկիր, բայց անտեսել գիտությունը և գիտնականին:
Ա.Իշխանյանը նաև ասաց, որ պաշտոնական թվերով այսօր պրոֆեսորները ստանում են «անհավանական բարձր»` 60-70 հազար դրամ աշխատավարձ, սակայն դրանից օգտվում են միայն մի քանի գիտնականներ:
«Ես` ԳԱԱ թղթակից անդամ եմ, դոկտոր-պրոֆեսոր, ստանում եմ 63 հազար դրամ աշխատավարձ, ինչը ամենաբարձրն է մեր ինստիտուտում»,- նշեց նա` հավելելով, որ եթե այս քաղաքականությունը շարունակվի, ապա մեր երկրում աստիճանաբար գիտությունը կվերանա:
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ