Աճառյանի դպրոց. Առայժմ այնպես է, ինչպես Փակ շուկայի դեպքում
«Հայաստանի մշակույթի նախարարության հանձնարարականների համաձայն «Երևաննախագիծ» ՓԲԸ կազմակերպության մասնագետները հրատապ լրամշակել են Հերացու փողոցի 2ա հասցեում գտնվող Աճառյանի անվան դպրոցի հուշարձան-շենքի վերականգնման և վերստեղծման նախագիծը և ներկայացրել են համաձայնեցման: Մշակույթի նախարարությանը, այնուհետ Երևանի քաղաքապետարանը նախագիծը համաձայնեցրել է: Ըստ ներկայացված նախագծի շինարարական աշխատանքների իրականացման ժամանակացույցի` Աճառյանի անվան դպրոցի հուշարձան-շենքի վերականգնման և վերստեղծման աշխատանքների /առաջին փուլի/ ավարտը նախատեսվում է 2014 թվականին»,- այս մասին տեղեկացնում են մշակույթի նախարարությունից՝ պատասխանելով Panorama.am-ի այն հարցին, թե մշակույթի նախարարությունը որևէ քայլ պատրաստվո՞ւմ է անել և ո՞րն է նախարարության դիրքորոշումը տվյալ հարցի վերաբերյալ:
Հիշեցնենք, որ Երևանի ճոպանուղու հարևանությամբ գտնվող Հրաչյա Աճառյանի անվան դպրոցը, որը ներառված է պետության կողմից պահպանվող հուշարձանների ցանկում, անհատույց օգտագործման իրավունքով տրվել է ՀԱՊԿ ակադեմիային: Շենքից մնացած ճակատային պատն ավերվել է ապրիլի 30-ի գիշերը:
Նախարարությունից նաև հայտնում են, որ մարտի 11-ին ՀՀ մշակույթի նախարարության մասնագետները հերթական շրջայցի արդյունքում տեղում արձանագրել և դադարեցրել են Աճառյանի անվան դպրոցի հուշարձան-շենքի տարածքում իրականացվող առանց համապատասխան փաստաթղթերի շինարարական աշխատանքները:
«Նախարարությունը ս. թ. մարտի 14-ի գրությամբ դիմել է Երևանի քաղաքապետարանին` օրինախախտումը կանխելու համար միջոցներ ձեռնարկելու և համապատասխան փաստաթղթերը ներկայացնելու պահանջով: Այդ ընթացքում նախարարության մասնագետները` հսկողութուն սահմանելով տարածքում, արձանագրել են շինարարական աշխատանքների վերսկսումը: ՀՀ մշակույթի նախարարությունն այդ կապակցությամբ 2014 թ. ապրիլի 14-ի գրությամբ կրկին Երևանի քաղաքապետարանից պահանջել է դադարեցնել շինարարական աշխատանքները: Միևնույն ժամանակ հայտնում ենք, որ ՀՀ մշակույթի նախարարությունը դիմել է ՀՀ քաղաքաշինության նախարարություն` խնդրելով տալ շինարարական աշխատանքների վերահսկման արդյունքների վերաբերյալ տեղեկույթ: ՀՀ մշակույթի նախարարությունը խնդրի վերաբերյալ օրենքով սահմանված կարգով իրեն վերապահված լիազորությունների շրջանակներում ապահովել է հարցի հետ կապված միջոցները»,- այս մասին ասված է նախարարության պատասխանում:
Նշենք, որ մշակույթի նախարարությունը նման պատասխաններ տվել էր Փակ շուկայի հետ կապված մեր բազմաթիվ հարցումներին և նկատենք, որ Փակ շուկայի հարցն այդպես էլ բաց մնաց՝ փաստացի պետության պաշտպանության տակ գտնվող շենքը այլանդակվեց և կորցրեց իր ճարտարապետական նշանակությունը: Մինչ այժմ որևէ գործնական քայլ՝ նախկին տեսքը վերականգնելու հետ կապված, չի արվել, ինչպես նաև ոչ մեկը պատասխանատվության չի ենթարկվել:
Աճառյանի անվան դպրոցի խնդրին ավելի վաղ անդրադարձել էր նաև քաղաքաշինության նախարար Նարեկ Սարգսյանը՝ ասելով, թե շենքով մշակույթի նախարարն է զբաղվում և առանձին հայտարարություն կանի: Նա նշել էր, որ շենքը պետք է պարտադիր վերականգնվի։
Ի դեպ, նշենք, որ մշակույթի նախարարությանն ուղղված մեր երկրորդը հարցը, թե՝ «Չե՞ք կարծում, որ անգործությունը մեծացնում է պետության հսկողության տակ գտնվող քանդվող հուշարձանների շարքը», մնացել է անպատասխան:
Անպատասխան են մնացել նաև` «Քաղաքաշինության նախարարը փոխվել է: Արդյո՞ք նորանշանակ նախարարը չի պատրաստվում Փակ շուկայի հարցում էլ որևէ գործողություն նախաձեռնել» հարցերը, որ գրավոր ուղղել էինք քաղաքաշինության նորանշանակ նախարարին:
Հիշեցնենք, որ ավելի վաղ Նարեկ Սարգսյանն ասել էր, որ այն, ինչ կատարվեց Փակ շուկայի հետ, անթույլատրելի էր, որևէ արդարացում չկա: Պատասխանելով հարցին, թե ի՞նչ պետք է լինի, ասել էր. «Այս պահին պատրաստ չեմ պատասխանել»:
Խնդրի վերաբերյալ գրավոր հարցում էինք ուղարկել Գլխավոր դատախազություն: «Պետության կողմից պահպանվող հուշարձանները, որերորդ դեպքն է, քանդվում են առանց պետական համապատասխան մարմինների թույլտվության՝ այսպիսով վնաս հասցնելով պետական գույքին: Դատախազությունը, որպես պետական շահի ներկայացուցիչ, ի՞նչ է անում այս ուղղությամբ: Խոսքը, մասնավորապես, ապրիլի 30-ին քանդված Երևանի Հրաչյա Աճառյանի անվան դպրոցի, Փակ շուկայի մասին է»:
Panorama.am-ի հարցին ի պատասխան, դատախազությունից հայտնեցին. «Նշված հանգամանքերը ուսումնասիրվում են Երևան քաղաքի դատախազությունում: Ելնելով ուսումնասիրման ենթակա նյութի ծավալներից, որի համար անհրաժեշտ է լրացուցիչ ժամանակ, արդյունքների մասին Ձեզ կտրամադրվի հավելյալ տեղեկատվություն»:
Նախորդող հրապարակումներ՝
Լիլիթ Գալստյան. Աճառյանի դպրոցի խոշտանգում-ոչնչացումը` բոլորիս աչքիս առաջ
Ճարտարապետն Աճառյանի անվան դպրոցի նախկին շենքի քանդման մասին. «Շատ թափթփված ազգ ենք»
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ
