Ճիշտ չէ, որ «լակմուսային թուղթ» արտահայտությամբ ընդդիմադիրը ընդդիմադիրի հետ խոսի. Ա. Մարտիորսյան
Ինչո՞ւ եռյակը ձգձգեց գործընթացը և իմպիչմենտի նախաձեռնությամբ Նիկոլ Փաշինյանն է հանդես գալիս: Այս հարցի շուրջ Panorama.am-ը զրուցեց «Ժառանգություն» կուսակցության փոխնախագահ Արմեն Մարտիրոսյանի հետ:
-Պարոն Մարտիրոսյան, Ն.Փաշինյանը պատրաստվում է հանդես գալ Սերժ Սարգսյանի պաշտոնանկության մասին որոշման նախագծով, որն արդեն որակվում է իբրև լակմուսային թուղթ ընդդիմադիր դաշտի համար` եթե չմիանան դրան, ապա պարզ կլինի, թե ով ով է դաշտում:
-Իրականում լակմուսի այնքան թղթեր են եղել մինչև հիմա` քաղաքական ուժերի, քաղաքական ու հասարակական գործիչների հետ կապված, որ ասելու չի: Ես էլ կարող եմ ասել, որ մինչև 2013թ-ի նախագահական ընտրությունների քվեարկության օրը ով չէր պաշտպանում Րաֆֆի Հովհաննիսյանին, ուրեմն իրենք լրիվ իշխանական են…. լակմուսի շատ թղթեր կան, դրա համար չեմ կարծում, որ «լակմուսային թուղթ» արտահայտությամբ պետք է ընդդիմադիրը ընդդիմադիրի հետ խոսի: Ամեն դեպքում այն, որ «Ժառանգությունը» Սերժ Սարգսյանի հրաժարականը պահանջում է տեղյակ եք, դա մենք կուսակցության հայտարարությամբ ենք ընդունել, ուստիև այդ լակմուսային թուղթը հաստատ «Ժառանգությանը» չի վերաբերվում:
-Կարծիք կա, որ Ն.Փաշինյանի նախաձեռնության հիմքում ընդդիմադիր բևեռը զբաղեցնելն ու հիմնավորվելն է` 2017-2018թթ-ի ընտրություններից առաջ:
-Ի տարբերություն իշխանական դաշտի ընդդիմադիր դաշտն անսահման է և ցանկացած ոք, որ ցանկանում է այդ դաշտում տեղ ունենա որևէ խնդիր այդ իմաստով չունի և կարող է հանգիստ այդ դաշտում միանգամից իր տեղը զբաղեցնել: Բայց ամբողջ խնդիրը կայանում է նրանում, թե հասարակությունը ինչպես դրան կարձագանքի և ինչպիսի աջակցություն կունենա տվյալ ընդդիմադիր ուժը հասարակության մոտ: Խնդիրը միայն դա է, թե չէ դաշտն անսահման է:
-Կարծում եք «Ժառանգություն» խմբակցության Ձեր գործընկերները կմասնակցե՞ն ստորագրահավաքին, որպեսզի հարցը արտահերթ կարգով քննարկման դրվի:
-Ես կարծում եմ Նիկոլ Փաշինյանը կդիմի մեր գործընկերներին, իրենք կքննարկեն և եթե անհրաժեշտություն լինի, ապա վարչությունում էլ հարցը կքննարկենք:
-Պարոն Մարտիրոսյան, գոնե «Ժառանգությունը» եռյակում հրաժարական բառից ու պահանջից չի խուսափել, անգամ պաշտոնական հայտարարություն ունեք: Ինչո՞ւ եռյակը չտարավ զարգացումները դեպի այն, ինչ այսօր առաջարկում է Ն.Փաշինյանը:
-Չեմ կարող ասել… երևի թե այն պարզ պատճառով, որ ակնհայտ է, որ Հանրապետական մեծամասնությունը դեմ է լինելու այս նախաձեռնությանը, իսկ հայտնի է, որ իմպիչմենտի համար պատգամավորների 2/3-ի համաձայնությունն է հարկավոր:
Թեմային առնչվող`
Ենթադրելի է, որ հրաժարական պահանջող ուժերը պետք է միանան այս նախաձեռնությանը. Է.Մարուքյան
Բոլորի համար սա շատ լավ քննության պահ է. Զ. Փոստանջյան
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ