Ձեր վստահելի աղբյուրը

Երևանում նախօրեին տրվել է ԵՄ կողմից համաֆինանսավորվող «Նորարարական գյուղական զբոսաշրջության խթանում» ծրագրի մեկնարկը` ծրագրում ընդգրկված տեղական ծառայություն մատուցողների և տեղական զբոսաշրջային գործակալությունների համար:

Ծրագրի համակարգող Աննա Առաքելյանը նշել է, որ ծրագրի շրջանակներում տեղական զբոսաշրջային գործակալությունների ցանցը կսկսի համագործակցել տարածաշրջանային մակարդակում և կընդգրկվի Բուլղարիայի, Թուրքիայի և Վրաստանի զբոսաշրջային գործակալությունների ավելի լայն ցանցում:

«Ես հուսով եմ, որ համագործակցությունը կլինի արդյունավետ և միջազգային փորձագետի ու տեղական ծառայություն մատուցողների միասնական ջանքերով մշակված նոր զբոսաշրջային պրոդուկտը կխթանի սևծովյան ավազանի տարածաշրջանում ներգնա զբոսաշրջության զարգացմանը»,- հավելել է տիկին Առաքելյանը:

Հեյֆեր Հայաստանի տնօրեն տիկին Անահիտ Ղազանչյանն ասել է, որ ուրախ է աշխատել գյուղական զբոսաշրջության ոլորտում ընդգրկված տեղական ծառայություն մատուցողների հետ:

«Այս ծրագրի շրջանակներում դուք հնարավորություն կունենաք զարգացնել արժեքային շղթաների, մարքեթինգի, բիզնես պլան գրելու, կառավարման վերաբերյալ ձեր գիտելիքները և ավելի կհմտանաք ձեր բիզնեսը վարելու հարցում»,-ասել է տիկին Ղազանչյանը:

«Նորարարական գյուղական զբոսաշրջության խթանում» ծրագիրն ուղղված է` միասնական ռեսուրսների հիման վրա սևծովյան ավազանի չորս երկրների (Հայաստան, Վրաստան, Թուրքիա, Բուլղարիա)՝ տնտեսական և սոցիալական զարգացման նպատակով տարածաշրջանային համագործակցության և անդրսահմանային գործընկերության զարգացմանը՝ գյուղական զբոսաշրջության ցանցերի ստեղծման միջոցով՝ միասնական զբոսաշրջության զարգացման նախաձեռնությունները և ավանդական պրոդուկտները խթանելու համար:

Ծրագրի շրջանակներում կստեղծվեն ուսուցում ստացած և հմտություններ ունեցող՝ գյուղական զբոսաշրջության ոլորտում տեղական ծառայություններ մատուցողների և տուրիստական գործակալությունների ցանցեր, որոնք կմշակեն և կվաճառեն եզակի զբոսաշրջային պրոդուկտ՝ «Տարածաշրջանային այցելուի միասնական փաթեթ» («ՏԱՄ» փաթեթ): Այն կխթանի զբոսաշրջիկների ներհոսքը դեպի տարածաշրջան և իր ներդրումը կունենա ներերկրային և ներտարածաշրջանային պետական իշխանավորների միջև աննախադեպ համագործակցության հաստատման հարցում:

Ծրագրի շրջանակներում այս պրոդուկտի ստեղծման նպատակն է տարածաշրջանային մակարդակով գյուղական զբոսաշրջության ոլորտում երկարատև արդյունքների ձեռք բերումը:

«Նորարարական գյուղական զբոսաշրջության խթանում» ծրագիրը համաֆինանսավորվում է Եվրոպական միության կողմից՝ 472,923.43 եվրո գումարի չափով Եվրոպական հարևանության և գործընկերության գործիքի միջոցով: Ծրագիրը սկսվել է 2013թ. նոյեմբերին և կտևի 18 ամիս: