Ձեր վստահելի աղբյուրը

Սկեսուրի կողմից դաժան ծեծի, կտտանքների ենթարկված Մարիամ Գևորգյանի գործով հաջորդ դատական նիստը նշանակվել է հունիսի 14-ին, ժամը 12:30-ին: Տեխնիկական պատճառներով նիստն այս անգամ տեղի կունենա ոչ թե Վեդիում, այլ` Արտաշատում:

Իսկ մինչ այդ, երեկ կայացած կարճատև նիստի ժամանակ դատավորը մերժել է Մարիամ Գևորգյանի փաստաբանի` Նոնա Գալստյանի` Արարատի և Վայոց ձորի մարզերի ընդհանուր իրավասության դատարանի դատավոր Արմեն Բեկթաշյանին նկատմամբ ինքնաբացարկի միջնորդությունը:

«Ես հիմնավորումներ էի ներկայացրել, որ ինքը այս գործով սուբյեկտիվ դատավոր է հանդիսանում, որովհետև դռնփակ դատական քննություն անցկացնելու մասին որոշմամբ խախտել է օրենքի պահանջները: Իսկ դատավորն էլ, երբ մերժեց մեր միջնորդությունը, հայտարարեց, թե ինքը գործել է օբյեկտիվ ու անկողմնակալ: Ելնելով դատարանի այլ գործողություններից, մենք իրավական գնահատականներ դեռ կտանք»,-ասաց փաստաբան Նոնա Գալստյանը:

Փաստաբանի խոսքով, մայիսի 14-ին կայացած առաջին նիստի ընթացքում, երբ դեռ որևէ միջնորդություն չի եղել նիստը դռնփակ անցկացնելու վերաբերյալ, դատավորը թույլ չի տվել տեսանկարահանում իրականացնել: «Դատարանի այս որոշումը հստակ ու օրենքի կետերին համապատասխան պատճառաբանված չէ»,-ասաց Ն. Գալստյանը:

Երեկ փաստաբանը նաև դատավորի` դատական նիստերը դռնփակ անցկացնելու վերաբերյալ որոշումը բողոքարկելու հայցով դիմել է վերաքննիչ դատարան: «Առայժմ չգիտենք, վարույթ կընդունվի՞, թե՞ ոչ»,-ասաց փաստաբանը: Փաստաբանի կարծիքով, դռնբաց դատական նիստը կօգնի, որ խնդիրը մեծ հնչեղություն ստանա, ինչն էլ կբերի դատավորի արդարացի որոշման ընդունելուն:
Panorama.am-ի հետ զրույցում Մարիամ Գևորգյանն ասաց, որ ինքն ու իրեն աջակցող կազմակերպությունները պատրաստվում են բողոքի ակցիա իրականացնել: Վայրը, օրը դեռ հստակեցված չեն: Հարցին, թե դատավորի սուբյեկտիվությունն ինչով կարող է պայմանավորված լինել, Մ. Գևորգյանը նշեց, թե չի կարող հստակ ոչինչ ասել:

Երեկ դատական նիստերը արդար ու բաց անցկացնելու պահանջով Մարիամի իրավունքների պաշտպանությամբ զբաղվող «Ընդդեմ կանանց հանդեպ բռնության կոալիցիան» բողոքի ակցիա է անցկացրել դատարանի դիմաց:

Հիշեցնենք, որ Մարիամի սկեսուրը Հայկանուշ Միքայելյանը հարսին խոշտանգումների է ենթարկել որդու` Դավիթ Զիրոյանի հետ: Գևորգյանը Զիրոյանի հետ ամուսնացել է 2009 թվականի նոյեմբերին, նույն տարվա դեկտեմբերին տեղափոխվել է Սանկտ Պետերբուրգ, որտեղ աղջկան 10 ամսվա ընթացքում պարբերաբար ծեծի և կտտանքների են ենթարկել:

Երևան վերադառնալուց հետո Գևորգյանը դիմել է ոստիկանություն, ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն նրան կարող էին դատապարտել մինչև 3 տարվա ազատազրկման: Դատարանի որոշմամբ` Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի կողմից հայտարարված համաներմամբ: Հայկանուշ Միքայելյանի դեմ առաջադրվել է մեղադրանք քրեական օրենսգրքի 113 (միջին ծանրության վնասվածնքեր հասցնել) և 119 (խոշտանգում) հոդվածներով:

Ըստ գործի նյութերի, Հայկանուշ Միքայելյանը երկրորդ հարսի` Մարիամ Գևորգյանի դեպքում էլ քաշել է մազերը, պատառաքաղով և եղունգներով ծակծկել է նրա մարմնի տարբեր մասերը, ձեռքերով, ոտքերով, փայտյա գրտնակով, հարվածներ է հասցրել նրա մարմնի տարբեր մասերին, կրակայրիչով, հարթուկով վառել մարմնի տարբեր մասերը, բռնի ուժով բացել է բերանը, աղ լցրել, պատճառելով առողջությանը միջին ծանրության վնասի հատկանիշներ պարունակող` ձախ ծղիկոսկրի ստորին երրորդականի փակ կոտրվածքի, աջ ձեռքի 5-րդ մատի հիմային ֆալանգի փակ կոտրվածքի, գլխի ճակատային շրջանի և ձախ ականջախեցու սալջարդ վերքերի, ցայլքի և ձախ աճուկային շրջանի արյունազեղման , ձախ բազկի և ձախ կրծքագեղձի կտրած վերքերի, աջ ձեռնաթաթի կտրած ծակած վերքի, ձախ նախաբազկի ծակած վերքերի, կրծքագեղձերի, ձախ նախաբազկի, իրանի գոտկային և որովայնի շրջանի այրվածքների ձևով մարմնական վնասվածքներ:

Նախորդող հրապարակում`
Դանակով, շերեփով, պատառաքաղով հարսին ծեծած սկեսրոջ դատը մեկնարկում է այսօր

Սկեսուրի ծեծից տուժած հարսի ներկայացուցիչը միջնորդելու է խստացնել նրա մեղադրանքը

Սկեսուրի կողմից դաժանաբար ծեծված հարսի գործով 2-րդ նիստն այսօր էր