Արտակ Բուդաղյանը պնդել ու պնդում է, որ եղել է կրակոց նաև Սուրիկ Խաչատրյանի դղյակից. Փաստաբանի բացահայտումը (տեսանյութ)
Բուդաղյանների փաստաբան Հայկ Ալումյանը պատրաստվում է բողոքարկել ՊՆ քննչական ծառայության որոշումները Սուրիկ Խաչատրյանի որդու` Տիգրան Խաչատրյանի և թիկնապահ Զարզանդ Նիկողոսյանի նկատմամբ քրեական հետապնդումը դադարեցնելու և խափանման միջոց կալանքը փոխելու մասին: Այդ մասին այսօր լրագրողների հետ հանդիպման ընթացքում տեղեկացրեց Հայկ Ալումյանը:
Նրա խոսքով, այս որոշումներից հետո հունիսի 1-ին տեղի ունեցած միջադեպի կապակցությամբ հարուցված քրեական գործի նախաքննությունը շարունակվում է և գործով միակ մեղադրյալը այժմ, փաստորեն, Արտակ Բուդաղյանն է: «Այն երկու անձանց նկատմամբ քրեական հետապնդումը դադարեցվեց, Լորետա Բարսեղյանն այժմ տուժող է, և մենք ունենք մի մեղադրյալ, որի նկատմամբ իրականացվում է նախաքննություն: Մյուս կողմի փաստաբանի կողմից էսպիսի մի միտք հնչեց` մենք կարծում ենք, որ Լորետա Բարսեղյանը բողոք չի ունենա, դրա համար Արտակ Բուդաղյանը քրեական պատասխանատվության չի ենթարկվի: Այսինքն` Արտակ Բուդաղյանը քրեական պատասխանատվության չի ենթարկվելու միմիայն մյուս կողմի մեծահոգության շնորհիվ: Հասկանում ե՞ք` ցինիզմը ուր է հասնում», -հայտարարեց Հայկ Ալումյանը:
Լրագրողների խնդրանքով, Բուդաղյանների պաշտպանը ներկայացրեց նախաքննության որոշ տվյալներ: Նկատենք, որ ավելի վաղ նախաքննության տվյալներ էր ներկայացրել նաև Տիգրան Խաչատրյանի փաստաբան Ռուբեն Սահակյանը` հրապարակելով ցուցմունքները:
«Ճաշկերույթից հետո, երբ Ավետիք Բուդաղյանը, որը այլ անձանց ավտոմեքենայով էր եկել այդ ճաշկերույթի տեղը, պետք է վերադառնար տուն որևիցե մեկի ավտոմեքենայով և Սուրիկ Խաչատրյանի համառ պնդումների արդյունքում հայտնվեց Սուրիկ Խաչատրյանի ավտոմեքենայում: Մի քանի րոպեների ընթացքում դուք պատկերացրեք ինչ է տեղի ունեցել, որ Ավետիք Բուդաղյանը ծեծված վիճակում դուրս է հանվել փողոց: Եվ մեզ ասում են, որ մի քանի րոպեների ընթացքում Սուրիկ Խաչատրյանը հասցրել է այնպես քնել, որ հետո մեքենայի մեջ վեճ է ծագել Զարզանդի ու Ավետիքի միջև, ինքը չի լսել, տեղյակ չի եղել: Ավետիք Բուդաղյանը երբ գալիս է տուն, Արտակ Բուդաղյանը տեսնում է նրա դեմքը այլայլված ու փորձում է հասկանալ` ինչ է եղել: Արտակն հետո իր ցուցմունքներում նշում է, որ երբեք Ավետիքին այդ վիճակում չի տեսել: Ավետիքը չի պատասխանում: Արտակն էլ այդ օրը պետք է վերադառնար Ղարաբաղ, զորամաս», -ներկայացրեց Հայկ Ալումյանը:
Այնուհետև, ներկայացնելով նույն այդ ցուցմունքները, Ալումյանն ասաց, որ Արտակ Բուդաղյանը նկատում է Ավետիք Բուդաղյանի դեմքին կարմրած հատվածներ և երկար համոզելուց հետո Ավետիք Բուդաղյանը եղբորը պատմում է մեքենայի մեջ կատարվածը: Ըստ փաստաբանի, երբ Արտակ Բուդաղյանը փորձում է ելքեր փնտրել Խաչատրյանների ընտանիքից պարզաբանումներ ստանալու համար, սակայն Ավետիք Բուդաղյանը արգելում է որևէ գործողություն ձեռնարկել:
«Արտակն արդեն Ավետիքից ինչ-որ չափ վրդովված գնում է, որ ծառայողական մեքենայով մեկնի Ղարաբաղ, զորամաս, ինչպես նախատեսված էր, բայց վրդովված լինելով Ավետիքից, Ավետիքն էլ սկսում է նրան զանգել, որովհետև կարծում էր, որ Արտակը կարող է առանց իրեն ասելու, գնալ Սուրիկ Խաչատրյանենց մոտ: Ավետիքը սկսում է զանգահարել Արտակին, որպեսզի պարզի` կարող է գնում է էնտեղ, իսկ Արտակն էլ վրդովված լինելով, հեռախոսն անջատում է: Այդքանից հետո Ավետիքը խառնվում է, նստում է իր ավտոմեքենան ու քշում Սուրիկ Խաչատրյանի տան ուղղությամբ: Այդտեղից արդեն պարզ երևում է կադրերում, թե ինչ է տեղի ունենում», -ասաց փաստաբանը:
Այդ ժամանակ, Ալումյանի ներկայացմամբ, ճանապարհին հինգ մարդ կանգնած սպասելիս են եղել, որոնց մեջ նաև զինվածներ են եղել: «Այդ հինգ հոգուց մի քանիսը մոտենում են ավտոմեքենային, դուռը բացում են ու սկսում են քաշքշել ու հարվածել Ավետիքին: Ավետիքը մեքենայով փորձում է իրենցից հեռանալ, բայց էլի են գալիս մեքենայի վրա: Այդ ժամանակ Արտակ Բուդաղյանը Գորիսից դուրս գալիս, ճանապարհի մի հատված կա, որտեղից տեսանելի է լինեւմ, որ Սուրիկ Խաչատրյանի տան մոտակայքում իրադարձություններ են կատարվում ու տեսնում է իրենց ավտոմեքենան: Եվ Այդ ժամանակ մեքենայով պտտվում է ու գալիս դեպքի վայր` հասկանում է, որ Ավոն էնտեղ է: Դրանից հետո արդեն կադրերում երևում է այն, ինչ տեսել եք», -պատմեց փաստաբանը:
Նա ասաց նաև, որ Արտակ Բուդաղյանի մեքենայի միջի որսորդական հրացանի մեջ փամփուշտներ չեն եղել, ինչը հաստատվել է նաև նախաքննությամբ: «Դուք պատկերացնո՞ւմ եք այդպիսի հարձակում տան վրա, որ զորաամսի հրամանատարը, գնդապետը պատերազմի մասնակիցը եթե կուզի հարձակում կատարել մեկի տան վրա, գա այդ տուն որսորդական հրացանով, այն էլ չլիցքավորված: Գալիս է այն ժամանակ, երբ քաշքշում են ու խփում իր եղբորը, այդ իրավիճակում Արտակը հիշում է, որ իր մոտ կա զնեք ու դրանով դուրս է գալիս, որ իր մոտ չգան և սկսում են մյուսները փախչել: Դուք այդպիսի հարձակում տեսե՞լ եք, որ հարձակում կատարողը մեքենայից իջնի, որ եղբորը դեպքի վայրից տանի հեռու», -նշեց փաստաբանը:
Անդրադառնալով նույն միջադեպի ժամանակ Սյունիքի նախկին մարզպետ Սուրիկ Խաչատրյանի հավանական մասնակցությանը, Ալումյանն ասաց, որ այդ մասին պնդում արել է իր պաշտպանյալ Արտակ Բուդաղյանը նախաքննության ժամանակ տված իր ցուցմունքներում: «Արտակ Բուդաղյանը պնդել ու պնդում է, որ եղել է կրակոց նաև այդ դղյակից, վերևի պատուհանից: Արտակ Բուդաղյանը պնդում է, որ Լորետա Բարսեղյանը բղավում էր` Սուրիկ էս ինչ արիր, բա ասում էիր` սենց բան էլ չի լինի: Էդ ամեն ինչը Արտակ Բուդաղյանի ասելով է, որի դեմ իրենց համար շատ հեշտ է պայքարել, քանի որ նրանց կողմից 9 հոգի մարդ կա», -ասաց փաստաբանը:
Ալումյանի պնդմամբ, Արտակ Բուդաղյանի հայտարարությունը հաստատվում է նաև տեսագրության մեջ եղած փաստով. դեպքի տեսագրության մեջ երևում է` ինչպես է մի գնդակ դիպչելով ասֆալտին թռչում վերև: «Դա շատ ուժեղ փաստարկ է, և դրա համար քննիչն ու փորձագետները արեցին ամեն ինչ, որպեսզի այդ գնդակի տեղը չհայտնաբերվի»,- հավելեց փաստաբան Ալումյանը:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց