Ձեր վստահելի աղբյուրը

Մայիսի 15-ին Նոյեմբերյանի զորամասում հրազենային կրակոցից մահացած զինծառայող Լյուքս Ստեփանյանի մահվան կապակցությամբ հարուցված քրեական գործի նախաքննությունը գրեթե ավարտվել է, և գործն ամբողջությամբ ուղարկվել է կողմերին ծանոթանալու համար:

Հիշեցնենք՝ ըստ նախաքննության տվյալների, մայիսի 15-ին զորամասի 1-ին պահակախմբի մուտքի դիտորդ, նույն զորամասի ԿՍ-19 ժամկետային զինծառայող, շարքային Դավիթ Խաչատրյանը վիճաբանության մեջ է մտել պահակախմբում ընդգրկված ԿՍ-19 ՀԴՆ-ի ժամկետային զինծառայող, շարքային Լյուքս Ստեփանյանի հետ, որի ժամանակ շարքային Դ. Խաչատրյանն իրեն ամրակցված ԱԿՄ տեսակի ինքնաձիգից կրակել է շարքային Լ. Ստեփանյանի ուղղությամբ, որի արդյունքում վերջինս գլխի շրջանում ստացած հրազենային վնասվածքից տեղում մահացել է, իսկ նույն ՀԴՆ-ի ժամկետային զինծառայող, շարքային Հրաչյա Սարգսյանը գլխի շրջանում ստացել էր հրազենային վնասվածք:

Փաստի առթիվ ՀՀ ՊՆ ՔԾ 6-րդ կայազորային քննչական բաժնում հարուցվել էր քրեական գործ` ՀՀ քր. օր-ի 104 հոդ-ի 2-րդ մասի 6-րդ կետի հատկանիշներով՝ «սպանությունը՝ շատերի կյանքի համար վտանգավոր եղանակով»:

Դավիթ Խաչատրյանի փաստաբան Երեմ Սարգսյանը Panorama.am-ի թղթակցի հետ զրույցում ասաց, որ իր պաշտպանյալը առաջադրված մեղադրանքը չի ընդունում:

«Ինքը որոշ հանգամանքներ հայտնում է, բայց մեղադրանքը, թե ցանկացել է սպանել, չի ընդունում»,-փոխանցեց փաստաբանը՝ նկատելով, որ դեռ նախաքննությունը վերջնականապես չի ավարտվել, այդ պատճառով էլ չի կարող մանրամասներ հայտնել:

Այժմ իրենք սկսելու են ծանոթանալ գործի նյութերին, որից հետո պարզ կլինի՝ նախաքննության ընթացքի վերաբերյալ միջնորդություն ներկայացնելո՞ւ են, թե՞ ոչ:

Նախորդող հրապարակում.

Նոյեմբերյանի զորամասը` Լյուքսի մահից հետո (տեսանյութ)