Դատարանը որոշել է երեխաներին վերցնել մորից ու հանձնել հորը
30-ամյա Հասմիկ Ասատրյանը դատարանի վճռով զրկվել է միակ որդու հետ ապրելու երջանկությունից. Արարատի և Վայոց Ձորի մարզերի ընդհանուր իրավասության դատարանի օրերս կայացրած վճռով 8-ամյա Անդրանիկը կապրի հոր հետ:
Հասմիկը ամուսնու` Արարատի մարզի Փոքր Վեդի գյուղի բնակիչ Կարեն Մանուկյանի հետ ամուսնացել է, երբ 18 տարեկան էր: Պատմում է` ամուսնական կյանքը հարթ չի եղել, ամուսինը ծեծել է, իսկ սկեսուրն էլ անընդհատ պահանջել աշխատել, «տունը փող բերել»:
«Վերջը գնացի հացի փռում աշխատելու, անընդհատ ճնշում էին, իմ երեխեքին իմ դեմ էին տրամադրում, գործից գալիս էի, հասկանում էի, որ ինչ-որ բան էն չի: Շատ դաժան կյանք եմ տեսել, շատ»,- պատմում է Հասմիկը:
Ամուսնուց հեռացել է մեկ տարի առաջ, ասում է` «Հանեցին, տնից դուրս վռնդեցին»: Բացի կնոջից հրաժարվելը, Կարենը այնպես է արել, որ երեխաների խնամակալը ինքը լինի, և դատարանն էլ այդպիսի որոշում է կայացրել: Այժմ Անդրանիկը հոր մոտ է: Մայրը կասկածներ ունի. «Տղուս ուզում են տան տեգորս, ինքը երեխա չի կարում ունենա, դրա համար էլ սենց բան են սարքել գլխիս: Չեմ հասկանում` ինչ անեմ»:
Հասմիկն ասում է, որ նորմալ է ապրում, իր տատիկից տուն է ժառանգություն ստացել, բայց դատարանը հաշվի չի առել իր ապրելու պայմանները ու որոշել է երեխաներին հանձնել հոր խնամակալությանը: Դուստրը` 11-ամյա Անգինը, որ այժմ ժամանակավորապես կնոջ մոտ է, Հասմիկի պատմելով, չի կարողանում հեռախոսով խոսել եղբոր հետ` թույլ չեն տալիս:
«Չեք պատկերացնի` ինչքան վատ մարդիկ են, իրանք առել են դատարանի որոշումը, ծանոթներ են մեջ գցել, որ տղուս տանեն», -նախկին ամուսնու ընտանիքի մասին ասում է 30-ամյա կինը:
Մանուկյանների ընտանիքը, մեր զրուցակցի պատմելով, բազմանդամ է. քույրն ամուսնալուծվել է, հետ եկել երեխաների հետ, եղբայրն է կնոջ հետ ապրում:
«Լավ չեն նրանց պայմանները: Ես որ իրանց տանն էի ապրում, մեզ ասեցին դուք գնացեք գառաժում ապրեք, տանը տեղ չկար: Հիմա իմ երեխուն ոնց կպահեն էդ պայմաններում», -ներկայացրեց կինը:
Panorama.am-ը փորձեց Հասմիկ Ասատրյանի փաստաբան Արթուր Սարգսյանից դատարանի կայացրած վճռի իրավական գնահատականների մասին տեղեկանալ, սակայն վերջինը մի զանգից հետո տեղեկանալով, որ լրագրող ենք, անջատեց հեռախոսը և մի քանի օր շարունակ ոչ մի հեռախոսազանգի չէր պատասխանում:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց