Ձեր վստահելի աղբյուրը

Լեռնային Ղարաբաղի հակամարտության կարգավորման գործընթացում լուծումներ կարող են գտնվել միայն այն դեպքում, երբ բանակցող կողմերն իրատեսական մոտեցում ցուցաբերեն: Արցախի հանրային հեռուստանընկերությանը տված հարցազրույցում, խոսելով ղարաբաղյան կարգավորման գործընթացի մասին, այսօր հայտարարել է ՀՀ Նախագահ Սերժ Սարգսյանը:

Պատասխանելով այն դիտարկմանը, որ օրեր առաջ Ադրբեջանի Նախագահը կրկին հայտարարել է, թե իբր ձեռք են բերվել համաձայնություններ ԼՂՀ հարակից շրջանները վերադարձնելու շուրջ, ըստ որում այդպիսի համաձայնություններ ձեռք են բերվել դեռևս տարիներ առաջ և իբր հայկական կողմը ներկայումս ձգձգում է բանակցությունները, նախագահ Սերժ Սարգսյանն ասել է. «Ես այդ հարցին անդրադարձել եմ և հիմա առանձնապես բան չունեմ ավելացնելու: Ուղղակի մեկ անգամ ևս ուզում եմ շեշտել, որ մենք շատ լրջորեն և պատասխանատվությամբ ենք մոտենում բանակցային ողջ գործընթացին: Ավելի շահագրգիռ կողմ, քան Լեռնային Ղարաբաղն է, քան Լեռնային Ղարաբաղի ժողովուրդն է` չկա: Եվ հենց Լեռնային Ղարաբաղն է ցանկանում, որպեսզի օր առաջ լուծվի այս խնդիրը»:

«Ես համոզված եմ, որ, իրոք, կան լուծումներ, սթափ լուծումներ: Դրանք կարող են գտնվել միայն այն պարագայում, երբ բանակցող կողմերն իրատեսորեն են մոտենում ստեղծված իրավիճակին, երբ նրանց ակնկալիքներն իրատեսական են: Մենք փնտրում ենք երկարաժամկետ լուծումներ, այնպիսի լուծումներ, որոնք, իրոք, խաղաղություն կբերեն և այն կլինի տևական: Ես չեմ կարծում, որ ճիշտ է գալ այնպիսի եզրակացությունների, այնպիսի լուծումների, որոնք ինչ-որ մի ժամանակահատվածի համար, միգուցե, կարող են լինել ընդունելի, բայց չեն կարող ապահովել, ինչպես արդեն ասացի, տևական խաղաղություն: Իհարկե, ցանկացած բանակցությունում կողմերից յուրաքանչյուրը ցանկանում է ստանալ առավելագույնը, բայց ես չեմ հասկանում այն, երբ բանակցությունների ընթացքում կողմերից մեկը ձգտում է ստանալ ամեն ինչ, ղեկավարվում է ՙամեն ինչ` ինձ՚ կարգախոսով: Նման պարագայում այդ կողմի համար բանակցությունները կարող են լինել ոչ դուրեկան, և բանակցությունների արդյունքները կարող են չբավարարել, բայց դա արդեն մեր մեղքը չէ: Հիմա մենք ապրում ենք 21-րդ դարում, երբ հնարավոր չէ շատ բան թաքցնել, և այս իրավիճակը տեսնում են շատ-շատերը` ոչ միայն մենք կամ բանակցող կողմերը: Երբ որ բանակցությունների մեր գործընկերները գան այն եզրակացության, որ պետք է լինի տրամաբանական լուծում, ապա այդ լուծումները հեշտությամբ կարող են գտնվել: Երբ որ նրանք իրատեսորեն մոտենան խնդրին և, դեկլարացիաներ անելուց բացի, իսկապես ցանկանան այն լուծել, այդ ժամանակ խնդիրը կլուծվի: Բանակցություններից հետո դժգոհություններ հայտնելը կամ հոխորտալը վերջնական լուծումը որևէ կերպ չի մոտեցնում: Այն, ընդհակառակը, խանգարում է բանակցային գործընթացին, ավելացնում է անվստահությունը:

Ուզում եմ կրկնել, որ բանակցությունների կոնտեքստից` լինեն դրանք նախկինում, թե հիմա, կտրել ինչ-որ հատված և փորձել այդ հատվածի մասին խոսել` ճիշտ չէ, մանավանդ որ մինչև խոսելն իրենք են վերապահումներ անում: Երբ իրենք ասում են, թե ամեն ինչ բանակցված չէ, եթե բոլոր կետերի շուրջ համաձայնություն ձեռք բերված չէ, սրանով արդեն ամեն ինչ ասվում է: Կարծում եմ` ճիշտ կլինի, որ և մենք, և ադրբեջանցիները մեր ջանքերը կենտրոնացնենք բանակցությունների ներկա փուլի վրա, ոչ թե փորձենք ինչ-որ հատված կտրել նախկին բանակցություններից և ներկայացնել սեփական լսարանին»: