Ձեր վստահելի աղբյուրը

Նոյեմբերի 7-ին` ժամը 22:00-ին, Թամանյան Պուրակում նոր վերանորոգված «Գաֆէսճեան քանդակներ» պարտեզի բացման արարողությունը կմեկնարկի աննախադեպ շքեղ հրավառությամբ:

Ինչպես տեղեկացանք Գաֆէսճեան արվեստի կենտրոնից, նոյեմբերի 8-ին` ժամը 10:00-ին տեղի կունենա Գաֆէսճեան արվեստի կենտրոնի պաշտոնական բացումը, որին ներկա կլինեն բազմաթիվ ականավոր գործիչներ: Այցելուները հնարավորություն կունենան տեսնելու Կասկադի հիմնովին վերանորոգված սրահները, որոնք կազմում են Գաֆէսճեան արվեստի նոր կենտրոնը:


Այդ օրը Գաֆէսճեան թանգարանի խանութում տեղի կունենա «Լիբենսկի Բրիխտովա» գրքի շնորհանդեսը: Յարոսլավա և Լիբենսկի Բրիխտովաները 20-րդ դարի ամենաազդեցիկ ապակեգործ արվեստագետներից են: Նույն օրը Գաֆէսճեան արվեստի նոր կենտրոնի «Սասունցի Դավիթ» սրահում տեղի կունենա ապակե աբստրակտ քանդակների «Հայաստանի համար» խորագրով ցուցահանդեսը:

Նոյեմբերի 8-ին` Գաֆէսճեան արվեստի նոր կենտրոնի հատուկ միջոցառումների սրահում` ժամը 13:00-ին, տեղի կունենա հանդիպում`Սինթիա Լենոնի և Փաթի Բոյդի հետ: Սինթիա Լենոնը և Փաթի Բոյդը` Բիթլզի անդամներ Ջոն Լենոնի և Ջորջ Հարիսոնի նախկին կանայք առաջին անգամ են հանդես գալու միևնույն բեմում և պատմելու մանրամասներ իրենց ամուսինների արտասովոր կյանքից և երաժշտությունից: Հանդիպման մասնակցելու համար մուտքը լինելու է տոմսերով:

Նույն օրը նաև տեղի կունենա Սինթիա Լենոնի «Ջոնը» գրքի շնորհանդեսը: Գրքում Սինթիան ներկայացրել է Լենոնի հետ իր տասնամյա ամուսնական կյանքից մանրամասներ: Այդ օրը նաև տեղի կունենա Փաթի Բոյդի «Հիասքանչ երեկո. Ջորջ Հարիսոնը, Էրիկ Քլեփթոնը և ես» գրքի շնորհանդեսը: Գրքում Փաթիի լուսանկարները
ներկայացնում է ` Բիթլզի անդամներ Հարիսոնի, Քլեփթոնի և իր շուրջերկրյա ճամփորդությունների մանրակրկիտ պատկերները: Նոյեմբերի 8-ին` ժամը 19:00-ին տեղի կունենա նաև «Նյու Յորք Թայմզ» թերթի արվեստի գլխավոր քննադատ Մայքլ Քիմելմանի դասախոսությունը: