Արթուր Բաղդասարյանը փորձեր է անում վերացնել հայ կնոջ խնդիրները, նրանց տանջող կարծրատիպերը
«Օրինաց երկիր» կուսակցության նախագահ Արթուր Բաղդասարյանը Ազգային ժողովի բոլոր գումարումների պատգամավոր է եղել, բացի այդ` 3 և կես տարի էլ ղեկավարել է խորհրդարանը ու հասկացել, որ կնոջ ներկայութնունը օրենսդիր մարմնում թուլացնում է լարվածությունը և ներդաշնակություն բերում: Ու չնայած դրան, ԱԺ «Օրինաց երկիր» խմբակցությունում միակ կինը Հեղինե Բիշարյանն է: Իսկ ընդհանուր առմամբ, խորհրդարանում աշխատող 131 պատգամավորներից միայն 12-ն են կանայք:
Առավել տխուր է իրավիճակը գործադիր մարմնում, որտեղ ղեկավար կանանց թիվը անհամեմատ քիչ է` 2 կին նախարար: Իսկ ահա նախարարություններում` որպես շարքային աշխատողներ, կանանց թիվը անհամեմատ մեծ է: Այդպիսի նախարարություններ են, օրինակ, էներգետիկայի, պաշտպանության նախարարությունները:
Այս ուսումնասիրությունը կանանց հիմնախնդիրների, գենդերային հասավարության ու ներգրավվածության թեմայի շրջանակներում անցկացրել է «Օրինաց երկիր» կուսակցությունը, որի արդյունքներն այսօր լրագրողներին ներկայացրեց ՕԵԿ նախագահ Արթուր Բաղդասարյանը:
Հենց այդ ուսումնասիրության ժամանակ էլ նրանք պարզել են, որ հայ կինը, հատկապես գյուղական վայրերում շատ վատ է ապրում. գյուղաբնակ տղամարդկանց 22 տոկոսը մեկնում է արտագնա աշխատանքի, իսկ ընտանիքի ողջ հոգսն ընկնում է կանանց ուսերին: Հայաստանյան գյուղապետերի միայն 2 տոկոսն է կին, իսկ դրան հակառակ` գյուղապետարաններում աշխատողների մեծ մասը կանայք են: «Այսինքն` կանանց ներգրավվածությունը մեծ է այնտեղ, որտեղ պատասխանատու աշխատանքը քիչ է», - եզրակացրել է Արթուր Բաղդասարյանը:
ՕԵԿ նախագահի խոսքերով, կանայք իրենք իրենց նկատմամբ ինքնախտրականություն են ցուցաբերում և կարծում են, որ մեծ պատասխանատվությամբ աշխատանք չեն կարող անել:
«Բայց փոխել է պետք այդ ստերեոտիպները: Բոլորս էլ հասկանում ենք, որ իսկապես փոփոխության կարիք կա` հասարակական-քաղաքական կյանքում կանանց ներգրավվածությունը մեծացնելու իմաստով»,- հայտարարեց Բաղդասարյանը:
Այդ փոփոխությունների ճանապարհին ՕԵԿ-ը կանգնած է արդեն հինգ տարի, քանզի համապատասխան օրինագիծը համառորեն կառավարության հաստատմանը չի արժանանում: «Ինչո՞ւ չի ընդունվում, որովհետև կանանց հիմնախնդիրների հանդեպ կա անլուրջ վերաբերմունք»,- նկատեց Արթուր Բաղդասարյանը:
Հանդիպմանը ներկա Հեղինե Բիշարյանն ասաց, որ կառավարության հետ արդեն եկել են համաձայնության և որոշ լրամշակումներից հետո օրինագիծը կներկայացվի Ազգային ժողով:
Ինչևէ, ՕԵԿ-ում հույս ունեն, որ համապատասխան օրենսդրության ապահովման պարագայում` գերատեսչություններում կանանց ակտիվությունը կապահովվի, կանանց և տղամարդկանց իրավունքների հավասարություն կլինի, 45-ից բարձր տարիքի կանայք կրթական համապատսախան վերապատրատում անցնելուց հետո աշխատանք կունենան: