Ձեր վստահելի աղբյուրը

Ադրբեջանական «Թուրան» գործակալությունն այսօր հրապարակել է «Իլհամ Ալիևի դասախոսությունն աշխարհաքաղաքականության մասին» վերտառությամբ հոդված, որտեղ անդրադարձ է կատարել նախօրեին երկրի կառավարության նիստում Ադրբեջանի նախագահի ունեցած ելույթին:

Լրատվամիջոցը, նշելով, որ «նա անհասցե քննադատել է ինչ-որ երկրների` Հայաստանին աջակցություն ցուցաբերելու համար», մեջբերումներ է արել Իլհամ Ալիևի խոսքից, դրանք մերթընդմերթ ընդհատելով հեգնական բնութագրականներով` «սպառնաց», «շարունակեց ներկայացնել իր նեղվածությունը», «վրդովված ասաց» և այլն:

Հիշեցնենք, որ երեկվա իր ծավալուն հայտարարությամբ որդի Ալիևը նախ վերաշարադրել էր ղարաբաղյան հակամարտության կարգավորման իր պատկերացումները, զայրացել, որ միջազգային հանրությունը դրանք չի ընկալում որպես միակ ճշմարիտ ուղի, որոշ երկրների մեղադրել հայամետության համար, իսկ վերջում անակնկալ հայտարարել, որ հայ-թուրքական հարաբերությունների կարգավորումն այդ երկու երկրների խնդիրն է, և ոչ իրենք, ոչ էլ այլ երկրները չպետք է միջամտեն դրան:

Ալիևի այս հայտարարություններն ամբողջությամբ ներկայացնելուց զատ, «Թուրան» գործակալության փորձագիտական բաժինը մեկնաբանել է.

«Ալիևի խոսքերից հասկանալի չէ, թե ո՞ւմ է նա քննադատում` Թուրքիայի՞ն, թե՞ ԵԱՀԿ Մինսկի խմբի անդամներին: Հայաստանի հետ սահմանը բացել Թուրքիան է ցանկանում, և եթե Ալիևը դա ընկալում է որպես ագրեսորին աջակցություն, ապա` ի՞նչ մեղք ունեն այստեղ մյուսները: Հասկանալի չէ, թե ի՞նչ շանտաժի ու ճնշումների մասին է խոսում Ալիևը, և ո՞ւմ շահերն է նա մտադիր չհարգել: Բայց, պաշտոնական քարոզչությունը և իշխանամետ ԶԼՄ-ները վերջին շրջանում կոշտ քննադատության են ենթարկում ԱՄՆ-ին` Վաշինգտոնին մեղադրելով Հայաստանին սատարելու մեջ»:

Նկատենք, որ Ալիևի «անհասցե քննադատությունից» մեկ օր անց նրա աշխատակազմի առանցքային դեմքերից մեկը` Ալի Հասանովը հստակեցրել է դժգոհության հասցեատիրոջը:

Այսօր կայացած ասուլիսում Ալի Հասանովը հայտարարել է, որ Ադրբեջանը դժգոհ է ԵԱՀԿ Մինսկի խմբում ԱՄՆ-ի գործունեությունից: Նույն ասուլիսում Ալի Հասանովը պրոռուսական հայտարարություններ է արել` նշելով, որ Ռուսաստանը «վերջին 200 տարիներին նպաստել է ադրբեջանցիների լուսավորմանը»:
Նկատենք, որ ավելի վաղ թուրքական մամուլն է անակնկալի եկել Իլհամ Ալիևի հայտարարություններից: Թուրքական մի շարք ազդեցիկ թերթեր, եղբայրական ժողովրդի առաջնորդի ասածները մեկնաբանել են այսպես` «Ալիևը թույնի նման խոսեց»:

 

Հարակից  նորություններ`  Թուրքական լրատվամիջոցներ. Ալիևը խոսեց թույնի նման
                                             Վաշինգտոնյան հանդիպումներն անհանգստացրել են Բաքվին