«Թուրքական շոուն սկսվում էր հենց Վանի օդանավակայանից».Լրագրող
«Թուրքական շոուն սկսվում էր հենց Վանի օդանավակայանից. թուրքերը պատրաստել ու տարածում էին աղավաղված տեղեկատվություն պարունակող բուկլետներ, որտեղ ոչ մի խոսք չկար, որ Վանն ունի հայկական արմատներ կամ այն հիմնադրել են հայերը: Նույնիսկ քարտեզներում հայկական տեղանունները լիովին փոխված անուններով էին ներկայացված»,-լրագրողների հետ հանդիպման ժամանակ ասաց Panorama.am-ի թղթակից Հասմիկ Համբարձումյանը, ով Հրանտ Դինք հիմնադրամի կողմից հրավիրված ևս 8 լրագրողների հետ սեպտեմբերի 12-19-ը եղել էին Թուրքիայում, մասնակցել Աղթամարի Սուրբ Խաչ եկեղեցում մատուցված պատարագին:
«Հայաստանի իշխանությունները, Մայր Աթոռը ճիշտ էին վարվել, որ հրաժարվել էին մասնակցել այդ շոուին, բայց պետք է գոնե 30 հոգանոց մի խումբ պատրաստեին ու ուղարկեին Վան: Նրանք պետք է իրենց հետ տանեին ու ուխտավորներին բաժանեին բուկլետներ, որտեղ ներկայացված կլիներ կրկին Վանի պատմություն, բայց իրական պատմությունը: Մեր պետությունը պետք է մտածեր այդ մասին: Թուրքերի կողմից պատրաստված բուկլետներում ներկայացված պատմությունը շատ խառն էր»,- շարունակեց ասուլիսին ներկա «Ազգ»-ի լրագրող Մարիետա Խաչատրյանը:
Խոսելով պատարագի մասին, Internews-ի լրագրող Արմեն Սարգսյանն ասաց, որ ընդհանուր առմամբ 1000-1500 հոգի է մասնակցել: Պատարագը լուսաբանելու համար կղզի էր գնացել մոտ 300 լրագրող, շատ են եղել ոստիկանները, անվտանգության ծառայողները, որոնք ամեն քայլափոխի հետևել են լրագրողներին: Պատարագին մասնակցել է մոտ 400 հայ: Շատ են եղել ստամբուլահայերը: Մ. Խաչատրյանը նշեց, որ ստամբուլահայերը տարբերվում էին Հայաստանից ու այլ երկրներից ժամանած հայ ուխտավորներից. «Պոլսահայերի տրամադրությունը մի փոքր ուրիշ էր: Կարծես` մենակ էին մնացել: Ճիշտ է, նրանք էլ էին ցավում, որ եկեղեցու գմբեթին խաչը չի տեղադրվել, բայց չէին կարող բողոքել»:
Այն փաստը, որ խաչը չի տեղադրվելու եկեղեցու գմբեթին, հայ լրագրողներին ստիպել է գոնե ինչ-որ մի ձևով իրենց բողոքն արտահայտել: Նրանք նախապես Հայաստանից տարած փայերից պատրաստել են խաչեր ու մոտ մեկ ժամ բարձրացրած կանգնել եկեղեցու բակում: Այս յուրօրինակ ակցիան չի վրիպել ոչ թուրք, ոչ էլ օտարերկրյա լրագրողների ուշադրությունից: Նրանք մոտեցել են հայ լրագրողներին ու հարցրել նպատակը: «Պարզելով խաչերը, մենք մեզ լավ էինք զգում, գոնե մի բանով փորձում էինք հասկացել, որ խաչը անհրաժեշտ է տեղադրել հայկական եկեղեցու գմբեթին, որ իրենք սխալ որոշում են կայացրել»,- ասաց Հ. Համբարձումյանը: Հայ լրագրողների բողոքի ակցիան որևէ խոչընդոտի չի հանդիպել:
Լրագրողների աշխատանքին, ինչպես ասաց «Առավոտի» լրագրող Գոհար Հակոբյանը, խոչընդոտել են պոլսահայ քահանաները: Նրանք շատերին չեն թողնել մտնել եկեղեցի ու նկարահանումներ կատարել, թեև նախապես ասված է եղել, որ լրագրողները կարող էին հինգ րոպե մտնել եկեղեցի, կատարել նկարահանումներ, անել հարցազրույցներ: Նույնիսկ մի քանի լրագրողի ձեռքից են քաշել ու դուրս հրավիրել:
«Դու քեզ վատ էիր զգում, որ քո հողում քեզ հետ այդպես են վարվում»,- ասաց Armenianow-ի լրագրող Գայանե Մկրտչյանը:
Բայց և այնպես:
«Սուրբ Խաչում մատուցված պատարագը հիանալի էր, լեռների մեջ գեղեցիկ էր հնչում: Իսկապես, շատ սրտեր հուզեց»,-ասաց Մ. Խաչատրյանը:
Լրահոս
Տեսանյութեր
Գևորգ Դանիելյան. Շատ վատ է, որ մենք չենք օգտագործում Սահմանադրության անվտանգության բարձիկները
