Դավիթ Ջամալյանը ընդունում է. «Կա բարձր սպայակազմի կողմից ստորադասների «հովանավորչություն»
Ջոկի հրամանատար հանդիսացող սերժանտական անձնակազմի` պայմանագրայիններով համալրման գործընթացը պետք է իրականացվի ոչ միայն առաջին գծում և սահմանամերձ զորամասերում, այլ նաև թիկունքային ստորաբաժանումներում: Այս մասին այսօր ասուլիսի ժամանակ կարծիք հայտնեց ռազմական հոգեբան, Պաշտպանության նախարարությանը կից հանրային խորհրդի անդամ Դավիթ Ջամալյանը` խոսելով հայկական զինված ուժերում ընթացող բարեփոխումների մասին:
«Ստորաբաժանումները պետք է համալրվեն գրագետ, ծառայություն անցած պայմանագրային սերժանտական կազմով», - ասաց նա:
Անդրադառնալով հայկական բանակում վերջին տարիներին հրապարակայնություն ստացած մի քանի դժբախտ պատահաներին` ռազմական հոգեբանն ասաց.
«Զինված ուժերում առկա են այն բոլոր արատները, որոնք կան նաև հասարակության մոտ, բայց դա չի նշանակում, որ վիճակն անելանելի է և խորը ճգնաժամի մեջ ենք: Ո´չ, չեմ ասում, որ խնդիրը ժխտելով, այն կարող է լուծվել, բայց միևնույն ժամանակ պետք է հստակ պատկերացում, թե ինչ է պետք անել»:
Նշելով, որ ողբերգական ելքով դեպքերից զգալի թիվ են կազմում սպա – ժամկետային զինծառայող փոխհարաբերությունները, ռազմական փորձագետը կարևորեց նաև զինվորական անձնակազմի մոտ կանոնադրական նորմալ փոխհարաբերությունների ամրապնդումը: «Շատ հարցեր կան զինծառայող-զինծառայող հարթությունում», - ասաց նա:
Բանախոսը համաձայնվեց դիտարկման հետ, որ որոշ զորամասներում կա բարձր սպայակազմի կողմից ստորադասների «հովանավորչություն»` հույս հայտնելով, որ այդպիսի երևույթն արմատախիլ կարվի:
«Այո, կա նման հովանավորչություն, մենք չենք կարող նման երևույթների վրա աչք փակել, բայց, եթե կան կոնկրետ դեպքեր կամ կոնկրետ հարց է բարձրացվում և այն հասնում է նախարարին, անհապաղ լուծում է գտնվում», - ասաց նա` կարևորելով բանակ – հասարակություն – լրատվամիջոցներ համագործությունը:
«Հովանավորչության դեմ պայքար տարվում է, ուղղակի պետք է այդ երևույթի մասին խոսել առանց որևէ պոպուլիստական կամ քաղաքական դրսևորումների: Դեպքի մասին պետք է հուշել, ասել, և արձագանքը կլինի», - նշեց նա:
Դ.Ջամալյանի դիտարկմամբ` բանակում տեղի ունեցած դժբախտ պատահաները մեծապես կապված են վաշտերի և դասակների հրամանատար սպաների հետ:
«Դասակ և վաշտ օղակում, իրոք, լուրջ անելիքներ կան: Վաշտի հրամանատարությունը կիսով չափ կայացած օղակ է, իսկ դասակ օղակը` կայացման ճանապարհին է», - ասաց նա` շեշտելով, որ գումարտակների և գնդերի հրամանատարությունը համակրված է բանիմաց և փորձառու անձնակազմով:
«20 տարի հետո մենք հասանք նրան, որ գունդ և գումարտակ օղակների հրամկազմը դառնա պրոֆեսիոնալ, լինի կայացած: Այսքան տարի ամբողջ սպայակազմը կայաղնելու համար դեռ բավարար չէ, օբյեկտիվորեն քիչ է: Մեր 20-ամյա բանակը մենք չենք կարող համեմատել ռուսական կամ ամերիկյան բանակների հետ: Ամերիկյան բանակի կորիզը նրանց սերժանտական անձնակազմն է», - նշեց նա` հույս հայտնելով, որ որոշ ժամանակ անց մենք նույնպես կայացած դասակ և վաշտ կունենանք:
«Այստեղ շատ անելիք կա սպայական կազմի պատրաստման առումով: Մենք պետք է ավելի հրապուրիչ դարձնենք նաև սպայի մասնագիտությունը և ռազմական ինստիտուտի դիմումների մեջ կարողանանք ընտրություն կատարել», - ասաց նա:
Մեկնաբանելով այն կարծիքը, թե քաղաքացիական` նախարարի և զինվորական` շտաբի պետի պաշտոնները անհամատեղելի են և խանգարում են միմիանց` Դ.Ջամակյանն ասաց.
«Բարեփոխումների տրամաբանությունը եղել է այն, որ այդ պաշտոնները իրար ոչ թե խանգարեն, այկ փոխլրացնեն: Ուղղակի դա նոր կյանք մտած սիստեմ է, գուցե ինչ որ անհարթություններ են առաջանում աշխատանքի մեջ, բայց ընթացքում դրանք շտկվում են», - ասաց ՊՆ կից հանրային խորհրդի անդամը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
