Ձեր վստահելի աղբյուրը

Հայաստանի Հանրապետության գյուղատնտեսության նախարարությունը, Հայաստանի արդյունաբերողների և գործարարների (գործատուների) Միությունը և LOGOS EXPO Center ցուցահանդեսային ընկերությունը հրավիրում են Ձեզ այցելել «ArmProd EXPO 2012» միջազգային մասնագիտացված ցուցահանդեսը, որը տեղի կունենա հոկտեմբերի 19-21, Կառավարության շենք, նիստերի դահլիճի նախասրահում, Մելիք Ադամյան 1, ք. Երեւան, Հայաստանի Հանրապետություն: Պաշտոնական բացման արարողությունը ներկա կլինի Հայաստանի Հանրապետության նախագահ Սերժ Սարգսյանը:

Ցուցահանդեսի կազմակերպիչների փոխանցմամբ, մեծ հեղինակություն վայելող և ձևավորված ավանդույթներով Հանրապետության խոշորագույն միջազգային սննդի «ArmProd EXPO» ցուցահանդեսը համարվում է տարվա գլխավոր իրադարձություններից մեկը, որին մասնակցում են սննդամթերքի և խմիչքների առաջատար արտադրողները, մատակարարները և դիստրիբյուտորները:

Սննդարդյունաբերության ոլորտի առաջատար հայրենական կազմակերպությունները և սննդի խոշորագույն հայկական ընկերություններն ընտրում են այս ցուցահանդեսը` ներկայացնելու համար իրենց արտադրանքը և ինովացիոն մշակումները, քանի որ «ArmProd EXPO» ցուցահանդեսը նպաստում է բարձրորակ սննդամթերքի իրացմանը, կոմերցիոն արդյունավետությանը և ժամանակակից փոփոխվող շուկային համապատասխանող նոր մոտեցումներ ու գործնական լուծումների հայտնաբերմանը:

Հատկանշական է, որ ոլորտի առաջատար ընկերությունների հետ միասին ցուցահանդեսին մասնակցում են նաև փոքր և միջին բիզնեսի ներկայացուցիչներ, ում արտադրանքը արդեն որոշակի տեղ է գրավում երկրի ներքին շուկայում, և «ArmProd EXPO» ցուցահանդեսը բացառիկ հնարավորություն է ընձեռում հանգամանորեն ցուցադրել սննդամթերքի ողջ տեսականին, առավել լիարժեք ուսումնասիրել և ստանալ անհրաժեշտ տեղեկատվություն Հայաստանում և ողջ տարածաշրջանում գործող ֆիրմաների, կազմակերպությունների և ապրանքանիշերի մասին և ստանալ գործնական տեղեկատվություններ ու կանխատեսումներ շուկայի զարգացման մասին, գտնել շահավետ գործընկերներ կամ օտարերկրյա ներդրողներ: «ArmProd EXPO» ցուցահանդեսը նպաստում է նաև արտադրողների, դիստրիբյուտորների, բիզնես-խորհրդատուների, սպառողական շուկայի հետազոտողների անմիջական բանակցություններին սննդի ցանցերի մատակարարների հետ:

«ArmProd EXPO» ցուցահանդեսը ամբողջությամբ ընդգրկում է Հայաստանի սննդի շուկան և հատվածավորվում է թեմատիկ բաժինների` համախմբելով սննդամթերքի արտադրության և վերամշակման գրեթե բոլոր ոլորտները խոշորագույն սննդի ցուցահանդեսում, և արտացոլում ներքին և արտաքին ագրոբիզնեսի զարգացման հիմնական միտումները:

Ցուցահանդեսային ֆորումի հիմնական նպատակներն ու խնդիրները`
• նոր իրացման շուկաների որոնում,
• օտարերկրյա ներդրումների ներգրավում Հայաստանի տնտեսություն,
• Հայաստանի տնտեսական ներուժի ցուցադրում,
• նոր գործընկերների որոնում:

«ArmProd EXPO 2012» ցուցահանդեսի հիմնական թեմատիկ բաժիններն են.

Գինիներ, շամպայն, կոնյակ, օղի, լիկյոր
Բնական հյութեր, գարեջուր, հանքային ջրեր և ոչալկոհոլային խմիչքներ
Մսի եւ կաթնամթերքի արտադրություն
Յուղի և ձեթի արտադրություն
Սառեցված կիսաֆաբրիկատներ
Պահածոյացված մրգեր եւ բանջարեղեն
Հրուշակեղեն
Սուրճ, թեյ, նպարեղեն
Ծխախոտ եւ ծխախոտային արտադրատեսակներ
Սննդարդյունաբերության սարքավորումներ
Փաթեթավորման նյութեր, խցանափակման արտադրանքներ
Տպագրական արտադրանք

Կազմակերպչի մասին
LOGOS EXPO Center-ը առաջին մասնավոր ցուցահանդեսային ընկերությունն է Հայաստանում (1999), որը հանդիսանում է բացարձակ առաջատարը ճյուղային, արդյունաբերական, ազգային և միջազգային ցուցահանդեսների և կոնգրեսների կազմակերպման ոլորտում ինչպես Հայաստանում, այնպես էլ արտերկրում:
Վերջին 12 տարիների ընթացքում LOGOS EXPO Center - ը կազմակերպել է ավելի քան 200 մասնագիտական և ունիվերսալ միջազգային ցուցահանդեսներ, որոնք ներառում են տնտեսության տարբեր ոլորտները:
LOGOS EXPO Center ընկերությունը ՀՀ կառավարության, ՀՀ նախարարությունների և գերատեսչությունների, միությունների, ՀՀ-ում օտարերկրյա դեսպանատների աջակցությամբ ամեն տարի անցկացնում է մինչև 15 մասնագիտացված ցուցահանդեսներ, որոնք արտացոլում են ազգային տնտեսության զարգացման դինամիկան: