Ձեր վստահելի աղբյուրը

Հայկական արմատներ ունեցող ֆրանսիացի երաժիշտ, կոմպոզիտոր, գործիքավորող, դաշնակահար Միշել Լեգրանի 80-ամյակի առիթով վաղը Հայաստանի պետական ֆիլհարմոնիկ նվագախումբը Լոնդոնի City Lights Entertainment-ի հետ համատեղ  Արամ Խաչատրյան համերգասրահում հանդես է գալու համերգային ծրագրով, որի մասնակցելու է հենց աշխարհահռչակ արվեստագետը: Հայ լրագրողների հետ հանդիպման ժամանակ Միշել Լեգրանը խոսեց իր ստեղծագործական գործունեությունից, կյանքից, ապագա ծրագրերից:

Տարիք
Ես չեմ զգում իմ տարիքը որպես ծանրություն իմ ուսերին: Ընդհանրապես, ծննդյան տոնակատարությունները ինձ չեն հետաքրքրում, մի էտապ է, որն անցնում է:

Անցած կյանք
Կյանքիս անցած որևէ հատված վերապրելու ցանկություն չունեմ, որովհետև ես անցյալին կապված չեմ:

Երջանկության բանալի
Դժվար է պատասխանել, թե որն է երջանկության բանալին: Երևի իմ կյանքը երաժշտությանը նվիրելն է, երաժշտությունն իմ կիրքն է, այդ պատճառով շատ եմ գրում, հորինում, շատ եմ աշխատում:

Ստեղծագործական անցյալն ու ապագան
250 ֆիլմի երաժշտությում եմ գրել, 800 երգի հեղինակ եմ, 100 ձայնասկավառակ եմ թողարկել: Չեմ կարծում, որ որևէ մի ստեղծագործություն մյուսից կարևոր է: Որևէ բանի համար չեմ ցավում, չեմ ափսոսում: Հպարտ եմ այն ամենով, ինչ արել եմ: Հաջորդ տարի նախատեսում եմ գրել երաժշտություն նոր ֆիլմի համար, որը նկարահանելու եմ անձամբ: Երաժշտական ֆիլմ կլինի: Մեծ բալետ եմ գրում: Իմ առաջին բալետն է: Ամերիկյան մի ֆիլմի համար երաժշտություն եմ գրում, շուտով կավարտեմ: Գրել եմ կոնցերտ տավիղի և նվագախմբի համար` իմ տիկնոջ համար (տավիղահար Քեթրին Միշել), թավջութակի և նվագախմբի համար պետք է կոնցերտ գրեմ: Մեծ նախագծեր ունեմ, դա ինձ ուրախացնում է:

Հայաստան
Հայաստանն իմ սրտի համար յուրահատուկ երկիր է: Հայ պապիկս 1942 թվականին է մահացել: 10 տարի նրա մոտ եմ ապրել: Շատ բան է պատմել Հայաստանի մասին: Դաշնամուրի վրա ինձ ցույց էր տալիս այն ակորդները, որոնցով կարելի էր նվագակցել հայկական ժողովրդական գործիքներին: Նա մեծ, թախծոտ սեր ուներ Հայաստանի նկատմամբ: Առաջին անգամ լինելով Հայաստանում (2009 թ.), հանդիպեցի իմ գերադաստի անդամներին, որոնց մասին չգիտեի: Հայերի հետ հավասար լացել եմ անցյալի համար:
Հայկական ֆիմեր շատ քիչ եմ դիտել: Իսկ եթե առաջարկ լինի, որ հայկական ֆիլմի համար երաժշտություն գրեմ, անպայման կգրեմ:

Հայաստանի պետական ֆիլհարմոնիկ նվագախումբ
Չէի լինի այստեղ, եթե նվագախումբը լավը չլիներ:

Ծննդյան նվերներ
Երբեք չի կարելի պահանջնել նվերներ: Մի բան, որ ես կուզենայի ստանալ` Մարտիրոս Սարյանի նկարներից մեկը:

Մրցանակներ
Մրցանակները կարծես շաքարի կտորներ լինեն, որոնք տալիս են քո կատարած աշխատանքի համար: Երբեք չի կարելի մտածել, որ շաքարի բոլոր կտորները քեզ տվել են:

Նշենք, որ Մ. Լեգրանի 80-ամյակին նվիրված տոնակատարությունը կազմակերպվում է Երևանյան 6-րդ միջազգային երաժշտական փառատոնի շրջանակներում: Փառատոնն անցկացվում է ՀՀ մշակույթի նախարարության աջակցությամբ և ՀՀ առաջին տիկին Ռիտա Սարգսյանի բարձր հովանու ներքո:

Մ. Լեգրանը ծնվել է 1932 թվականի փետրվարի 24-ին, Ֆրանսիայում: Մայրը` Մարսել-Տեր Միքայելյանը, սերում է հայկական ազնվական ընտանիքից: Միշել Լեգրանը ավելի շատ հայտնի է ֆիլմերի (շուրջ 200) համար գրված իր երաժշտությամբ: Նրան մեծ հռչակ բերեց «Շերբուրգյան անձրևանոցներ» ֆիլմը: Նա բազմաթիվ հեռուստատեսային հաղորդումների, երաժշտական սցենարների հեղինակ է: Միշել Լեգրանը ավելի քան 100 ձայնասկավառակ է թողարկել: Նա 3 անգամ արժանացել է «Օսկար»-ի, 5 անգամ «Գրեմի» և «Էմմի», 12 անգամ «Ոսկե գլոբուս» մրցանակների: 2003թ.-ին ստացել է «Պատվո լեգեոն» շքանշանը: 22 տարեկանում նա թողարկում է իր առաջին ձայնասկավառակը, որը դառնում է երբևիցե ամենաշատ վաճառված ձայնասկավառակներից մեկը: