Առաջարկվում է պատիժներ սահմանել զինվորական ծառայության կարգի դեմ ուղղված հանցագործությունների դեպքերում
ԱԺ պաշտպանության, ազգային անվտանգության և ներքին գործերի մշտական հանձնաժողովի նիստում Կորյուն Նահապետյանի նախագահությամբ քննարկվել է «Այլընտրանքային ծառայության մասին» ՀՀ օրենքում փոփոխություններ եւ լրացումներ կատարելու մասին» և «ՀՀ քրեական օրենսգիրքը գործողության մեջ դնելու մասին» ՀՀ օրենքում լրացումներ կատարելու մասին» օրինագծերի փաթեթը, որը ներկայացրել է ՀՀ արդարադատության նախարար Հրայր Թովմասյանը: Այս մասին տեղեկացնում են ԱԺ հասարակայնության և տեղեկատվության միջոցների հետ կապերի վարչությունից:
Հիմնական զեկուցողի տեղեկացմամբ՝ «Այլընտրանքային ծառայության մասին» ՀՀ օրենքում փոփոխություններ և լրացումներ կատարելու մասին» նախագիծը նախատեսում է այլընտրանքային զինվորական ծառայությունը տարանջատել այլընտրանքային աշխատանքային ծառայությունից՝ որպես չափանիշ դիտարկելով այն, թե անձի կրոնական դավանանքը կամ հայացքները հակասում են արդյոք ռազմական ստորաբաժանումներում զինվորական ծառայություն անցնելուն կամ էլ զենք կրելուն ու օգտագործելուն:
Նախատեսվում է որոշակիորեն կրճատել այլընտրանքային ծառայության ժամկետները՝ այլընտրանքային զինվորական ծառայության ժամկետ սահմանելով 30, իսկ այլընտրանքային աշխատանքային ծառայության ժամկետ՝ 36 ամիսը:
Նախագծով սահմանվում է այլընտրանքային ծառայության հարցերով հանրապետական հանձնաժողովի ներկայացուցչական կազմը՝ ներառելով տարածքային կառավարման, առողջապահության, աշխատանքի և սոցիալական հարցերի, կրթության և գիտության, ոստիկանության և պաշտպանության, պետական կառավարման մարմինների ու կառավարության աշխատակազմի ազգային փոքրամասնությունների և կրոնի ոլորտները համակարգող ստորաբաժանման մեկական ներկայացուցչի:
Օրենքի նախագիծը կարգավորում և հստակեցնում է այլընտրանքային ծառայության հարցերով հանրապետական հանձնաժողովի կողմից դիմումները քննարկելու, դրանց վերաբերյալ որոշումներ ընդունելու, դրանք բողոքարկելու ընթացակարգերը:
Լրացումներ են կատարվել նաև «ՀՀ քրեական օրենսգիրքը գործողության մեջ դնելու մասին» ՀՀ օրենքում: Այն անձինք, ովքեր պարտադիր զինվորական ծառայությունից խուսափել են կրոնական համոզմունքների կամ հայացքների պատճառով Հայաստանի Հանրապետության կողմից համապատասխան միջազգային պարտավորությունները ստանձնելու պահից մինչև «Այլընտրանքային ծառայության մասին» ՀՀ գործող օրենքի ընդունումը, պետք է օրենքի ուժով ճանաչվեն դատվածություն չունեցող: Այն անձինք, ովքեր գործող օրենքի ընդունումից հետո դատապարտվել են ՀՀ քրեական օրենսգրքով նախատեսված համապատասխան հանցագործությունների կատարման համար, լիազոր մարմնի եզրակացության հիման վրա նույնպես պետք է ճանաչվեն դատվածություն չունեցող, իսկ նրանք, ովքեր այս օրենքի օրինական ուժի մեջ մտնելու պահին դեռևս շարունակում են պատիժ կրել, պետք է հնարավորություն ունենան անցնելու այլընտրանքային ծառայության:
Հարակից զեկուցող, հանձնաժողովի նախագահ Կորյուն Նահապետյանը, կարևորելով ներկայացված օրինագծերի փաթեթը և՛ մարդու իրավունքների, և՛ ազգային անվտանգության տեսանկյունից, մտահոգություն է հայտնել, որ դիմումատուի պահանջը բավարարելու կամ մերժելու իրավասությունը հանրապետական հանձնաժողովին վերապահելը կարող է խնդիրներ առաջ բերել կամ սուբյեկտիվ լուծումների տեղիք տալ, և գերադասելի համարեց օրենքում հատուկ չափորոշիչներ ներառել, ինչը հարցի լուծումը կդարձնի առավել օբյեկտիվ: Նման մտահոգություն են հայտնել նաև քննարկմանը ներկա հասարակական կազմակերպությունների ներկայացուցիչները:
ՀՀ արդարադատության նախարար Հրայր Թովմասյանը, այնուհետև ՀՀ արդարադատության նախարարի տեղակալ Գրիգոր Մուրադյանը նշել են, որ հիմքն ակնհայտ է. դա անձի կրոնական դավանանքի կամ հայացքների հակասությունն է ռազմական ստորաբաժանումներում զինվորական ծառայություն անցնելուն կամ էլ միայն զենք կրելուն և օգտագործելուն: Ինչ վերաբերում է չափորոշիչներին, այդպիսին հնարավոր չէ արձանագրել օրենքում, քանի որ դիմումատուն պետք է ապացուցի իր ներկայացրած հիմքերը, որոնք կարող են տարբեր լինել, իսկ հանձնաժողովը, հենվելով նրա ներկայացրած փաստերի հավաստիության վրա, պետք է համապատասխան որոշում կայացնի: Հիմնական զեկուցող Հրայր Թովմասյանը հավաստիացրել է, որ եթե կոնկրետ չափորոշիչներ առաջարկվեն, որոնք ընդհանրական լինեն բոլոր դիմումատուների համար և խնդիրը կարգավորելու հնարավորություն տան, կառավարությունը պատրաստ է դրանք քննարկելու և ներառելու օրենքում:
Հանձնաժողովի նախագահ Կորյուն Նահապետյանը պատգամավորներին առաջարկել է դրական եզրակացություն տալ նախագծին՝ նստաշրջանի և առաջիկա քառօրյա նիստերի օրակարգերում ընդգրկելու համար: Նա տեղեկացրել է նաև, որ օրինագծի տարբեր դրույթների, ինչպես նաև այլ օրենքների հետ համապատասխանեցման վերաբերյալ ինքն ունի առաջարկներ, որոնք կներկայացնի մինչև երկրորդ ընթերցում:
Հանձնաժողովը դրական եզրակացություն է տվել քննարկված նախագծին, իսկ հանձնաժողովի նիստի օրակարգում ներառված «Փողերի լվացման և ահաբեկչության ֆինանսավորման դեմ պայքարի մասին» ՀՀ օրենքում փոփոխություններ կատարելու մասին» և հարակից 14 օրենքներում փոփոխություններ ու լրացումներ առաջարկող օրինագծերի փաթեթի քննարկումը հեղինակի՝ ՀՀ կառավարության առաջարկով հետաձգվել է:
Նույն օրը ԱԺ պետական-իրավական հարցերի մշտական հանձնաժողովը Դավիթ Հարությունյանի նախագահությամբ տեղի է ունեցած նիստում առաջին ընթերցմամբ քննարկել և դրական եզրակացություն տվել է մի շարք օրինագծերի, որոնք կընդգրկվեն ԱԺ գարնանային և առաջիկա քառօրյա նիստերի օրակարգերի նախագծերում:
ՀՀ արտաքին գործերի նախարարի տեղակալ Շավարշ Քոչարյանը քննարկման է ներկայացրել «Պետական տուրքի մասին» ՀՀ օրենքում փոփոխություններ և լրացում կատարելու մասին» օրինագիծը, որով սահմանվում է ՀՀ քաղաքացու կենսաչափական տվյալներ պարունակող էլեկտրոնային անձնագիր ստանալու համար պետական տուրքի չափը՝ 65000 դրամ:
Շավարշ Քոչարյանը տեղեկացրել է, որ «ՀՀ քաղաքացու անձնագրի մասին» ՀՀ օրենքով նախատեսված է, որ էլեկտրոնային անձնագրեր պետք է տրամադրեն նաև օտարերկրյա պետություններում գործող ՀՀ դեսպանությունները և հյուպատոսական հիմնարկները, ուստի անհրաժեշտություն է առաջացել մշակել նախագիծ, որը կկարգավորի խնդիրը:
«ՀՀ քրեական օրենսգրքում փոփոխություններ և լրացումներ կատարելու մասին» օրենքի նախագիծը ներկայացրել է ՀՀ արդարադատության նախարար Հրայր Թովմասյանը, նշելով, որ նախագիծը համատեղ մշակել են ՀՀ արդարադատության նախարարությունը և ՀՀ զինվորական դատախազությունը: Քննարկմանը ներկա է եղել և հարցին անդրադարձել նաև ՀՀ զինվորական դատախազ Գևորգ Կոստանյանը:
Նշվել է, որ ելնելով օրենսգրքում առկա էական թերությունների ի հայտ գալու հանգամանքից, առաջարկվում է պատիժներ սահմանել զինվորական ծառայության կարգի դեմ ուղղված հանցագործությունների դեպքերում: Մասնավորապես, տարբեր պատժաչափեր են սահմանվում զորամաս կամ հատուկ պահպանվող զինվորական այլ տարածք մուտք գործելու, պետին դիմադրելու կամ նրան զինվորական ծառայության պարտականությունները չկատարելուն կամ ոչ պատշաճ կատարելուն հարկադրելու, պետի կամ ստորադասի նկատմամբ բռնի գործողություններ կատարելու կամ դրանք կատարելու սպառնալիքի, զինծառայողների փոխհարաբերությունների կանոնագրքային կանոնները խախտելու, զինծառայողին վիրավորանք հասցնելու և այլ դեպքերում: Պատժամիջոցներ են նախատեսվում նաև զինծառայողի կողմից թմրամիջոց կամ հոգեմետ նյութերի ապօրինի օգտագործման և մոլախաղերի կազմակերպման կամ դրան մասնակցելու դեպքերում:
ՀՀ կառավարությանն առընթեր ՀՀ ոստիկանության պետի տեղակալ Արթուր Օսիկյանի ներկայացմամբ հանձնաժողովը քննարկել է «ՀՀ քրեական օրենսգրքում փոփոխություններ կատարելու մասին» օրինագիծը, որի ընդունման պարագայում ակնկալվում է ուժեղացնել հեղինակային և հարակից իրավունքների պաշտպանությունը հակաիրավական ոտնձգություններից:
Հաջորդ՝ «ՀՀ քաղաքացիության մասին» ՀՀ օրենքում փոփոխություն կատարելու մասին» օրինագծի հիմնական զեկուցող, ՀՀ տարածքային կառավարման նախարարության միգրացիոն պետական ծառայության պետ Գագիկ Եգանյանը տեղեկացրել է, որ առաջարկվում է թույլատրել, որ 1988-92 թվականներին Ադրբեջանից Հայաստան բռնագաղթված փախստականները հնարավորություն ունենան ՀՀ քաղաքացիություն ստանալու համար դիմել մինչև 2014 թվականի դեկտեմբերի 31-ը:
Քննարկված մյուս՝ «ՀՀ քրեական օրենսգրքում լրացումներ կատարելու մասին» օրինագծով և կից օրենսդրական փաթեթով առաջարկվում է քրեական օրենսգրքի 349-րդ հոդվածով քրեական պատասխանատվություն նախատեսել ոչ միայն քրեական և քաղաքացիական, այլ նաեւ՝ վարչական գործով ապացույցները կեղծելու համար: Պատասխանատվություն է սահմանվում սուտ ցուցմունքներ տալու համար:
Հանձնաժողովը քննարկել է նաեւ պատգամավորներ Դավիթ Հարությունյանի և Արփինե Հովհաննիսյանի մշակած «Հեղինակային իրավունքի և հարակից իրավունքների մասին» ՀՀ օրենքում փոփոխություն կատարելու մասին» օրինագիծը:
Հիմնական զեկուցող Արփինե Հովհաննիսյանի տեղեկացմամբ՝ օրինագիծը նպատակ ունի առավել հստակեցնել, թե որ դեպքերում կարելի է ազատորեն օգտագործել ստեղծագործությունները: Մասնավորապես սահմանվում է, որ առանց հեղինակի համաձայնության և հեղինակային վարձատրության վճարման թույլատրվում է ոչ առևտրային նպատակով վեարտադրել, հեռարձակել այցելության համար բաց վայրերում տեղադրված ճարտարապետական, լուսանկարչական կամ կերպարվեստի ստեղծագործությունները:
Պատգամավորներ Դավիթ Հարությունյանի և Արփինե Հովհաննիսյանի հեղինակած «Ազգային ժողովի կանոնակարգ» ՀՀ օրենքում փոփոխություններ և լրացումներ կատարելու մասին» օրինագիծը ներկայացրել է Դավիթ Հարությունյանը: Պատգամավորներն առաջարկում են մեկ հերթական նստաշրջանի ընթացքում քվեարկությունների ավելի քան կեսից պատգամավորի բացակայելն անհարգելի համարելու մասին որոշման կայացումը վերապահել ՀՀ Ազգային ժողովի էթիկայի հանձնաժողովին: Ըստ հեղինակների՝ այս գործառույթի վերապահումը ԱԺ էթիկայի հանձնաժողովին պայմանավորված է նրա՝ անկախ եւ անկողմնակալ մարմին լինելու հանգամանքով:
Օրինագծերի վերաբերյալ հնչեցին մի շարք առաջարկներ և դիտողություններ, որոնք, ինչպես հավաստիացրին հիմնական զեկուցողները, կքննարկվեն առաջինից երկրոդ ընթերցում ժամանակահատվածում:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց
