Խաչիկ Ստամբոլցյանն ամաչեց, բայց ասաց այդ բառերը
«Ես ոչ մի օրինագիծ չեմ ներկայացրել: Դա լկտի սուտ է: Ուղղակի փորձել են վարկաբեկել: Էդ էշություն ա, ես նման օրինագիծ չէի կարող ներկայացնել», -Panorama.am-ի թղթակցի հետ զրույցում մեկնաբանելով «Հրապարակ» թերթում տպագրված լուրը, հայտարարեց հասարակական գործիչ, «Ղարաբաղ» կոմիտեի նախկին անդամ Խաչիկ Ստամբոլցյանը: Խաչիկ Ստամբոլցյանը նաև հայտնի է Հայաստանում միասեռականության դեմ պայքարով:
Նշենք, որ «Հրապարակ»-ը օրերս գրել էր, թե Ստամբոլցյանը զավեշտալի վիճակում է հայտնվել. Ավանդական սեռական հարաբերության մասին օրինագիծ է ներկայացրել խորհրդարան, իսկ օրենսդիրները հավանության չեն արժանացրել և հետ են ուղարկել այն:
«Եթե ես նման օրինագիծ ներկայացրած լինեի, ինչի՞ պիտի թաքցնեի», -ասաց Ստամբոլցյանը:
-Բայց ծրագրո՞ւմ եք նման օրինագիծ ներկայացնել:
-Նման օրինագիծ չէ. Ավանդական սեռական հարաբերությունը Աստված ու բնությունը ձևակերպել ա: Ես ուզում եմ մտնել մի ուրիշ օրենքով ու դրանով պատիժի ենթարկել այն մարդկանց, ովքեր երեխաների մեջ նման այլասերություն են տարածում, քարոզում: Այդպիսի օրենքի նախագիծ մշակվում է այսօր իրավաբանների հետ, որպեսզի հետո ներկայացնենք Ազգային ժողով:
-Իսկ պարոն Ստամբոլցյան, Ձեր նշած այլասերության դեպքեր եղե՞լ են, ովքեր են տարածում այլասերություն:
-Կանանց ռեսուրսների կազմակերպությունը քարոզում է ամենաայլանդակ բաները:
-Պարոն Ստամբոլցյան, օրինակ, ի՞նչ այլանդակ բաներ է քարոզում:
-Դե եթե Ձեզ հետաքրքիր ա, եկեք իրանց թռուցիկները տամ, տարեք կարդացեք: Ես ամաչում եմ կարդալ:
-Հա, չե՞ք կարողանում կարդալ այդ թռուցիկները:
-Սարսափելի ա, ուղղակի զզվելի ա: Գարշելի բաներ են գրում:
-Օրինակ, ինչի մասին են գրում պարոն Ստամբոլցյան, սեռական հարաբերությունների՞:
-Սեռական այլասերվածության:
-Այլասերվածությունը ո՞րն է, պարոն Ստամբոլցյան:
-Լավ, ախր ո՞նց բացատրեմ: Եկեք, տամ, կարդացեք: Ես չեմ կարա բառերով ասեմ: Ես ամաչում եմ: Եկեք, ես իրանց տպագրած թերթոնը տամ ձեզ, տարեք, դուք կարդացեք, տեսեք` դա ինչ ա:
-Ամաչում եք այլասերվածության մասի՞ն կարդալ:
-Դե ընդեղ էնպիսի բաներ ա գրված, որ ես ամաչում եմ ձեզ կարդալ: Մարդկանց սովորեցնում են այլասերվածություն: Ու հիմա մենք ուզում ենք, որ բոլոր այլասերություն քարոզողները պատժվեն:
-Ի՞նչ պատիժ եք առաջարկում:
-Նախագծով առաջարկում ենք առաջին անգամ տուգանք, իսկ երկրորդ անգամ` ազատազրկում: Էսօր Հայաստանում 3700 գենդեր քարոզող կազմակերպություններ կան` առաջադեմ երիտասարդություն, կանանց ռեսուրսներ, ոչ ավանդական սեքսուալ քարոզչական կենտրոններ: Լիքը կառույցներ կան: Ես իմ ձեռքի տակ ունեմ Կանանց ռեսուրսների կենտրոնի թռուցիկը, որը տպագրել ու բաժանում են:
-Եվ որը դուք ամաչում եք կարդալ:
-Այո, որը ցանկացած մարդու համար խայտառակ բան է, բերանով չես կարա պատմես: Եթե ուզում եք, եկեք Ձեզ նվեր տամ, տեսեք` ինչ ա գրված:
-Պարոն Ստամբուլցյան, էլ ովքե՞ր են Ձեզ աջակցում այլասերվածության դեմ պայքարում:
-Մտավորականների, հոգևորականների մի հավաքույթ կա, որոնք միասնական փորձում ենք այդ պատերազմը տանել: Հոգևոր պատերազմ, ոչ թե մարմնական` բռնել, ծեծել, գնդակահարել: Ըտենց պատերազմ չի, հոգևոր պատերազմ ա: Բարոյական խնդիրներ են այդտեղ դրված:
-Կանանց ռեսուրսների կենտրոնն էլ իր հերթին հայտարարում է, թե իրենց հասցեին սպառնալիքներ են հնչեցվում, իրենց պատիվն ու արժանապատվությունն են վիրավորում:
-Դե եթե պատվի հետ եմ խաղում, եկեք, աղջիկ ջան, էս թերթոնը տամ Ձեզ, կարդացեք, տեսեք` իրե՞նք են մեր արժանապատվության հետ խաղում, թե՞ մենք:
-Լավ, պարոն Ստամբոլցյան, գոնե մի տող կարո՞ղ եք կարդալ, որ ավելի հասկանալի լինի, թե ինչ այլասերվածության քարոզի մասին է խոսքը:
-Լսե՞լ եք օրալ սեռական հարաբերության մասին:
-Այո:
-Կամ էսպիսի բան` մենք կարող ենք ծծել, կամ լեզվով շոյել մեր զուգընկերոջ սեռական օրգանները: Ձեզ բավարա՞ր է:
-Ու այդ ամենը իրենք տարածում են անչափահասների շրջանո՞ւմ:
-Կարևոր չի` անչափահաս, թե չափահաս, թերթոնը տպագրել են ու տարածում են:
-Դուք դա համարում եք այլասերությո՞ւն:
-Դա անբարոյականություն է, սիրելիս: Լավ Ձեզ մի հատ ուրիշ բան կարդամ` անալ սեքս. Հետանցքը կարելի է գրգռել մատներով, լեզվով, առնանդամով…մեզանից շատերի համար այն սեռական մեծ գրգռվածություն ունեցող հատված է: Բավարա՞ր է Ձեզ: Հիմա սա նորմալ մարդու բա՞ն է, որ կանայք տարածում են էս ժողովրդի մեջ:
-Դուք դա չեք համարո՞ւմ մարդկանց շրջանում սեռական դաստիարակության հարցում տեղեկացվածության բարձրացման համար արվող արշավ կամ գործունեություն:
-Դա սեռական դաստիարակություն չի, սիրելիս, սա այլասերում է, այ-լա-սե-րում: Ի՞նչ Սեռական դաստիարակություն: Մարդու հետանցքը օգտագործում ես որպես սեռական օրգա՞ն: Ես կարդալուց ամաչում եմ, դուք շատ հանգիստ լսում եք: Դուք չեք հասկանում ինչ բան է այլասերում, ինչ բան է նորմալ սեռական հարաբերություն: Դրանք էդ բոլորը Ձեզ համար նո՞ւյնն են:
-Պարոն Ստամբոլցյան, ես դրանք համարում եմ որպես լրացուցիչ տեղեկություն:
-Դուք տեղեկատվություն բացեք, Աստվածաշնչում կարդացեք:
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ