Ձեր վստահելի աղբյուրը

Քիչ առաջ Panorama.am-ը Թբիլիսիի օդանավակայանից ահազանգ ստացավ, որ Լեհական ավիաուղիների Վարշավա-Երևան 474 չվերթի ինքանթիռը Երևան չի հասել և փոխարենը վայրէջք է կատարել Վրաստանի մայրաքաղաքում:

Մեր զրուցակիցը տեղեկացրեց, որ ինքնաթիռը պետք է առավոտյան ժամը 05.00-ին վայրէջք կատարեր «Զվարթնոց»-ում, սակայն ուղևորներին տեղեկացրել են, որ «Զվարթնոցը» փակ է, չի ընդունում և պետք է վթարային վայրէջք կատարեն Թբիլիսիում «մինչև տեսնեն ինչ են անում»: Սակայն այդ «տեսնեն ինչ են անումը» ուղևորների համար դարձել է ուղղակի պատուհաս.  «Սկզբում մեզ ասացին, որ սպասենք, հետո ասացին, որ հնարավոր է ուղևորներին հետ տանեն Վարշավա, այնտեղ սպասենք, ինչն իսկապես խուճապ առաջացրեց, որովհետև օրինակ ես շենգեն վիզա չունեմ, ինչը նշանակում է, որ չեմ կարող մնալ Վարշավայում: Սակայն այդ հարցին, թե ինչ են անելու իմ իրավիճակում հայտնվածները, եթե վերադառնանք Վարշավա մնաց օդից կախ: Կամ հարց ` ինչու պետք է հետ վերադառնանք»,-  պատմեց Panorama.am-ի զրուցակիցը:

Նրա փոխանցմամբ, Թբիլիսիում վայրէջք կատարելուց հետո, երբ նրանց առաջարկվել է կամ սեփական նախաձեռնությամբ հասնել Երևան, կամ մեկնել Վարշավա ու «մնալ հյուրանոցում, մինչև տոմսի գումարը կփոխանցեն կամ կտեղափոխեն Երևան», բոլոր ուղևորները միահամուռ որոշել են իջնել ինքնաթիռից. «Շատ վատ, իսկապես ահավոր վայրէջք կատարեց ինքնաթիռը.... բոլորս իջանք, թեև մեզ զգուշացրեցին, որ եթե լքենք ինքնաթիռը, ապա իրենց պատասխանատվությունն այդքանով կավարտվի: Բայց բոլորս էլ իջանք»,- պատմեց նա:

Դրանից հետո մոտ երեք ժամ տևած բանակցությունների ու տհաճ խոսակցությունների արդյունքում ուղևորներին, որոնց թվում շուրջ 20 հայեր են, առաջարկել են ինչ-որ կերպ հասնել Երևան, գնալ ավիաընկերության` LOT-ի գրասենյակ և ներկայացնել ճանապարհածախսի մասին վկայող կտրոնն ու ստանալ փոխհատուցում.

«Որոշ ուղևորներ տաքսիով գնացին, մյուսներն այլ ճանապարհով, մեր խումբը մի միկրոավտոբուս է վարձել, որ գանք հասնենք Երևան: Բայց ով մեզ կտրոն կտա, որ մենք էլ ներկայացնենք գրասենյակ: Բացի դրանից, որևէ մեկս այդ 10 հազար դրամ փոխհատուցման մասին չենք մտածում, ամեն ինչ ավելի լուրջ է ու տհաճ այս իրավիճակը այլ լուծում պետք է ստանա, քան ուղղակի փոխհատուցումը, որի մասին մեզ ասվեց: Զարմանալի է` ինչպես կարող է հեղինակավոր ավիաընկերությունը նման անպատասխանատու վարք դրսևորի իր ծառայություններից օգտվողների նկատմամբ»,- հավելեց նա:

Նշենք, որ այս պահին Լեհական ավիաուղիների հայ ուղևորները փորձում են ինքնուրույն հասնել Երևան, այդպես էլ չհասկանալով, թե ինչու հայրենիք չհասան ինքնաթիռով:

Panorama.am-ի հետ զրույցում «Զվարթնոց» օդանավակայանի մամուլի քարտուղար Գևորգ Աբրահամյանը նշեց, որ գիշերը ժամը 2-ից գրեթե մինչև առավոտյան ժամը 08-ը ձյան մաքրման աշխատանքներ են կատարվել: Նշված ինքնաթիռը վայրէջք է կատարել պահուստային օդանավակայանում` Թբիլիսիում. «Մեր տվյալներով LOT-ը որոշում է կայացրել թռիչքը չեղյալ հայտարարել: Մնացած տեղեկությունները պետք է ճշտել ընկերության գրասենյակից »,- տեղեկացրեց նա ու հավելեց, որ բացի LOT-ից պահուստային օդանավակայաններում վայրէջք են կատարել նաև այլ ավիաընկերությունների չվերթներ, սակայն առավոտյան 08-ից «Զվարթնոցն» աշխատում է բնականոն ռեժիմով:

Ինչ վերաբերում է LOT-ի գրասենյակ մեր կատարած զանգերին, ապա դրանք դեռ մնացին անպատասխան, սակայն հաջորդիվ կներկայացնենք նաև լեհական կողմի պարզաբանումը: