Ձեր վստահելի աղբյուրը

Տավուշի մարզի սահմանամերձ Չինարի գյուղում վերջերս հակառակորդի գնդակը տան պատուհանից ներս էր մտել. տանը հղի կին և մանկահասակ երեխա կար:

Տունը գտնվում է դպրոցի հարևանությամբ, որը հակառակորդի նշանառության տակ է:

«Կրակոցներ միշտ են լինում: Վերջերս ակցիա կազմակերպեցինք, դպրոցի հետևի մասից, ֆիզկուլտուրայի դաշտից և գյուղի վերևի մասից բարդիներ տնկեցինք, որ տարիներ հետո մեր դպրոցն ու երեխաների շարժն անտեսանելի լինեն»,- Panorama.am-ի թղթակցի հետ զրույցում ասում է Չինարիի միջնակարգ դպրոցի տնօրեն Աստղիկ Ազատյանը:

Նրա խոսքով, պատրաստվում են նաև պատուհանների ներքևի մասը ճաղապատ անել և երկաթե պատնեշ կառուցել, որպեսզի երեխաներին չդիպչի գնդակը:

«Դժվարն առաջին գնդակն է, եթե չկպավ, հաջորդ պահին կարողանում ենք երեխաներին պաշտպանել: Մի կողմից տանում ենք մյուս կողմը, ապաստարան ենք տեղափոխում»,- նշում է նա:

Չինարիում զինվոր են բոլորը, այդ թվում երեխաները: Հակառակորդի կրակոցի և ուղղությունը, և կրակած զենքը ձայնից էլ լավ ճանաչում են. «Մեր երեխաները մեզ ուժ են տալիս: Տարբերում են կրակոցները, ասում են` կրակոցը դիրքային է, գյուղի վրա չէ: Բայց երեխաներ են, նաև վախենում են: Գնդակն ընկնում է ուղիղ ոտքերի տակ, տուն է հասնում, կարկամում են խոսելուց: Մի քիչ ուշքի է գալիս, գուցե մոռանում է, գուցե` ոչ: Ծնողն ասում է` հենց ոտքերի տակ թափվել է կրակահերթը, եկել է տուն, չի կարողանում խոսել: Դա նաև մեր երեխաների առողջության վրա է անդրադառնում: Ամեն դեպքում, մեր երեխաներն ուժեղ են»:

Տնօրենի բնորոշմամբ, իրենք լավատես են, հայրենասեր սերունդ է մեծանում, բայց մյուս կողմից էլ արտագաղթ կա:

«Եթե հողի վրա ժողովուրդ չլինի, քայլ առ քայլ առաջ կգան, իսկական երկրապահը ժողովուրդն է: Ամբողջ Հայաստանը սահմանապահ է: Մենք մեր հողի վրա ենք, թող մի բան պակաս լինի, բայց այստեղ ապրենք: Մենք մեր ամբողջ կյանքի ընթացքում զինվոր ենք»,- հավելում է Աստղիկ Ազատյանը:

Դպրոցի ուսումնական գծով փոխտնօրեն, անգլերենի ուսուցչուհի Ծովինար Մարտիրոսյանը Panorama.am-ի թղթակցի հետ զրույցում նշում է, որ դպրոցի և ամբողջ գյուղի առաքելությունն է անպայման գյուղը պահել:

«Ոչ ոք չի լքում գյուղն ու դպրոցը: Բոլոր ուսուցիչներն ու աշակերտները պարտաճանաչ ներկայանում են դասին, թեկուզ կրակոցներից հետո: Այնպես չէ, որ կրակոցներից չենք վախենում, բայց չենք ընկճվում: Աշխատանքը կաթվածահար չի լինում: Որպես հեռավոր գյուղ, խնդիրներ կան, բայց աջակցություն էլ կա: Հիմա ռազմագիտության դասարանն է վերանորոգվում, իսկ մեր աշակերտներն արդեն պատրաստի զինվորներ են»,- շեշտում է փոխտնօրենը:

Չինարիի դպրոցի շենքը կառուցվել է 1969 թվականին: Պատերազմի ժամանակ ռմբահարվել է: Ականը մտել է քիմիայի լաբորատորիա և ավերել: Այդ օրվանից դպրոցը քիմիայի լաբորատորիա չունի: Մասնակի վերանորոգումներ կատարվել են, բայց այժմ ևս դրա անհրաժեշտությունը կա: Դպրոցի տնօրենի խոսքով, պատուհաններն են վատ վիճակում, եթե փոխվեն ավելի տաք կլինի ներսում: Տանիքը մասնակի է վերանորոգված, կաթոցներ են լինում: Դպրոցն ունի նաև գազաֆիկացման և ջուրը երկրորդ հարկ մտցնելու խնդիր:

Չինարիում այժմ 118 աշակերտ կա, նախորդ տարի ունեցել են 125 աշակերտ:

«Ես չեմ ուզում ասել, բայց նկատելի է, որ նվազման միտում կա: Փառք տանք Աստծուն, մյուս տարի 12 առաջին դասարանցի կունենանք, նախորդ տարի 10-ն են եղել: Այս առումով պրոգրես կա»,- ասում է տնօրենը:

Դպրոցում միայն 2-րդ և 3-րդ դասարաններն են կոմպլեկտավորված: Երեք տարի առաջ ավարտել է 20 աշակերտ ունեցող դասարանը, հիմա առավելագույնը մեկ դասարանում 12-13 աշակերտ ունեն:

Դպրոցի տնօրենի խոսքով, շատ լավ աշակերտներ ու մասնագետներ ունեն. «Մեր երեխաներն, ովքեր հակում ունեն, սովորում են: Բուհերում ևս գերազանց են սովորում, ասպիրանտուրայում ունենք սովորողներ: Մենք հպարտանում ենք մեր երեխաներով: Ուսուցիչներն էլ կարողանում բավարարել մեր աշակերտների պահանջները»:

Այցելությունը Տավուշի մարզի սահմանամերձ գյուղեր կազմակերպել էր Մայր Աթոռ Սուրբ Էջմիածինը՝ Վեհափառ Հայրապետի օրհնությամբ:

«Գյուղի դպրոցը» շարքը՝

3 աշակերտով փոքր դպրոցի մեծ խնդիրները. «Մահացող գյուղը դպրոցով է շնչում»

Պատերազմի սլաքի տակ շնչող դպրոցը

Անկախության 1-ին տարեդարձին բացված կիսակառույց դպրոցն այս 23 տարում կիսակառույց էլ մնացել է

Տուն հիշեցնող շենքով և 16 աշակերտով. Դդմասարի դպրոցը

Պատուհանները փշրված են, հատակը՝ ավերված. Ազատամուտի դպրոցը

Կարկատան արած տանիքով ու բետոնե հատակով. Սվերդլովի դպրոցը

Հիվանդանոցի համար նախատեսված շենքում, 15 աշակերտով և օդում կախված` Տալվորիկի դպրոցը

Արծվաբերդի դպրոցը` գյուղապետարանի նախկին, վթարային շենքում

5.5 դասարանով և աշակերտներին նվիրված ուսուցիչներով սահմանամերձ դպրոցը

7 աշակերտ` 3 ընտանիքից, 4 դասարանով և խարխուլ շենքով դպրոցը