Սերգեյ Մինասյան. «Շփման գծում միջադեպերը ցույց տվեցին Բաքվին, որ պատերազմի վերսկսման գինը շատ մեծ է լինելու»
«Շփման գծում գրանցվող միջադեպերը մեծ պատերազմի վերսկսման հետ ոչ մի կապ չունեն: Այս միջադեպերը ունեն սեփական տրամաբանությունը և հակված են ցույց տալու Ադրբեջանի անհամաձայնությունը վերջին երկու տասնամյակում ձևավորված և պահպանվող քաղաքական իրականությանը»,-Panorama.am-ի հետ զրույցում անդրադառնալով շփման գծում վերջին օրերին գրանցված միջադեպերին` ասաց քաղաքագետ Սերգեյ Մինասյանը:
Նա նշեց, որ Ադրբեջանը վերջին միջադեպերով անհաջող ձևով փորձում է ցույց տալ, որ այն ռազմական սպառնալիքները, որ իր կողմից հնչեցվում են, լուրջ են, սակայն դա բերում է հակառակ էֆեկտի:
«Վերջին օրերի ընթացքում ավելի քան երկու տասնյակ ադրբեջանցի զինվոր է զոհվել և Ադրբեջանում ավելի ու ավելի են համոզվում, որ պատերազմի գինը շատ ավելի բարձր է, քան իրենք պատկերացնում են»,-նշեց Ս. Մինասյանը:
Քաղաքագետը հավելեց, որ այդ միջադեպերը նաև հարվածեցին ադրբեջանական բանակի իմիջին:
Հիշեցնենք, որ օգոստոսի 2-ին հայ-ադրբեջանական սահմանագոտու հյուսիսարևելյան հատվածում` ադրբեջանական Քեմեռլի բնակավայրի ուղղությամբ տեղակայված դիրքերից հակառակորդը խոշոր տրամաչափի հրազենից գնդակոծել է Բարեկամավան գյուղը:
Հակառակորդի կրակակետերը լռեցնելու նպատակով պատասխան կրակ է բացվել ադրբեջանական դիրքերի և Քեմեռլի բնակավայրում տեղակայված ադրբեջանական ԶՈւ ստորաբաժանմանումների ուղղությամբ: Ըստ նախնական տվյալների` ադրբեջանական կողմը կրել է զգալի կորուստներ:
Հայկական կողմից զոհեր և վիրավորներ չկան: ՀՀ զինված ուժերը շարունակում են վերահսկել իրավիճակը շփման գծում:
Արցախի ՊՆ մամուլի ծառայությունն էլ այսօր հայտարարարություն էր տարածել, որ օգոստոսի 1-ի լույս 2-ի գիշերը ղարաբաղա-ադրբեջանական հակամարտ զորքերի շփման գծի հյուսիսարևելյան /Մարտակերտի/ ուղղությամբ հակառակորդը հերթական անգամ ձեռնարկել է հետախուզադիվերսիոն գործողություն: Պաշտպանության բանակի առաջապահ ստորաբաժանումները ժամանակին հավաստանշել են հակառակորդի հատուկ ջոկատայինների առաջխաղացումը և վերջիններիս պատճառելով մարդկային ու նյութական կորուստներ, հետ շպրտել իրենց ելման դիրքեր:
Ըստ ՊԲ համապատասխան ծառայությունների տրամադրության տակ եղած տվյալների, ադրբեջանական կողմը տվել է զոհեր և վիրավորներ: Թեժ դիմակայության ընթացքում կորուստ է ունեցել նաև հայկական կողմը: Հայրենիքի պաշտպանության ժամանակ արիաբար մարտիրոսվել է ՊԲ զինծառայող 1989թ. ծնված Զորիկ Ժիրայրի Գևորգյանը:
Նախօրեին երեկոյան ադրբեջանական լրատվամիջոցները հայտնել էին ևս երկու զոհի մասին, իսկ առավոտյան՝ 11:
Մամուլում շրջանառվող տեղեկությունների համաձայն էլ հուլիսի 31-ի լույս օգոստոսի 1-ի գիշերը հակառակորդի բանակն իր հերթական դիվերսիայի արդյունքում 14 զինծառայող է կորցրել և տվել բազմաթիվ վիրավորներ: