Ձեր վստահելի աղբյուրը

«Իմ կարծիքով, ամեն ինչ կախված է նրանից, թե Հայաստանի պոտենցիալ անդամակցությունը Եվրասիական տնտեսական միությանը և Մաքսային միությանը ինչպես կարող է անդրադառնալ հայ-վրացական հարաբերությունների վրա: Խոսքը առաջին հերթին վերաբերում է տարանցիկ առևտրային փոխադրումներին` այդ թվում նաև գազի մատակարարմանը: Այս պահի դրությամբ այս հարցերի վերաբերյալ դեռևս դժվար է հանգել վերջնական եզրակացությունների: Այնուամենայնիվ, հստակ է, որ կողմերը, համենայնդեպս, չեն փորձի անել քայլեր, որոնք կվնասեն երկկողմ հարաբերություններին»,- մեկնաբանելով Վրաստանի վարչապետ Իրակլի Ղարիբաշվիլիի գլխավորած կառավարական պատվիրակության` պաշտոնական այցը Հայաստանը, panorama.am-ի հետ զրույցում նման տեսակետ հայտնեց քաղաքագետ Ալեքսանդր Մարկարովը:

Նա միևնույն ժամանակ կարևորեց թե՛ վրացական և թե՛ հայկական կողմի այն հավաստիացումները, թե երկու երկրների՝ տարբեր ինտեգրացիոն միավորներին անդամակցությունը որևէ արգելք չի հանդիսանա հայ-վրացական բազմակողմանի համագործակցության համար:

«Կողմերից յուրաքանչյուրը կփորձի իր համար առավել արդյունավետ օգտագործել այն ինտեգրացիոն գործընթացները, որոնց մասնակցելու են իրենք, և ինչու չէ, նաև հարևան երկիրը: Այս առումով Հայաստանին, բնականաբար, առաջինը հետաքրքրում է Վրաստանի` որպես մեզ համար կարևորագույն տարանցիկ երկրի պահվածքը և դիրքորոշումը ի հայտ եկած նոր իրողությունների պայմաններում»- հավելեց մեր զրուցակիցը:

Իր հերթին, ԱԺ ՀՀԿ խմբակցության անդամ Խոսրով Հարությունյանը, փաստեց, որ հայ-վրացական հարաբերությունները ՀՀ արտաքին քաղաքական գերակայություններից մեկն են:

«Համոզված եմ նաև, որ դա երկուստեք ընդունելի իրողություն է և Վրաստանի համար նույնպես չափազանց կարևոր են իր հարավային հարևանի հետ հարաբերությունները: Այս հենքը չափազանց կարևոր է միջպետական հարաբերության կառուցման և զարգացման գործում»,- ասաց Խ.Հարությունյանը:

Կարևորելով Վրաստանի վարչապետ Իրակլի Ղարիբաշվիլիի գլխավորած կառավարական պատվիրակության այցը, մեր զրուցակիցը շեշտեց այն իրողությունը, որ այն հաջորդում է ՀՀ նախագահ Սերժ Սարգսյանի պաշտոնական այցին Վրաստան:

«Վրաստանի վարչապետի այցը պետք է դիտարկել որպես մեր երկրի ղեկավարի պատոնական այցի տրամաբանական շարունակություն: Ներկայումս Վրաստանում ամենահանգուցային պաշտոնյան վարչապետն է, և վերջինիս այցը Հայաստան, ըստ էության, խոսում է երկուստեք հետաքրքիր քաղաքական օրակարգ ձևավորելու և այդ օրակարգին լուծում տալու ցանկության մասին: Շատ կարևոր է, որ վարչապետ Հովիկ Աբրահամյանը առիթն օգտագործեց և իր գոծընկերոջ հետ քննարկեց վիզային ռեժիմի հետ կապված խնդիրները: Ես համոզված եմ, որ Վրաստանը ՀՀ քաղաքացիների համար ավելորդ քաշքշուկներ չի ստեղծի և կողմերը կգան ընդհանուր հայտարարի»,- նշեց Խ.Հարությունյանը:

Բանախոսը շեշտեց, որ Հայաստանի հետ տնտեսական հարաբերություններում արհեստական խոչընդոտների ստեղծումը ամենևին չի բխում վրացական կողմի շահերից:

«Կարծում եմ, շատ կարևոր է նաև Հայաստանի` Եվրասիսական տնտեսական միությանը և Մաքսային միությանը անդամակցելու գործընթացում հայ-վրացական հարաբերությունների գործնական երկուստեք փոխշահավետ միջավայրի պահպանումը: Եվ այստեղ կարևոր է, որ վրացական կողմը ավելորդ խոչընդոտներ չստեղծի մեր երկրների տնտեսական հարաբերություններում: Բոլորովին վերջերս ԱՄՆ ամերիկացի սենատոր Ջոն Մաքքեյնը իր դժգոհությունը հայտնեց առ այն, որ Վրաստանի կառավարությունն ավելի կոշտ դիրքորոշում չի որդեգրել Ռուսաստանի հանդեպ՝ կապված Ուկրաինայի դեպքերի հետ: Պաշտոնական Թբիլիսին, ըստ էության, հայտարարեց, որ չի միանա Ռուսաստանի դեմ կիրառվող պատժամիջոցներին: Սա խոսում է այն մասին, որ վրացական կողմը լրջորեն մտահոգված է, որպեսզի ռուսական, ավելի շուտ Եվրասիական տնտեսական ինտեգրացիոն գործընթացներում ներառված երկրների շուկան իր համար մնա մատչելի: Չպետք է մոռանալ, որ այս շուկան Վրաստանի համար ավանդական շուկա է, մինչդեռ եվրոպական շուկա նրանք նոր են մուտք գործելու և դեռ պարզ չէ, թե ինչ հաջողությամբ»,- ասաց Խ.Հարությունյանը:

«Այս տեսանկյունից հայ-վրացական տնտեսական համագործակցության խորացումը շատ ձեռնտու է երկու կողմերի համար: Հայկական ընկերությունները նույնպես ունեն ավանդական գործընկերային հարաբերություններ իրենց վրացի գործընկերների հետ: Եթե դրան ավելացնենք նաև այն, որ Հայաստանը, ի տարբերություն Վրաստանի, այսօր օգտվում է ԵՄ-ի հետ արտոնյալ առևտրային`«GSP+» ռեժիմից, ապա պատկերը ամբողջական կդառնա: Սա իր հերթին նշանակում է, որ Հայաստանում արտադրված 7700 անվանատեսակ ապրանքներ կարող են Եվրոպական շուկա մտնել առանց մաքսային խոչընդոտների: Վրաստանը կարող է օգտագործել այն հնարավորությունը ևս Եվրոպական շուկան էլ ավելի մատչելի դարձնելու համար»,- եզրափակեց մեր զրուցակիցը: