ԱՄՆ սենատի լսումների օրակարգում Հայաստանում, Ադրբեջանում և Թուրքիայում ԱՄՆ դեսպանների հարցն է եղել
ԱՄՆ սենատը նախօրեին 98 կողմ, 0 դեմ ձայների համամասնությամբ հաստատել է Ջոն Բասի թեկնածությունը որպես Թուրքիայի Հանրապետությունում Միացյալ Նահանգների հաջորդ դեսպան, հաղորդում է Ամերիկայի հայկական համագումարը (Համագումար):
Նախկինում հաղորդվել էր, որ Բասի թեկնածությունը դարձել էր թեժ քննարկման առարկա Սենատի արտաքին հարաբերությունների հանձնաժողովի նախագահ, սենատոր Ռոբերտ Մենենդեսի, սենատորներ Բարբարա Բոքսերի, Մարք Քըրքի և մինչ իր հաստատումը Էդ Մարքիի կողմից` ամերիկահայերի մտահոգությունների վերաբերյալ:
«Մենք ողջունում ենք սենատորներ Մենենդեսին, Բոքսերին և Մարքիին Թուրքիայի կողմից Հայոց Ցեղասպանության ժխտման, Հայաստանի թուրք-ադրբեջանական շրջափակման և տարածաշրջանի վրա ազդող մյուս կարևոր խնդիրների վերաբերյալ իրենց դիրքորոշման համար»,- հայտարարել է Համագումարի գործադիր տնօրեն Բրայան Արդունին:
Նա նաև հավելել է. «Գնալով Օսմանյան կայսրությունում Միացյալ Նահանգների դեսպան Հենրի Մորգենթաուի հետքերով, ով 1915թ. աշխարհին նախազգուշացրեց Հայոց Ցեղասպանության մասին, կարևոր է, որ մեր Արտաքին ծառայության աշխատակիցները այնպիսի արտաքին քաղաքականություն իրականացնեն, որն արտացոլում է Ամերիկայի արժեքները»:
Աղբյուրը հայտնում է, որ ի հավելում Սենատի` Բասի թեկնածության քվեարկությանը, երեկ Սենատի արտաքին հարաբերությունների հանձնաժողովը լսումներ է անցկացրել Ռիչարդ Միլսի և Ռոբերտ Ցեկուտայի` համապատասխանաբար Հայաստանում և Ադրբեջանում որպես Միացյալ Նահանգների դեսպաններ նշանակելու թեկնածության հարցը:
Սենատի արտաքին հարաբերությունների հանձնաժողովի լսումների ժամանակ Եվրոպայի հարցերով զբաղվող ենթահանձնաժողովի նախագահ Քրիս Մըրֆին և ենթահանձնաժողովի բարձրաստիճան անդամ Ռոն Ջոնսոնը քննարկեցիլ են Հայաստանում և Ադրբեջանում Միացյալ Նահանգների դեսպանի թեկնածուների հարցը:
Ենթահանձնաժողովի նախագահ Քրիս Մըրֆին նշել է, որ երբեմն Ռուսաստանը կառուցողական դեր է խաղում Լեռնային Ղարաբաղի խաղաղ կարգավորման գործընթացում, մինչդեռ մյուս դեպքերում` ոչ: Նա հարցրել է թեկնածուներին, թե ինչպես են նրանք դիտարկում Ռուսաստանին այս հարցի առնչությամբ: Եվ Միլսը, և Ցեկուտան նշել են, որ ԵԱՀԿ Մինսկի խմբում ԱՄՆ-ի դեսպան Ջեյմս Ուորլիքը աշխատանքային լավ հարաբերությունների մեջ է իր ռուս գործընկերոջ հետ: Միացյալ Նահանգները, Ռուսաստանը և Ֆրանսիան հանդես են գալիս որպես ԵԱՀԿ Մինսկի խմբի համանախագահող երկրներ:
«ԵԱՀԿ Մինսկի խումբը «մնում է լավագույն գործընթացը» Լեռնային Ղարաբաղի հակամարտության խաղաղ կարգավորմանը հասնելու հարցում»,- ասել է Միլսը:
Ցեկուտան էլ հայտարարել է, որ Մինսկի խմբի գործընթացը վայելում է բոլոր կողմերի վստահությունը և ընդգծել, որ. «Ռազմական լուծում չկա այս հակամարտությանը»:
Միլսը վերահաստատել է, որ ցանկացած կարգավորում կպահանջի հարգանք միջազգային իրավունքի, ՄԱԿ-ի կանոնադրության և Հելսինկյան եզրափակիչ ակտի հիմնարար սկզբունքների նկատմամբ, և այս երեք սկզբունքները առանցքային կլինեն ցանկացած կարգավորման հարցում` ուժի և ուժի սպառնալիքի չկիրառում, տարածքային ամբողջականություն, և ժողովուրդների ինքնորոշում:
Սենատոր Մըրֆին մտահոգություն է հայտնել Ադրբեջանում ձերբակալված անձանց թվի աճի մասին, որ կարծես քաղաքական դրդապատճառներ է ունեցել: Մըրֆին նշել է, որ վերջերս սենատորներ Դարբինի և Կարդինի հետ համատեղ նամակ են հղել Ադրբեջանի նախագահ Իլհամ Ալիևին՝ հայտնելով իրենց մտահոգությունները: Համագումարն, իր հերթին, նույնպես մատնանշել է Ադրբեջանի հետ կապված իր մտահոգությունը նախագահ Մենենդեսին ուղղված նամակում:
Ավելի ուշ, լսումների ժամանակ սենատոր Ջոնսոնը արտահայտել է իր հիասթափությունը Թուրքիայի հետ կապված մի քանի հարցերով, այդ թվում, Թուրքիայում Միացյալ Նահանգների ավիաբազա ունենալու թույլատվության մերժման կապակցությամբ: Ըստ նրա, դա , օգտագործվելու էր իսլամական պետության նկատմամբ աճող սպառնալիքի դեմ պայքարում:
Սենատոր Մըրֆին նշել է, որ սեպտեմբերի 18-ին` հինգշաբթի օրը, Սենատի արտաքին հարաբերությունների հանձնաժողովը կարող է քվեարկություն անցկացնի` հաստատելու Միլսի և Ցեկուտայի թեկնածությունները:
Լրահոս
Տեսանյութեր
Քաղտեխնոլոգ. Մոսկվայում Ալիևը հրաժարվեց վճարել խաղաղապահների՝ Արցախից դուրս գալու գինը