Ձեր վստահելի աղբյուրը

«Ասեք մեզ` ինչ անենք և մենք կանենք, ձեռքներս ծալած չենք նստի»,-ՀՀ Ազգային ժողովի և ՌԴ Դաշնային ժողովի միջև համագործակցության միջխորհրդարանական հանձնաժողովի 25-րդ նիստում հայտարարեց միջխորհրդարանական հանձնաժողովի համանախագահ Նիկոլայ Ռիժկովը` անդրադառնալով հայոց ցեղասպանության 100-ամյա տարելիցին նվիրված միջոցառումների նախապատրաստական գործընթացներում Ռուսաստանի Դաշնային խորհրդի մասնակցության պատրաստակամությանը:

Նա մասնավորապես հայտարարեց. «Մենք ամենը կանենք, ինչ կախված է մեզնից, որպեսզի Հայոց Ցեղասպանության 100-ամյակին նվիրված միջոցառումները ներկայացված լինեն պատշաճ մակարդակի վրա»:

Ն.Ռիժկովի խոսքով` իրենք չեն կարող լռել, ու կապ չունի, թե ինչ է եղել 15 տարի առաջ` հայտարարություն անպայման պետք է լինի խորհրդարանի անունից:

«Ուղղակի մենք խնդրում ենք ձեզ` մենք ձեր կողքին ենք, բայց մեզ հստակ ուղղություն տվեք, թե որ ուղղությամբ աշխատենք և մենք ձեռքներս ծալած չենք նստի»,- հավելեց նա: Հայկական կողմի համանախագահ Հերմինե Նաղդալյանն էլ ասաց, որ հարցով անպայման կզբաղվեն:

Նիստին հետևած մամուլի ասուլիսում Ն.Ռիժկովին ուղղված հարց հնչեց` ինչու ՌԴ-ն կարող է չճանաչված Ղրիմի հետ լինել ԵՏՄ անդամ, իսկ Հայաստանը չի կարող Լեռնային Ղարաբաղի հետ անդամակցել:

«Դուք համեմատում եք Ղրիմն ու Ղարաբաղը… ես հասկանում եմ, որ Ղարաբաղը Հայաստանի ցավոտ թեման է, մեզ համար ևս, բայց Ղրիմի հարցում թույլ տվեք չհամաձայնվել: Ղրիմը պատմականորեն ռուսական հող է, դարեր շարունակ եղել ենք մեկ տարածք և արդյո՞ք մենք մեղավոր ենք, որ Խրուշյովը ոչ սթափ վիճակում այն տվել է Ուկրաինային: Ղրիմի բնակիչները իրենք իրենց կամքով հանրաքվեում որոշեցին, որ կմտնեն ՌԴ կազմի մեջ, ի՞նչ պետք է անեինք մենք, ասեինք ո՞չ, մի մտեք ձեր հայրենի տարչածք»,- արձագանքեց Ն.Ռիժկովը:

Շարունակելով թեման և օրինակ բերելով մյուս չճանաչված տարածքներն ու հանրապետությունները, նա ասաց, որ եթե ԱՄՆ-ն ուժեղ կողմ է, դա չի նշանակում, որ նա կարող է ամենաթողությամբ զբաղվել:

«Եկեք սկզբում կողմնորոշվենք Ղարաբաղի կարգավիճակում ու նոր քննարկենք այդ հարցը: Այնպես որ հենց Ղարաբաղի կարգավիճակի հարցը լուծվի, մենք ուրախ կլինենք նրան տեսնել կազմում»,- հայտարարելով, որ ինչպես Ղարաբաղը ճանաչված չէ, այնպես էլ Հարավային Օսեթիան, Աբխազիան և մյուսները:

Ինչ վերաբերում է այն հարցին, թե ինչպես է ինքը վերաբերում Հայաստանի դաշնակից ՌԴ կողմից Ադրբեջանին սպառազինելու մտահոգող խնդրին, Ն.Ռիժկովն ասաց, որ առիթ ունեցել է բազմիցս այդ հարցին անդրադառնալ, բայց հիմա էլ ասում է` ինքը չգիտի, թե ինչու է այդպես, բայց մեկ բան հստակ է` խորհրդարանը չի ընդունել որևէ որոշում սպառազինման մասով:

Ի դեպ, լրագրողներից մեկը դժգոհեց, թե ինչու նիստի ողջ ընթացքում հայերենով համաժամանակյա թարգմանություն չի եղել, չէ որ Հայաստանի պետական լեզուն հայերենն է, Հ.Նաղդալյանն ասաց, որ համաժամանակյա հայտարարություն եղել է, այնպես որ «Լեզվի մասին» օրենքը չի խախտվել: