Ձեր վստահելի աղբյուրը

Օրեր առաջ The Lancet Global Health ամսագիրը հրապարակել էր մի հետազոտություն, որտեղ ներկայացվում էր, թե աշխարհի 187 երկրներից որոնք են առողջ և որոնք են անառողջ սնունդ օգտագործում: Հետազոտությունն ընդգրկել է 1990-ից 2010 թվականները: Sciencedaily-ի  տեղեկացմամբ, զարգացած երկրները, ինչպիսին օրինակ՝ Կանադան է, Արևմտյան Եվրոպայի երկրները, Նոր Զելանդիան, Ավստրալիան և ԱՄՆ-ն, շարունակում են անառողջ սնվել: Ըստ նույն աղբյուրի, հետաքրքրական է, որ Աֆրիկյան շատ երկրներ, ինչպես նաև որոշ երկրներ Ասիայում (Չինաստան, Հնդկաստան) չեն բարելավել իրենց սննդի որակը: Իսկ ահա քիչ զարգացած երկրներում, օրինակ Չադում, Մալիում, ինչպես նաև Թուրքիայում, Հունաստանում մարդիկ օգտագործում են առողջ սնունդ, ի տարբերության Կենտրոնական Եվրոպայի ու հետխորհրդային երկրների:

Հետազոտությունը Հայաստանի մասով մանրամասնում է բրիտանական Independent պարբերականը՝ նկատելով, որ աշխարհում վատագույն սննդակարգն ունեցող երկրների տասնյակում Հայաստանը զբաղեցնում է առաջին հորիզոնականը: Վատագույն սննդակարգ ունեն նաև Բելգիան, Հունգարիան, Չեխիան:

Գիտնականները որպես առողջ սննդատեսակ նշել են՝ մրգեր, բանջարեղեն, ընդեղեն, լոբազգիներ, հատիկավորներ, հացահատիկային մթերքներ, կաթնամթերք, ձուկ, բջջանյութ և կալցիում պարունակող այլ մթերքներ, չհագեցած ճարպով մթերքներ, օմեգա3-ով հարուստ ծովամթերք:

Իսկ որպես անառողջ սնունդ հետազոտողները առանձնացրել են չմշակված կարմիր միս, վերամշակված միս՝ երշիկեղեն, շաքարային հավելումով խմիչքներ, գազավորված ըմպելիք, հագեցած ճարպեր, խոլեստերին և այլն:

Սննդաբան Վարդանուշ Պետրոսյանը Panorama.am-ի թղթակցի հետ զրույցում գնահատեց գիտնականների աշխատանքը և համաձայնեց՝ Հայաստանում մարդիկ անառողջ սնունդ օգտագործում են և այն էլ՝ շատ:

«Մենք քիչ ենք օգտագործում առողջ սնունդ՝ մրգեր, բանջարեղեն, ծովամթերք, ձուկ նույնպես, քիչ ենք օգտագործում, և դա բնական է, քանի որ երկրի 40 տոկոսը չքավոր են, ապրում են աղքատության մեջ: Առողջ սնունդը անհասանելի է բնակչության մեծ մասին»,-ասաց տիկին Պետրոսյանը:

Բացի այդ, նրա խոսքով, հանրության շրջանում տեղեկացվածության պակաս կա, և մարդիկ շատ դեպքերում տեղյակ չեն որ մթերքը ինչ վիտամիններով է հարուստ և որ սնունդն է ավելի օգտակար և ինչպես օգտագործել այն:

«Նաև պետք է նշել, որ կան մթերքներ, որոնք Հայաստանում պարզապես չկան, այդպիսին է ծովամթերքը, որը հարուստ է բազմաթիվ վիտամիններով»,- նկատեց մեր զրուցակիցը: