Ձեր վստահելի աղբյուրը

«Նաիրիտ» գործարանը շարունակում է մնալ պարապուրդում: Այս մասին այսօր ԱԺ-կառավարություն հարցուպատասխանի ժամանակ ասաց ՀՀ էներգետիկայի և բնական պաշարների նախարար Երվանդ Զախարյանը՝ պատասխանելով ՀՅԴ խմբակցության պատգամավոր Արծվիկ Մինասյանի հարցին, թե արդյոք կառավարությունը շարունակում է մտածել, որ գործարանը պետք է վերագործարկվի:

Պատագամավորը նաև հարցրեց, թե արդյոք ՀՀ կառավարությունը վերցրե՞լ է բաժնետոմսերը որպես իր սեփականություն և որքանո՞վ են համապատասխանում իրականությանը տեղեկությունները, թե գործարանում սկսվել է գույքի վաճառք:
Նախարարի խոսքերով՝ ամեն ամիս էներգետիկայի և բնական պաշարների նախարարության միջոցների հաշվին՝ կառավարության աջակցությամբ, չաշխատող գործարանի 480 աշխատակիցների ն վճարվում է 70-75 մլն դրամի աշխատավարձ:

«Կառավարության դիրքորոշումը հետևյալն է՝ կառավարությունը կողմ է «Նաիրիտի» վերագործարկմանը, եթե լինի պոտենցիալ ներդրող, պատրաստ ենք քննարկել վերագործարկման հարցը»,- ընդգծեց Ե. Զախարյանը:

Անդրադառնալով Ա.Մինասյանի մեկ այլ հարցին, թե իրենց նախանական գնահատականները ցույց են տալիս, որ «Նաիրիտ»-ի վերաբերյալ Համաշխարհային բանկի աուդիտը կատարվել է թերի, Ե. Զախարյանը նշեց. «Կառավարությունն ու նախարարությունը որևէ հիքմ չունեն ՀԲ այդ ուսումնասիրությունները դնել կասկածի տակ»:

Նրա խոսքերով՝ ՀԲ-ի դիրքորոշումն այն է, որ գործարանի վերագործարկումն այսօրվա դրությամբ նպատակահարմար չէ: «Թե ինչպիսին կլինի գործարանի հետագա ճակատագիրը, ցույց կտա ժամանակը: Եթե կլինեն ներդրողներ, մենք պատրաստ ենք բանակցելու»,- ասաց նախարարը՝ հավելելով, որ առաջիկա շաբաթների ընթացքում Միջպետական բանկի կողմից Նաիրիտի բաժնետոմսների վերաբերյալ վերջնական որոշումը կլինի, որից հետո բաժնետոմսները կանցնեն պետական կառավարման իրավասությանը:

Ինչ վերաբերում է գործարանի գույքի վաճառքին, Ե. Զախարյանը վստահեցրեց, որ այդ տեղեկատվությունը չի համապատասխան իրականությանը. «Պատասխանատվությամբ հայտարարում եմ, որ որևէ գույք չի վաճառվում»:
Արծվիկ Մինասյանը նաև հարցրեց՝ արդյոք այս իրավիճակում կառավարությունը չի՞ պատրաստվում հանդես գալ օրենսդրական նախաձեռնությամբ, որով նախ կպաշտպանի «Նաիրիտ»-ի գույքը, երկրորդ, մշակի այնպիսի սխեմա, որ ներդրողները ցանկություն հայտնեն նման պայմաններում ներդրում կատարել:

Ի պատասխան Ե. Զախարյանն ասաց, որ լավ կլիներ, եթե Արծվիկ Մինասյանը, ով երեք տարի է զբաղվում է «Նաիրիտ»-ի խնդիրներով, այս առնչությամբ կոնկրետ առաջարկություն ներկայացներ: Երկրորդը, ըստ նախարարի, որևէ օրենքի ընդունման անհրաժեշտություն այս պահին չկա. «Հարցին կոնկրետ անդրադառնալու համար անհրաժեշտ է, որպեսզի գույքը լինի պետական կառավարման տակ: Որևէ իրավասություն այս պահին կառավարությունն այդ գույքի նկատմամբ չունի»: