Ձեր վստահելի աղբյուրը

«Ժառանգություն» կուսակցության փոխնախագահ Արմեն Մարտիրոսյանն այսօր Հանրապետական պատգամավոր Սամվել Նիկոյանի հետ բանավեճում հայտարարեց, որ դեմ է և Սահմանադրությունը փոխելուն և ներկայացված նախագծին:

Մարտիրոսյանն ասաց, որ հիմնավորումներ ունի. «Ոչ լեգիտիմ իշխանությունը իրավունք չունի նման քայլ իրականացնի, Նոր Սահմանադրություն ընդունի: Երկրորդ՝ բովանդակային առումով էլ ենք նախագծին բացասական եզրակացություն տվել, այն պարզ պատճառով, որ նախագիծը բավականին հետքայլ է: Սա պառլամենտական կառավարման համակարգ չէ, ինչի մասին բարձրաձայնում են, այլ միակուսակցական կառավարման միտված նախագիծ է»:

Մարտիրոսյանը, ընդհանուր առմամբ, վկայակոչելով փաստաբանների, կազմակերպությունների, փորձագետների գնահատականները, ասաց, որ հետքայլ կա նաև մարդու իրավունքների պաշտպանության ոլորտում:

«Իշխանություններն արդեն սահմանադրական փոփոխությունները կյանքի են կոչում: Այսօր տեղեկացա, որ Սուրիկ Խաչատրյանի որդին՝ Տիգրան Խաչատրյանը նշանակվել է «Հայանտառ»-ի պետի խորհրդական, սահմանադրական փոփոխություններից հետո երևի կնշանակվի պետ»,-ասաց Մարտիրոսյանը:

Նրան մտահոգել է նաև այն, որ լրատվամիջոցները հանցավոր խումբը կապեցին «Նոր Հայաստան»-ի հետ. «Եթե նմանատիպ ձևով են առաջ շարժվելու, ապա մեր հոռետես կանխատեսումները, թե ինչ է սպասվելու սահմանդրական փոփոխություններից հետո, սկսվել է կյանքի կոչվել»:

Հանրապետական պատգամավոր Սամվել Նիկոյանն ի պատասխան հնչած հայտարարություններին, ասաց, որ սահմանադրական փոփոխություններին պետք է նայել պետականաշինության տեսակետից:

«Գործող Սահմանադրությունը ռիսկեր է պարունակում՝ իշխանության գերկենտրոնացման և քաոսային վիճակի: Եթե այս պահին առկա է իշխանության գերկենտրոնացում, ապա հաջոդ պահին  ռիսկը կարող է արտահայտվել քաոսային վիճակով»,-ասաց Նիկոյանը:

Պատգամավորը նշեց, որ Մելիք Ադամյանում՝ ՀՀԿ ԳՄ նիստի օրերին շատ լրագրողներ են հավաքվում, «որովհետև դուք էլ գիտեք, որ բոլոր կարևոր որոշումներն ընդունվում են այնտեղ: Մենք ընդունում ենք, որ այսօր կա կուսակցապետություն, իշխանության գերկենտրոնացում, և ըստ էության, պետական շատ խնդիրներ լուծվում են կուսակցության ներսում, հակակշիռների մեխանիզը չի գործում»:

Հանրապետական գործիչը հիշեցրեց, որ իրենց մեղադրում են, որ ցանկանում են սահմանադրական փոփոխություններով միակուսակցական կառավարման  համակարգ ստեղծել, մինչդեռ այդպես է հիմա. «Այո, այս սահմանադրությունը թույլ է տալիս իշխանության գերկենտրոնացում»:

Նիկոյանը հիշեցրեց, որ երբ իրենք առաջարկում էին կիսանախագահական կառավարման համակարգի անցում, ընդդիմադիրները պահանջում էին խորհրդարանական համակարգ, իրենք առաջարկում էին մեծամասնական ընտրակարգը պահպանել, բոլորը միաբերան կողմ էին հարյուր տոկոս համամասնական ընտրակարգին:

«Հիմա մենք ասում ենք, որ եթե բոլորդ  կարծում եք ճիշտն այդպես է, ապա ինչո՞ւ չանել այն, ինչ ընդդիմությունն ու քաղաքական դաշտն են ուզում, որովհետև ամեն մեկի հետևում ժողովուրդ կա կանգնած, մտածում ենք, դա հանրային պահանջն է: Եթե մենք գնում ենք այդ ուղղությամբ, ապա պետք է ողջունեն և օգնեն մեզ, որպեսզի կարողանանք այն իրականություն դարձնել»,-ասաց Նիկոյանը: