ԵԽԽՎ-ն կոչ է անում պատժամիջոցներ կիրառել Սավչենկոյի գործի հետ կապված անձանց նկատմամբ
Եվրոպայի խորհրդի խորհրդարանական վեհաժողովի գարնանային նստաշրջանում քննարկվեցին «Ուկրաինայում պատերազմի ընթացքում գերեվարված անձանց առնչվող հումանիտար խնդիրները» (The humanitarian concerns with regard to people captured during the war in Ukraine), իսկ քննարկման առանցքը ուկրաինացի օդաչու Նադեժդա Սավչենկոն էր։
Քննարկման արդյունքում 65 կողմ, 3 ձեռնպահ ձայներով ընդունված բանաձևում ԵԽԽՎ-ն կոչ է անում անդամ երկրներին պատժամիջոցներ կիրառել այն անձանց նկատմամբ, ովքեր ներգրավված են Սավչենկոյի առևանգման, ապօրինի կալանավորման, անարդար դատավարության և դատապարտման գործում՝ այնքան ժամանակ, մինչև Սավչենկոն ազատ կարձակվի։
Պատժամիջոցները հիմնականում վերաբերում են ճամփորդական արգելքներին ու հաշիվների սառեցմանը։ ԵԽԽՎ-ն կարծում է, որ այս միջացառումները պետք է իրականացվեն նաև ուկրաինացի մյուս 10 բանտարկյալների դեպքում, ովքեր ձերբակալվել են ՌԴ իշխանություների կողմից։
Խորապես մտահոգված լինելով նաև Ուկրաինայում պատերազմի ժամանակ գերիների նկատմամբ անմարդկային ու արժանապատվությունը նվաստացնող բազմաթիվ զեկույցներից՝ ԵԽԽՎ-ն նաև Դոնեցկում և Լուգանսկում վերահսկողություն հաստատած անջատողական խմբերին կոչ է անում ազատ արձակել իրենց պատանդներին ու գերիներին, դադարեցնել մարդու իրավունքների խախտումները։
ԵԽԽՎ անդամներն ընդգծում են, որ հակամարտության բոլոր կողմերի համար կարևոր է, առանց հապաղելու, իրականացնել Մինսկի համաձայնագիրը։
Ռուսաստանի ԱԳՆ մարդու իրավունքների հարցերով հանձնակատար Կոնստանտին Դոլգովը ԵԽԽՎ բանաձևն անվանել է երկակի ստանդարտների օրինակ և թվիթերում գրել․ «Իսկ այն մարդկանց պատժելը, ովքեր կապ ունեն Ռուսաստանի քաղաքացիներին ապօրինաբար ձերբակալելու և Ուկրաինայում ռուս լրագրողի սպանության մեջ, ԵԽԽՎ-ին չի՞ հետաքրքրում։ Ժողովրդավարությունից հեռու և մարդու իրավունքների պաշտպանության երկակի ստանդարտներ»։
Հիշեցնենք, որ Նադյա Սավչենկոն ՌԴ դատարանի կողմից դատապարտվեց 22 տարվա ազատազրկաման՝ ռուս լրագրողների սպանության մեղադրանքով։ Ուկրաինայի նախագահ Պետրո Պորոշենկոն ՌԴ-ին առաջարկել է Սավչենկոյին փոխանակել Ուկրաինայում ահաբեկչական գործուներության և ագրեսիվ պատերազմի համար 14 տարվա ազատազրկման դատապարտված ՌԴ 2 քաղաքացիների հետ։ ՌԴ-ն այս փոխանակումը հավանական է համարում։
Լրահոս
Տեսանյութեր
Քաղտեխնոլոգ. Մոսկվայում Ալիևը հրաժարվեց վճարել խաղաղապահների՝ Արցախից դուրս գալու գինը