Ձեր վստահելի աղբյուրը

Ախալցիխեում տեղի է ունեցել Վրաստանի Ներքին գործերի նախարարության արտագնա խորհրդակցություն: jnews.ge կայքը գրում է, որ ապրիլի 23-ին հայերի և վրացիների միջև տեղի ունեցած բախումների քննարկման և ոստիկանությունում հետագա միջադեպի մասին պաշտոնական հայտարարությունում չի խոսվում:

Ներքին Գործերի նախարարության պաշտոնական զեկույցի համաձայն, գերատեսչության ղեկավար` Գիորգի Մղեբրիշվիլին հանդիպել է Թբիլիսիի և մարզային ոստիկանության բաժինների ղեկավարների հետ: Աշխատանքային հանդիպման ժամանակ Մղեբրիշվիլին ծանոթացել է տարածաշրջաններում տիրող իրավիճակին:

Նախարարը ոստիկանության բաժինների ղեկավարների հետ քննարկել է պրոբլեմատիկ հարցերը և առաջնահերթությունները, և նոր հրահանգներ է տվել:

«Ինչպես հանդիպման ժամանակ նշել է Մղեբրիշվիլին, Ներքին Գործերի նախարարությունը շարունակում է հանցավորության դեմ անզիջում պայքարը, առավելագույնս ապահովելու իր քաղաքացիների անվտանգությունը: Ներքին գործերի նախարարը հայտնել է իր լիակատար աջակցությունը իրավապահ մարմիններին` հանցավորության դեմ պայքարում», – ասված է հաղորդագրությունում:

Կայքն ավելի վաղ գրել էր, որ նախարարն իր այցի ընթացքում անձամբ ծանոթացել էր իրավիճակին, որը տեղի է ունեցել ապրիլի 23-24-ին, սակայն տվյալ հարցի հետ կապված կոնկրետ որոշումներ և գործողությունները ներկա պահին դեռ չկան:

Հիշեցնենք, որ ավելի վաղ «Ջավախք»  հայրենակցական միությունը ներկայացրել էր այդ դեպքից մանրամասներ. «Ապրիլի 23-ին ավանդական ջահերով երթից հետո Ախալցխայի շրջանի Ծղալթբիլա, Աբաթխև և Ծինուբան հայկական գյուղերի երիտասարդներն  ավանդույթի համաձայն բարձրացել են տեղի հայերի կողմից կառուցված  սրբավայրի մոտ` կրակ վառելու և այսպիսով  հարգելու  Հայոց  Ցեղասպանության  զոհերի  հիշատակը:  Հասնելով  սրբավայր` նրանք հանդիպել են հարևան Վալե քաղաքից մի խումբ վրացիների, ովքեր  խնջույք  էին կազմակերպել և գտնվել են ոչ սթափ վիճակում:  Չհասկանալով հայ երիտասարդների ուզածը` այդ մարդիկ  կռվի են բռնվել նրանց  հետ, սակայն որոշ ժամանակ անց  հասկացել  են միմյանց: Չնայած դրան՝ կեսգիշերին ոստիկանությունն իրենց տներից հանել և  ոստիկանական  տեղամաս  է տարել  բազմաթիվ  հայ երիտասարդների, որոնց ծեծի են ենթարկել, նվաստացրել և անգամ անվայել խոսքեր հնչեցրել Հայոց Ցեղասպանության հասցեին: Կատարվածը խիստ հուզել է ջավախքահայությանը»:

jnews.ge կայքը նաև գրում է, որ Սամցխե-Ջավախքի ոստիկանության դեպարտամենտը հանդես է եկել հայտարարությամբ, որով հերքում է ապրիլի 23-24-ին տեղի ունեցած միջադեպից հետո ոստիկանության կողմից իրականացրած բռնությունների ու ճնշումների մասին լուրերը:

Նախօրեին Սամցխե-Ջավախքի ոստիկանության դեպարտամենտի ղեկավար Թեյմուրազ Կալանդաձեն հայտարարել է. «Տեղական մամուլի տարածած տեղեկատվությունն այն մասին, որ Ախալցիխեի շրջանի Աբաթխև գյուղում վրացիների և հայերի միջև, կոնկրետ էթնիկ հողի վրա ֆիզիկական և խոսակցական բնույթի վեճ է եղել: Եվ այն ինֆորմացիան, որ Ախալցիխեի շրջանային ոստիկանության բաժանմունք տարած մարդկանց իրավապահները էթնիկ կամ կրոնական հողի վրա ճնշում են գործադրել՝ չի համապատասխանում իրականությանը»,- ասել է Կալանդաձեն: