Քաղհասարակությունը կարևոր դերակատարում ունի ՀՀ-ԵՄ համագործակցության խթանման հարցում. փոխնախարար
Հայաստանի կառավարությունը կարևորում է քաղաքացիական հասարակության ներգրավվածությունն ինչպես ԵՄ հետ իրականացվող նախաձեռնությունների ու ծրագրերի շրջանակներում, այնպես էլ երկրում տարբեր ոլորտներում իրականացվող բարեփոխումների գործընթացներում,- «Հայաստան-Եվրոպական միություն հարաբերությունների ներկայիս վիճակը և քաղաքացիական հասարակության մասնակցության մեխանիզմները» խորագրով համաժողովին ունեցած ելույթում ասել է ԱԳ նախարարի տեղակալ Կարեն Նազարյանը:
ՀՀ ԱԳՆ մամուլի, տեղեկատվության և հասարակայնության հետ կապերի բաժնի հաղորդմամբ, համաժողովը համատեղ կազմակերպել էին Արևելյան գործընկերության քաղաքացիական հասարակության Հայաստանի ազգային պլատֆորմը և ՀՀ-ում ԵՄ պատվիրակությունը:
Կարեն Նազարյանը նշել է նաև, որ քաղաքացիական հասարակությունը կարևոր դերակատարում ունի Հայաստան – ԵՄ համագործակցության խթանման հարցում, մասնավորապես` միջմարդկային շփումների, բազմաոլորտ փոխանակումների ու կապերի ամրապնդման, Եվրոպայի հետ ունեցած ընդհանուր արժեհամակարգի մասին իրազեկության բարձրացման գործում:
Համաժողովի ընթացքում նախարարի տեղակալը ներկայացրել է Երևանի ու Բրյուսելի միջև վերջին շրջանի զարգացումներն ու քաղաքական շփումների արդյունքները, խոսել ԵՄ երկրների հետ երկկողմ համագործակցությանն առնչվող խնդիրների, տարածաշրջանային զարգացումների առնչությամբ կողմերի դիրքորոշումների ու գնահատականների մասին: Անդրադարձ է կատարել Եվրոպական հարևանության քաղաքականության վերանայման գործընթացին՝ ողջունելով այն փաստը, որ Եվրոպական հանձնաժողովը վերանայման գործընթացին մասնակից է դարձրել ինչպես ԱլԳ երկրներին, այնպես էլ՝ այդ երկրների քաղաքացիական հասարակությանը: Զեկուցողն անդրադարձել է ՀՀ-ԵՄ նոր իրավական փաստաթղթի շուրջ բանակցությունների ընթացքին, խորհրդարանական մակարդակում եվրոպական կողմի հետ ակտիվ փոխգործակցությանը և ԼՂ հակամարտության կարգավորման հարցում ԵՄ դիրքորոշմանը:
Աղբյուրը հայտնում է նաև, որ համաժողովի ընթացքում Կարեն Նազարյանը նաև պատասխանել է մասնակիցների հարցերին:
Լրահոս
Տեսանյութեր
Արման Թաթոյանը միացավ Բագրատ Սրբազանի առաջնորդած քայլերթին
