Զուրաբյանը հիշեցրել է մինչև 1998 թվականը և դրանից հետո մասնավորեցված հիմնարկները
Երկրում օրինականության ապահովումը և կոռուպցիան արմատախիլ անելը մեր ամենակարևոր հրամայականն են, եթե ցանկանում ենք ստեղծել արդյունավետ պետական կառավարման՝ ներառյալ ամուր պաշտպանական համակարգ։ Այսօր Ազգային ժողովում ունեցած ելույթում հայտարարեց ԱԺ ՀԱԿ խմբակցության ղեկավար Լևոն Զուրաբյանը:
ԱԺ ընդդիմադիր պատգամավորը Պետական գույքի մասնավորեցման 2006-2007 թվականների ծրագրի կատարման 2014 թվականի տարեկան հաշվետվությունը հաստատելու մասին հարցի քննարկման ժամանակ բարձրացրեց Գյումրիի «Նարեկ» հագստյան տան գույքի օտարման հետ կապված խնդիրը։
«Հիշեցնեմ այդ խնդիրը։ Կառավարության որոշումով Գյումրիի «Նարեկ» հագստյան տունը՝ որպես նվիրաբերություն տրվել էր Գյումրիի քաղաքապետարանին այն պայմանով, որ տան բնակարանները անհատույց օգտագործման իրավունքով կտրվեն 12 ընտանիքներին։
Մենք դեռ այն ժամանակ բացահայտեցինք, որ կառավարությունը խախտել էր օրենքը, քանի որ համաձայն «Պետական գույքի մասնավորեցման» մասին օրենքի, չէր կարող նվիրաբերության միջոցով գույքը դարձնել Գյումրիի քաղաքապետարանի սեփականություն։
Ավելին, այդ ժամանակ մեր սեփական ուսումնասիրությունները ցույց տվեցին, որ վերոհիշյալ ընտանիքների օգտագործման իրավունքը այդպես էլ չէր ձևակերպվել և կառավարության որոշումից մեկ տարի անց բնակիչներից ոչ ոք տեղյակ չէր որոշման մասին։
Ակնհայտ էր, որ նման խախտումները հնարավորություն էին ստեղծել 12 ընտանիքներին բանակարանների տրամադրման պատրվակի ներքո շենքը փոխանցել համայնքի բալանսին, իսկ հետագայում, հանրային վերահսկողության բացակայության պայմաններում, կարող էին իրականացվել օտարման կոռուպցիոն գործարքներ։
Տարօրինակ էր նաև, այդ խախտման բացահայտման համար շնորհակալություն հայտնելու և արագորեն շտկելու փոխարեն, մեր այդ մտահոգությունը դուք այն ժամանակ գնահատեցիք որպես «չկամություն» այդ ընտանիքների նկատմամբ և խոստացաք մեր այդ «չկամության» մասին նրանց հայտնել։
Սակայն անցյալ նիստին պարզվեց, որ հարցը բարձրացնելուց երկու տարի անց դուք ոչ մի բան չէիք արել բնակիչներին հադիպելու ուղղությամբ, երևի կարծելով, որ մենք բավականաչափ հետևողական չենք լինի այդ քաղաքացիների իրավունքների պաշտպանության գործում։
Անցյալ նիստին մեր հարցադրումներին դուք պատասխանեցիք, որ «Հանձնման-ըդունման ակտի ստորագրման պահից այլևս այդ գործառույթն անցնում է Գյումրի համայնքին», այսինքն, որ դուք այլևս այդ գործընթացին հետևելու պարտավորություն չունեք, ավելին, ինձ խորհուրդ տվեցիք իրավիճակը ճշտելու համար դիմել Գյումրիի քաղաքապետարան։
Ես ստիպված էի առարկել, որ գույքը տրվում էր շատ հստակ պայմանով, հետևաբար դուք պարտավոր էիք հետևել գործընթացին մինչև վերջ և ստուգել պայմանների կատարումը։
Անցյալ նիստից անցել է 18 օր, և ես գոհունակությամբ պետք է արձանագրեմ, որ այս ընթացքում վերջապես քայլեր են արվել ճիշտ ուղղությամբ։ Նախ, դուք ինձ նամակ եք ուղարկել, որում մանրամասն պատասխանել եք իմ բոլոր հարցադրումներին։ «Նարեկ» հանգստյան տան մասով նշել եք հետևյալը. «համայնքի հետ կնքվել է բաժնետոմսերի նվիրաբերության պայմանգիրը, որում որպես նվիրաբերության պայման նախատեսվել է որ նվիրառուն պետք է կնքեր անհատույց օգտագորման իրավունքով պայմանագրեր հանգստյան տանը բնակվող բնակիչների հետ»
Գյումրու քաղապետարանը չի կատարել պայմանը, ինչի մասին դուք տեղյակ չեք եղել։ Ավելին, համաձայն մեր ունեցած տեղեկությունների, տաս օր առաջ, այսինքն խորհրդարանում հարցը կրկին բարձրացնելուց հետո ձեր ներկայացուցիչները, Գյումրու քաղաքապետարանի ներկայացուցիչների հետ միասին վերջապես այցելել են «Նարեկ» հանգստատան բնակիչներին և միայն այդ պահից սկսած, այսինքն կառավարության որոշումից երկուսուկես տարի անց, վերջապես սկսվել է կառավարության որոշման կատարման գործընթացը: Բնակիչներին վերջապես ասել են, որ կկատարվի գույքագրում և կարվեն անհրաժեշտ ձևակերպումներ», -դիմելով ԱԺ դահլիճում նստած Պետական գույքի կառավարման վարչության պետ Արման Սահակյանին հայտարարեց Զուրաբյանը:
Նա առիթը բաց չթողեց և անդրադարձավ նախորդ նիստում 90-ական թվականներին կատարված մասնավորեցման խնդրի վերաբերյալ Արման Սահակյանի մեղադրանքներին.
«1999-ից ի վեր Հայաստանում բոլոր վարչապետները եղել են Հանրապետական, իսկ մենք այլևս եղել ենք միայն ընդդիմություն: Որևէ դժվարություն չկա մասնավորեցման գորընթացները այդ ժամանակշրջաններում համեմատելու համար: Մենք ոչ միայն այդ համեմատությունից չենք վախենում, այլև ժամանակին, 2007 թվականի դեկտեմբերի 8-ի հանրահավաքում առաջին նախագահը այդ համեմատությունը արել է»:
Նա վկայակոչեց Լևոն Տեր-Պետրոսյանի արած մի քանի համեմատություններ՝ 1992 -1998թ.թ.-ին անվճար սեփականաշնորհվել են հողատարածքներ, անասնագլխաքանակ, պետական բնակարանային ֆոնդը՝ ընտանիքներին, արվեստանոցներն՝ օգտագործողներին, շուրջ 5000 փոքր ձեռնարկություններ՝ կրպակներ, խանութներ, իսկ ՝1998-ի փետրվարից մինչ օրս սեփականաշնորհվել կամ օտարվել է ստրատեգիական նշանակության համարյա բոլոր ձեռնարկությունները, այդ թվում՝ բոլոր գլխավոր հիդրոէլեկտրակայանները (Սևան - Հրազդան, Որոտան, Ձորագէս և այլն), էլեկտրական ցանցերը, Զանգեզուրի և Ալավերդու պղնձամոլիբդենայինները, քաղաքացիական ավիացիան, ցեմենտի գործարանները, կապի համակարգը, կոնյակի գործարանը և այլն:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց